Il y a tréjous de bé droles de choses qui s'passent
Il y a tréjous de bé droles de choses qui s'passent dans un p'tit pays couomme Jerri, car touot n'est pas mins sus les gazettes et à dithe vrai n'v'la qu'est de tant mus.
Mais, bête que j'sis, j'voudrais bein saver chein que les buans vièrs jerriais penseraient d'un pays iou que pouor aver une job officielle nous poserait couomme condition d'être mathiais mais n'pon aver d'mousses.
Eh bein, l'autre séthée, tandis que j'tais à m'r'poser un miot dans la “Foret” d'la pus p'tite paraisse en Jerri, j'vit un troupé d'gens qui lus en allaient du bord du parish hall et il y en avait qui d'pis d's'années n'avaient pon été à une assembliaie. Tchès que chunna veur dithe, que j'pensi et couomme j'sis un miot tchutieuse d'ma sorte me v'la horte pouor m'jutchi sus l'aie du foyi.
Quand vint un temps l'pus grand homme d'la pus p'tite paraisse, oprès aver netti ses lunettes avec son mucheux, s'mint à lièthe un tas de conditions, mais tchi surprinse et tchi rithe quand y s'fit: Le gardien devra être homme marié mais sans enfants.
L'pus bé d'l'affaithe ch'est qu'oprès, l'appel nominal, nous apprins que ch'tait Philip de la Hougue qu'avait la job, ly qu'est engagi mais pon encouore binder par Moussieu l'Recteur et que n'v'la binder à n'pon aver d'mousses! Mais mon pouorre Phlip a tchi que tu penses pour te binder d'même. Et tchès qu'en pense Alice?
D'pis que ch'est de couotume de faithe des présents de neuches et que j'sais bein que l'grand jour approche, si tu veur, mé Marie Hibou, je t'ferai présent d'la copie de chu vièr régliément que tu pourras mettre dans un frame pouor l'pliachi au dessus de ton lièt, mais pouor faithe plaisi à Alice j'ly envierait l'nouviau régliément iou qui n'est pon paslé de chutte terrible restriction car, vais tu, chein que l'buanhomme de Connétable donni lecture au meeting ch'tait l'vièr régliément qu'nous a changi d'vant que tu n'appliques pouor la job et d'même tu sais tchi faithe.
* * *
N'v'la les carnavas finis pouor chutte année et si j'n'ai pon raconter touot chein que j'sais, sus ce qui s'passi dans les paraisses dans chès bordées ch'est que trop souvent il faut mus taithe sa becque que d'êbotchi un tas de tchi qui n'a rein d'plaisant car ch'est tréjous d'même, il y en a qui n'peuvent s'amuser sans faithe une bête d'eux mêmes.
Couomme nous sait, l'dergni carvnava ieut lieu sus la commune de Gorey et nou fit bein les choses mais une p'tite djingue d'angliais furent bein surprins car nous n'avait pon mins sus la “Post” qu'il y aurait un wireless concert. Nos gens étaient à écouter chu wireless oprès de l'enclosure ès bikes, etc. En viyant l'grand homme qui peut dithe que mon plaisir ès d'être de bordées d'même, le Ted qui s'en va tchiter ses Woodlands d'ichin Noué et l'Frainque de siez Orviss, en les viyant tchiter l'Coumittee room bé vite et lus en aller du bord de l'enclosure j'pensi il y a tchique chose qui n'va pon de chu bord et vite m'v'la hors pouor être la d'vant ieux.
Pouor dithe la vérithèt j'eut grand peur car j'criyais qu'nous m'avait veue quand j'entendis une vouaie qui disait:
Sentinelle ne tirez pas!
Mais quand j'ouit oprès:
C'est un oiseau qui vient de France!
J'fut bein soulagie viyant que j'savais que ch'tait une chanson bein connue sus la côte voisine d'pis que ma mémée la chantait tchiques fais quand oulle tait d'buanne humeuthe.
Et pis ch'tait Paul, ieun des pus connus de Jerri, houomme des pus pacifiques et des meilleurs, qui chantait d'même tellement il avait d'plaisi d'vais touos l'monde s'amuser car ch'n'tait pon en touot l'wireless comme l'criyaient chest angliais qui n'y comprenaient mot.
* * *
L'autre sé, un jeune gars de St.-Brelade s'en vint touot essouffié vais ieun des siens en chèrge dans la paraisse de St.-Sauveur et s'fit qui v'nait d'ly arriver un terrible accident tandis qui ramontait l'mont sus sa motorbike. Criyant que p'être que ch'tait une affaithe de police ou même une levée de corps, nous ly d'mandi des explications et y réponnit qu'il avait bein aperchu les deux rouoges veues mais y criyait qu'nous pouver passer entre ces veues quand y tapi contre une bouaite remplie de pierre et d'gravi qui renversi ovec la barrière. Et le terrible accident ch'tait viyant que sa motor bike avait ieut les “gambes” rompues et qu'oulle n'marchait pus et qu'il allait être oblige d'rentrer à St.-Brelade à pid.
Chunna est la pure, pliaine et entièthe vérithét, coumme l'fait que l'sien de chutte paraisse de St.-Sauveur qui fut trouvé dans la route oprès Avranches avait ieut une mauvaise trick de jouée car la saddle de sa bike avait été touornée et quand y voulit monter dessus ch'est dans l'mitan d'la route qui resti!
Caouain
1934
Viyiz étout: