Ch'est tréjous d'même. Quand viens la saison, l'Sieur Caouain a tréjous tchique extchuse pouor aller aidji son milleur amin, George, l'Secrétaithe de l'Union des Fermis, qui n'peux pon s'passi d'ly à chein qu'y dit. Ch'est d'antchi j'ai la job d'bailler d'ma goule dans chutte gazette quand l'boss n'sait pon tchi mettre dedans pouor la rempli.
Oh! mais tchi tétouanne que chu boss et nous n'gagne rein d'ly dithe comme compliement qu'avec autant d'ptits boudins dans la tête couomme il a nous peux tréjous trouver d'tchi remplir la gazette. Nennin, pas d'extchuses, mais une colonne de tes balivernes n'v'la chein qui m'faut.
D'pis qu'il est sus l'mus j'lai oui s'faithe pus d'une fais qu'il n'y a que les bons qui s'en vont et les mauvais restene. Savous que ch'est une grande vérithèt, quant à ly, car j'en sais tchique chose mé, et j'aime mus ly vais les talons que sa fache!
Nennin, j'n'vais pon vous pasler des siens qu'ont longue fache, d'pis qui sont obligis d'aller à confesse dans l'office du Controlleur de l'Impôt sus l'revenu! Quant à mé n'v'la qui n'me tracasse pon entouot viyant que si l'affaithe continue d'même ch'est plustot ès Surveillants de ma paraisse qui faudra que j'm'adresse ou bien ès siens qui ont charge du don Westaway.
J'aime mus vos raconter la triste histouère d'un fermi qui aurait du savèr mus et si chutte affaithe n'a rein d'nouvé, chein qui m'fait en pasler est que ch'est la pure, plieine et entièthe vérithèt et que chonna s'passi en Jerri, il y a deux ou trais mais.
Bill est iun de ces hommes qui, couomme nous l'dit, couperait un rouoge liard en quatre et s'il ne compte pons oeus d'vant qu'la poule n'ait pondu y sait tréjous bein combein il y a de poules dans son poullailly.
Donc, une séthée il s'aperchut qu'iunne de ses poules avait dispathut. Y fit l'guet et trouvi l'voleur qui n'tait pon un r'nard à deux pattes, mais un tchan à quatre pattes. Il alli crier à iun d'ses vaisins pouor v'nir vais l'voleur qui fut identifié couomme étant d'une grande maison des environs.
Oprès chunna, après avêr brinchi un miot ses braies et mis ieunne de ses bouannes casaques, n'v'la maître Bill qui s'rend sièz un Moussieu du vaisiné, mais qui à une office en ville dans l's'envithons du vièrr Marchi.
Et tchès qu'il y a donc Mess....... s'fit chu Moussieu quant y vit que ch'tait l'buanhomme Bill.
Bill s'fit qu'il avait grand r'gret de dérangi Moussieu, mais que si Moussieu voulait n'v'la qui ly sauverait la peine d'aller le consulter à s'n'office en ville.
Et notre Moussieu d'ly répondre que ch'tait all right, qu'il n'fallait pas s'gêner et d'ly dithe chein qu'en était.
Donc n'v'la notre Bill à raconter à chu Moussieu qu'il avait ieut une poule de tuée par un tchan qui n'en avait laissi que les plieumes. Que chutte poule était ieunne des meilleures pondeuses qu'il y avait dans touot Jerri. Et enfin y d'mandi si ch'est que la louai lui donnait drait à une compensation.
Notre homme de louai ly répondit que tel était l'cas, mais qu'il fallait prouver à qui appartenait l'tchan, auteur de touot l'mâ.
Chunna est aisi, s'fit l'buanhomme Bill, car mon vaisin est v'nu vais le tchan et il le connait bein. Il y a pon de dangi, je peux l'prouver, mais couomment qui faut s'y prendre. Faut y envièr Bill?
D'vant d'envièr Bill, s'fit notre Moussieu, y faut faithe une récliamation au propriétèthe du tchan, ly expliquer chein qu'en est. Si ch'est qu'il n'veur pon settler l'affaithe amicablement, alors il faudra aller en Cour. Ch'est d'antchi, attendez deux ou trais minutes que j'aille cherchi une feuille d'papi et j'men vais ly écrithe en votre nom.
Ch'n'est pon la peine de vous dérangi d'même, réponnit l'buanhomme Bill.
- Oh! ch'n'est pon du derangement qui d'vous faithe plaisi. Achteu, dites mé tch'est qu'est l'nom de propriétaithe du tchan.
- C'hest que vous viyez...
- J'comprends, vous n'êtes pon trop seur.
- Si fait, ce n'est pas chunna.
- Mais tchès que ch'est donc? l'votre, Moussieu! Et mon vaisin peut l'prouver et d'autres éttout.
N'v'la qui fut une surprinse pouor notre homme de louai! Mais tchi surprinse éttouot pouor l'buanhomme Bill quand y oui Moussieu s'faithe qu'il n'avait qu'à payi, puisque ch'tait d'même et l'y d'mandi combein qui voulait.
Bill ly réponnit que chutte poule était ieune de ses pus belles mais que pouor Moussieu il n'chargerait que 4/6.
Et avec ses 4/6 dans sa pouchette l'buanhomme Bill rentri sièz ly heureux et content.
Le lendemain, chunna fut une autre chanson quand l'postman ly r'mins une enveloppe dans laquelle y trouvi une feuille d'papi portant: Pour consultation au sujet d'une poule tuée par un chein, 7/6! Et l'buanhomme payi, car si l'affaithe allait en Cour n'v'la qui paraitrait sus touotes les gazettes de l'Ile et tchès qu'nous penserait de ly de s'être laissi jouer d'même.
J'vos dis et j'vos asseuthe que chunna est la pure vérithèt.
Caouain
1929
Viyiz étout: