Avous veu l'boss d'pis qu'il est de r'tour de san viage à l'autre but d'la France?
Avous veu l'boss d'pis qu'il est de r'tour de san viage à l'autre but d'la France? N'v'la qui l'a rajeuni tant et tellement qui s'crait ervenu jeune couomme de temps ou... y faisait comme l's'autres de s'n'âge et couomme nous fait touos d'vant d'aver l'âge raison!
Pus djingue autouor d'son cô, pus d'chapé mais un béret touot couomme les visiteurs qui viennent en Jerri passer lus holidays. Tchi sight, buannes gens, assez pouorservir d'épeuthas! Et tchi surprinse quand je l'vit d'même la prumièthe fais.
Ch'était l'autre sé. Viyant la caleur je m'déshalli pouor aller respirer un miot d'air frais du bord d'la Collette. J'étais à mon touot seul viyant que l'Sieur Caouain est tréjous hors de sièz nous pouor assister à des réunions de coumités... a chein qui m'dit. Chutte séthée là y s'fit que ch'tait un nouviau club qui v'nait de starter pouor encouoragi les jeunes filles à laissi craitre lus ch'veux et... lus jupes! Du gnollin pouor seur mais oprès touot n'v'la qui m'faisait pus plaisi de m'proumener à mon touot seu que d'être avec chu vilain oisé qu'est l'Sieur Caouain.
Donc, j'm'promenais sur la walk quand j'oui tchicqu'un criyer: Aie, aie, tchès que tu fais par ichin! J'pensis à mé même ch'est encouore un affronté mais y s'trompe bein et j'sis bein seur que l'fun n's'ra pon de san bord quand y verra ma fache si ch'est que je m'retouorne pouor ly d'mander tchès qu'y veur car ch'n'est pon à m'n'âge qu'nous peur avèr l'espoir d'remporter tchique prix pouor biauté!
J'vit bein chut oisé là s'lever de dessus l'banc et s'mettre à couorre souotre mé mais quant y s'fit: Eh, mais ch'est té Marie, tchès que tu ès a faithe par ichin, quand je l'oui faithe dithèt r'merques j'pensi il est temps que j'fasse comprendre à chut anima de s'otchuper de ses affaithes et de l'y apprendre à s'comporter couomme il faut quand nous a à faithe avec d'honnêtes gens.
Ch'est d'antchi je m'r'touorni bé vite pouor ly servir un compliement.
J'failli tchès bas quand souos son bonnet j'r'connu l'boss. Et mé qui criyait que ch'était un “five pounder” qu'était à m'suivre!
Assez pouor m'faithe acraithe qu'oprès touot j'd'vais paraître bé smart, par drièthe bé seur!
* * *
D'pis chunna j'sis à m'd'mander tchès que l'boss faisait du bord de la Collette, ly qui prétend n'pon saver iou douonner d'la tête vu qu'il a bein trop d'travas.
Je m'd'mande chunna car sus chutte proumenade j'rencontri pus d'une jeune hardelle, des angliaises surtout, qui couomme vêtements n'en portaient pon lourd sus lus carcasse; oulles étaient en bathing costumes et ch'est tout! Il y en avait pus à découvert que d'muchi!
Mais mon doux, d'notre temps, n'est cep on la mode et n'v'la qu'est si commun que chunna n'a pu d'attrait!
* * *
Je n'sais pon si ch'est qu'il a peur qu'ils n'fassent feu par la tchulasse mais tréjous est y que l'amin Ned, grand houomme d'la ville, n'aime pon vais des canons.
L'autre jour, en pliaine assembliaie d'paraisse y s'fit qu'a chaque fais qui passe au matin sur la Parade, rein que d'vais les vièrrs canons qui s'trouvent là couomme ornements n'v'la qui met en révolution s'n'estomac! Et quant nous a l'estomac en révolution l'esprit d'vient bas et nous vais touot autrement que souos couleurs de rose.
Pour vos, pouor mé, n' v'la qui n'fait rein mais quant nous est grand homme dans p'tit pays et quand nous est en poste pouor décider d'l'avenir de touote la communauté, aver l's'esprits bas n'convient pas.
Ch'est d'antchi, d'pis que les siens en chèrge d'la paraisse n'veulent pon déplachi ch'est gros canons pouortchi que nous n'éprouverait pon à déplaichi la Parade avec les gros canons!
Mais j'y pense, la pliaiche est touote trouvée. Il n'y a qu'à porter la Parade et ses canons aux Minquiers et si oprès chunna l'sien qui est à éprouver d'bâtir une maison sur la maitrise ile ne s'empresse pon de patcher touos ses outils, eh bein nous pouorrait chargi ch'est canons pour l'envier s'proumener sus la côté voisine! N'v'la qui settlerait bé vite touote chute affaithe!
* * *
Fred est ieun de ces individus qu'ont tréjous pus soif que faim. Dés qu'il a tchique coppers n'v'la qui ly brule la pouchette... et l'gossi.
L'autre sé, oprès aver été payi d'sa tache il alli vais ses amins. Couomme d'habitude, ayant sai, y s'mint à baithe et ayant bu y se saoli et étant trop saoul pour être servi à l'auberge y rentri sièz ly.
Au but de p'tit temps il eut encouore sai et y s'trainy jusqu'à la p'tite armouaithe iou que la Missis à l'habitude de mettre chein qu'oulle acate l'Samèdi pouor la s'maine.
Dans chutte armouaithe il eut l'plaisi d'trouver une bouteille! D'la nièth y n'put fermi l'yi entrant et sortant touos les chinq minutes.
Et le lendemain au matin sa Missis s'aperchut que sa bouteille d'ieaue de cannelle était viède!
N'v'la que explique pouortchi Fred n'dormi pon d'la nièth!
Marie Hibou
1929
Viyiz étout: