Achteu que l'élection dans la paraisse de St. Jean est passée et qu'nos gens, oprès deux ou trais viages dans deux offices d'Hill Street, ont ieut l'buan avis d'garder lus sous dans lus pouchettes plustôt que d'les déshaller pouor épignotchi chein que j'sais bein mais sus tchi j'aime mus taithe ma becque, y faut que j'vos racontes tchicques p'tites scènes qui s'passites dans chute bordée qui mint à feu et à fliammes chutte paraisse.
Ch'est qu'il y en iuet d'touotes les bénites sortes et annièth n'v'la qui n's'ra que la prumièthe leçon viyant qu'il n'y aurait pon assez d'run dans la gazette pouor mettre touot chein que j'sais.
Couomme Charlie, l'causeur du Mont-Mado, était d'avis que pouor pratitchi et avèr une buanne band y fallait abreuver les gars et de chutte manièthe les encouroragis à sufflié raide dans lus fliutes, nous ly apporti une barrique de pur jus qui mint dans l'appartement oprès de sa tchuisine. Tchi surprinse lorsque l'Vendredi au sé, quant y vouli goûter d'chu buan verjus, y touorni la chanteplieuthe et vit que la barrique était viède. Il en chanti de tchi bé car il tait quassiment prêt a en plieuthé!
Ch'tait l'sé de d'vant qu'nous ly jouit chutte trick là et nos gars étaient encouore a vèdgi chutte barrique quand Charlie s'lévi pour v'nir dans sa tchuisine!
N'v'la qui n'est pon des farces à faithe car Charlie s'était douonné hardi d'mâ avec Douard des carrières pouor former la band et ch'tait ly qu'avait été ramassi les tambours et même nous éprouvi à aver des gars d'la band à Jack, s'il vos pliait!
J'pense que n'v'la pouortchi que ch'tait un plaisi d'ouïr chutte band l'jour de l'élection, un grand pliaisi pouor les siens qui aiment ouïr un solo de tambours! Car les joueurs de flieutes étaient bein faillis et quand chutte band jouait "Chase me Charlie'' une p'tite djingue pensait que si Charlie savait que ch'tait ieux qui ly avaient joué chutte vilaine farce y s'mettrait à les "chaser!''
Le Lundi au sé, pendant trais heuthes de temps, nous resti à distchuté et deux perrots s'trouvant sus la carre du sofa sembliaient être bein anxieux d'savèr si nous allait s'décider à acater des viaux où non car ch'tait l'moment d'faithe ces sortes d'bargains.
Savous que d'pis l'élection nous en veur à ces deux perrots et qu' nous dit qu'ils avaient trop de becque.
Quant à mé j'n'crais pon un mot de chein qu'nous dit d'ieux mais il y en d'autres qui n'sont pon de chut avis.
Iun des pus mârris du résultat est l'buanhomme Hélier.
Couomme y s'faisait: J'avons trávailli bein des fais jusqu'à deux heures du matin et j'nous comptions bons. D'après nos caltchules j'pouvions compter sus pus de cent septante plumpers. I' y avait des traitres et des espions dans notre camp. J'avons été trahis mais j'sommes les pus forts et j'allons touot bouter d'hors; Connétable, Député, Chantgniers et touote la boutique. J'avons d'buans candidats pouor touotes les postes dans la paraisse.
Chutte fais j'n'avions pon d'femmes à voter d'notre bord mais j'allons en mettre pus de septante sus la liste électorale chute année et look out. J'irons l'dernier jour cherchi les formes pouor les aver inscrites.
Chein que j'n'peux pon comprendre en touot ch'est quand l'buanhomme Hélier dit qui faut mettre touotes les femmes sus la liste électorale et qui s'fait "chest une peste quand les femmes s'en d'mentent!''
L'Phlip d'Hérupe, qu'est doux couomme un mouton quand nous l'vais, n'est pon d'même quand il a hallé sa casaque et l'frégattin ou l'marine d'oprès la Hougue-Boette en sait tchicque chose quand Phlip l'envyi voler raide dans les spokes d'une bike! Y faut dithe que l'vent jouit une sale farce au marine en ly couvrant la fache avec sa casaque; mais, touot d'même, Phlip est pus solide que nous n'pense et si y fit la r'merque qu'il n'etait pon là pouor s'battre il y en avait deux ou trais qui montrites qu'il portent trejous sus ieux lus bâtons de justice car ils le déshalites!
Marie, tais ta becque et n'en v'la assez pouor annièth.
Ichin fini la preumièthe leçon.
Marie Hibou
17/3/1923
Viyiz étout: