Ch'est mé qu'a hérité d'la job d'écrithe de mon gnollin
Ch'est mé qu'a hérité d'la job d'écrithe de mon gnollin pouor vous amuser un miot et vous dithe chein que tchicques-uns n'voudraient pon vais sus la gazette.
Chu panfêque de boss ramonti les d'grès l'autre sé, tandis que j'tais bein otchuppée à rapiéchir l'morcé de cretonne qui couvre la boîte à oranges qui nous sert de dresseur.
J'vit bein qu'il tait d'une humeur de tchan et y m'effriti tant que j'laissu tchès ma bouaite à snuff! Et savous qu'il eut l'affront d'm'dithe que je l'avais fait exprès pour l'faire êtriver!!
Iou qu'est l'Caouain, qui s'fit?
- Il est au lièt, il a l'flu, que j'ly réponni.
- Ver, l'flu des pièrcheurs, mais y m'faut une colonne de votre gnollin pour remplir la gazette. Arrange té avec ly sinon...
- J'f'rai de man mus, Moussieu pour vos faithe plaisi.
- Ch'n'est pas chunna qui m'faut, mais une colonne de copie.
Ch'est d'même que nous est traité quant y faut gagni sa pouorre bouochie.
Enfin, d'pis que ch'est d'même, oprès aver porté une bollée d'chaudé au Sieur Caouain, qui est d'avis que ch'est chein qui ly fait l'pus de bein, dans la bouteillyie d'encre, j'tempe ma pliume pouor vos raconter tchicques p'tites scènes à ma connaissance.
* * *
L'autre jour, dans la nièt, un Moussieu et sa Dame, bein connus en ville, dormaient bein trantchillement quant notre homme fut réveilli en sursaut par un brait épouvantable. Et ch'tait sa Missis qui avait poussé touot en s'frottant la gambe!
Tout d'abord notre homme criyait que p't'être qu'oulle s'tait teurt l'pid ou que ch'tait la fatigue d'aver trop dansé, mais sa Missis ly dit que ch'tait ly la cause de son mâ!
- Mé, couomment, s'fit notre homme.
- Ver, ch'est té qui m'a douonné touot à l'heure chu coup d'pid. Oh! mais v'la t'y qui m'fait mâ!
Notre homme s'd'mandait tchès que chunna voulait dire quant y s'rappelli tout à coup qu'au moment ou il avait té réveilli, il rêvait qu'il avait surprins une brute qui faisait du mâ à sa catte et l'avait fortement coudepisé! Et ch'est la Missis qui avait reçu chu coup de pid!!
Y s'rappelli éttouot que la séthée de d'vant, en s'n'allant avec sa Missis à West il avait veu un cat écrasé par un moteur et que d'un coup d'pid il avait envièt la carcasse de l'anima dans l'gutter.
Savous qu'il fallut avèr l'docteu pouor soigni Madame, viyant que le lendemain l'arlevée oulle avait l'coup de pied enflié par chu coup d'pid d's'n'homme.
Et pendant trais ou quatre jours oulle resti au lièt par l's ordres du docteu.
Oulle n'cliopine pus acheteu, mais pendant quasi tchinze jours oulle n'sortit pon d'la maison.
Chunna est la pure vérithèt et j'pouorrais vos donner l'nom du docteu qui la soigni, fouai de Marie Hibou.
J'sis quassiment seur que si jamais pareille affaithe ercommencerait, y faudra deux lièts... dans la même chambre, sans doute.
* * *
A St. Ou, il y a de bé droles d'gens qui ont tréjous des r'merques à faithe.
L'autre jour j'en entendis qui s'faisaient: As tu prins avis que Bill n'tait pon au meeting. Ni Dolphus, s'fit l'autre. Tchès que chunna veur dithe? Tchès que t'en pense té.
J'n'sais pon tchès que ces gens en pensaient mais mé j'carais que j'peux lus douonné des explications.
Si ch'est vrai ou non n'v'la qu'est une autre affaithe, car j'n'en sais rein mé même et ch'n'est que des oui dithes.
Un bât de la goule disait que Bill n'alli pas au meeting viyant qu'il tait fort otchuppé à graissi s'n'engin, l'sien qui soullait cachi l'crusher d'la paraisse.
Quant à Dolphus, ch'tait une autre sorte d'job. Il tait à plieumer une poule pouor faithe du bouillon à sa Missis qu'avait l'flu, mais qui achteu est bé mus comme j'sis bein aise de l'dithe.
J'sais bein éttouot qu'il y en ieut un grand dans chutte paraisse qui avait, faut craithe, un rhoumatisme dans les daigts, car j'n'vit pon son nom sus l'papii d'nomination et j'crais pourtant que l'Chantgni alli sièz ly avec chu papi dans sa pouchette.
Tais ta becque, Marie, n'en v'la assez... pouor agnièt!
* * *
Il y a dans une paraisse de l'Est un certain oisé, l'nommé Clieme, j'cré, qui n'est jamais embarrassi siès l's'autres, surtouot lorsqu'il a la gorge secque.
L'autre sé, chut oisé s'rendit sièz des gens de ses amins et y entri d'vant qu'nous l'y dise d'entrer.
A sa grande surprinse, il trouvi l'Monsieu et la Dame, à douormir chacun sus une tchaise. Y s'approchi du Monsieu pouor l'reveilli mais rein n'y fit et Clem d'aller chercher dans l'armoithe deux ou trais d'gouts de whiskey.
Oprès chunna, y chaqui un miot la Missis, mais oulle avait éttouot la maladie du sommeil et p't'être par crainte que ch'tait chein qu'nous appelle une maladie contagieuse, Cliem une autre fais alli chercher la bouteille de whiskey pouor s'donner des forches.
Combein d'fais qu'il s'aidji d'même, j'n'en sais rein!
Caouain
Les Chroniques de Jersey 12/3/1932
Viyiz étout: