À l'âge dé quatre ou chînq ans, j'tais assis sus les d'grés à la p'tite êcole à la Route dé Pont Marquet, en dgettant par la f'nêtre du nord d'la maîson. Missis Benson, nouot' bouonne maitrêsse, avait décidé qué ch't' arlévée-là, i'n'y éthait pas d'léçon – i'n' vaudrait pas la peine d'tâchi d'en faithe - viyant qu' ch'tait l'jour qu'nou mèrque la victouaithe du Royal Air Force à la Batâle d'la Grande Brétangne. Lé solé lithait sus les mielles – dans chu temps-là, i' n'y avait presque pas d'maîsons ni d'boutiques entre la Route dé Pont Marquet et l'aéroport, et à cause dé chenna, j'pouorraîmes vaie l's avions tchi volaient bein bas au d'ssus d'la tèrre d'vant attèrri, et les cheins tchi 'taient rangies sus l'hèrbe. Ch'tait probabliément la preunmié fais qu'j'viyis d's avions à réaction (des 'jets'). Pouor m'régaler acouo pus, quand la journée scolaithe finnit, man péthe m'amm'nit vaie l's avions d'pus près. J'ai gardé les portraits qu' i'fit, et ch'est drôle d'vaie des vaituthes partchies l'long d'la route à l'aéroport, et tout l'monde à lus prom'ner entre l's avions à lus aîse – pas coumme au jour d'aniet quand l's autorités veulent muchi tout driéthe des bouais et des bissons. Nos v'chîn, chînquante ans pus tard, et tchiqu's'uns d'ches mêmes avions sont acouo en êtat d'vol, pouor nos ramémouaither des sacrifices des pilotes – pas seulement d'la Deuxième Dgèrre, mais dans d'aut's bastaudes étout. Et pouor mé, ch'est un êvénement qu' j'attends chaque année auve lé même sens d'excitement qu' à l'âge dé chînq ans!
Tony Scott Warren
Viyiz étout: