Les Pages Jèrriaises

Lé Baby Bouoilli

 

Lé corps d'un p'tit êfant tchi mouothit eune heuthe auprès sa naîssance fut pèrdu et bouoilli auve lé lînge dans un hôpita en Angliétèrre. L'hôpita s'extchûthit pouor la mêprînse.

30/1/2002

Un pouôrre p'tit êfant a 'té lavé hors!
Quand l'hôpita lé fliantchit dans lé lînge,
Tout sîmpliément, nou ouachinnit san corps.
Nou-s'éthait peu l'scrober atout eune brînge!

Ma fé, ch'est încriyâbl'ye! Nou n'peut pon l'craithe!
Nou-s'attendrait miyeu pouor san drein r'pos
Qu'eune machinne à laver. Pas même un suaithe:
I' s'trouvit auve lé sale lînge au bostchot.

Sa sépultuthe n'taient rein pus qu'un cappeur.
Lé p'tit défunt avait 'té bein bouoilli;
Il éthait deu êt' lavé auve des plieurs.
La valeu d'la vie est pus qu'la lav'thie.

 

Geraint Jennings
30/1/2002

 

Viyiz étout:

 

Les Pages Jèrriaises