Bieau qu'i' faîthait eune fraid naithe, à bein près 70 membres eutent lé couothage dé dêhaller pour la rêunion mensuelle, vendrédi, l'23 d'Févri, dans la Salle à Wesley-Grove.
Lé Député A.C. Quérée, Vice-Président, c'menchit par faithe les apologies du Président, l'Sieur H. M. Gibaut, qui n'pouvait pas être là à cause dé maladie, et dit qu'nou' li sou'aitait un prompt rêtablyiss'ment, et fit la beinv'nue ès jannes qui 'taient v'nus pour erciter, Ts nouvieaux membres, et à Mme. Stevens, qui 'tait v'nue pour nos donner un discours.
Lé rapport dé la rêunion du mais d'Décembre passé et l'sien du dîner annuel fûdrent lius et acceptés, et auprès 13 nouvieaux membres et deux junieurs fûdrent êlus.
Les r'citations
La ségrétaithe întroduit les jannes devant qui r'cititent: ch'tait damage qué y en avait tchiqu's-uns d'malade, mais les siens qui prindrent part, Peter Fleury, Michael Lucas, Beryl jéhan, Peter Germain, Helen Perchard, Ruth Amy, Beryl de Gruchy, Kenneth Vibert et Jean Le Maistre, fîdrent tous bein. Y avait eune variêté d'sujets dans les pliéches, et faut espéther qué touos ches jannes ichîn s'en vont continuer à r'citer et à pasler en Jèrriais.
Lé discours
Lé Député Quérée les r'mercyit tous bein et întroduit Mme. Joan Stevens, qui s'n allait nos pasler sus "Les vielles Maiethons d'Jèrri." Mme. Stevens dit qu'oulle avait r'gret dé n'pouver pas nos adressi en Jèrriais, mais oulle en fit un raide succès en Français.
Ch'tait hardi intérêssant d'ouï les difféthents points qui y avait ieu dans la batithie d'maiethons à travers les siéclyes, et parmi ieux de mettre les initiales des gens sus eune pierre à difféthents pliaiches, offuche en d'ssus d'la grand'porte, ou en bas d'la cheum'née. Lé changement d'faichon d's arches avaux l's années 'tait ermertchablye étout, mais la hauteur dé l'entrée avait tréjous resté à 9 pids et la laize à 3 pids. Les vielles montées en pierre 'taient difféthentment pliaichies étout, l's eunes dans la grand' allée et l's autre, en rondissant, dans eune petite "tour" en driéthe.
Y'a eune vielle criyance qué eune f'nêtre auve eune pierre à dêhaller comme eune tablye 'tait fait dé sorte pour pouver mettre du mangi pour les lepeurs.
Les vièrs fours
Mme. Stevens mentionit les vièrs fours, bâtis d'habitude dans l'âtre, et qu'i' y'avait dé bein vielles âtres qu'avaient la Crouaix Sainte dé faite dans iun des pillyièrs d'âtre.
Eune aut' chose întérêssante 'tait les maiethons qu'avaient un bénêtchi dans une muthaille: un point à r'mertchi ichîn est qu'i' n'y a qu'un bénêtchi dans l'êst de l'Ile et qu'touos l's autres sont dans l'ouêst.
Les maiethons du vièr temps 'taient tréjous bâties à fachi l'sud, et bein souvent sans grands fondations, ou même pas du tout: y'en avait avec une doublye-entrée - eune large pour les vaituthes et eune petite à côté pour les piêtos - mais chutte "mode" fut abandonnée viyant qué la grand' arche n'était pon haute assez pour entrer eune chèrge lé travèrs.
Ch'fut bein întérêssant d'ouï touos les difféthents points dans la bâtitithie d'nos anchêtres, qui, faut bein penser, n'avaient autchunnes des c'modités d'nos jours: toutes les grosses pierres 'taient taillies et pitchies à la main et 'taient l'vées et portées en pliaiche à bras par les vièrsmachons ieux-mêmes. Tchi patienche et forche qu'i' lus fallait dans ches temps là!
Plusieurs membres d'mandîtent des tchestchions et Mme Stevens fut tout-d'suite prête à les rêpondre.
R'merciement et annonces
Lé Député Quérée ermercyit Mme. Stevens pour aver si bein prépathé et donné san discours, et pour aver apporté tant d'bieaux portraits qué les membres fudrent bein contents d'vaie auprès.
Lé Députée annoncit la préchaine rêunion comme un dêbat dans la Salle Parouaissiale dé la Trin'té, vendrédi, l'30 dé Mars, à 8 heuthes, et la visite du Proviseu Lechanteur pour mêcredi l'18 d'Avri.
Lé Trêsôryi dit qu'il avait erchu eune souscription par poste sans nom ni adresse avec, et i' s'sait bein content d'saver dé tchi qu'ou veint pour pouver env'yer lé r'chu.
1962
Viyiz étout: