J'vains justement d'vaie vot' gazette
Et j'vé, ma fingre! qu'ou z'en faites
Dé pus d'une sorte en not' Jerri
De d'pis que j'sis hors à viagi.
Y'a un pouorre d'jâtre de Toast au Vin
(En êche yun des siens qui hait l'vin?)
Qu'a deux ou trais rangies d'maîsons;
Ch'la paie aussi bain coumme les fonds.
Mais ou ravez un Inspecteur
Sanitaire qu'a nom... Chose Walkeur
Et qu'a trouvé qu'les maîsonnettes
A G.S.T. n'taient pon trop nettes
La d'sus nou qu'menche à s'entre écrithe
Mais quand ch'est la Loé, n'faut pas rithe;
Ah! G.S.T fallait t'pressi
Tes patent flushers d'arrangi.
Tu n'té s'sais pon trouvé en Cour
Pour être condamné coumme l'autre jour.
Ah! ch'est qu'not Cour peut jouer d'la trique
Quand i' s'agit d'santé publique;
Ou veur que les pouorres locataithes
Piessent joui des drains que nou vein d'faithe.
Pour que certaines... plièches s'saient parfaites
Faut qu'les propriétaithes y mettent
Des "patent flushers, pans and taps"
Des f'nêtres à "ventilating flaps"
Tu l'as apprins, pouorre G.S.T.,
Tu l's'as payis, - en pus des frais!
Mais une bordèes ah j'men r'souvains!
J'taîmes vingt dans une "Cause à Témoins,"
Et quand j'eumes 'té assermentés
J'fumes tous cachis et enfrumés
Dans une grand chambre en attendant
Que not tou' vinsse, petits et grands
Les Avocats n'taient pon pressis
- J'pouvions bain oui lus bourdon'nie.
Quand y'eut une heuthe que j'fumes assis
J'comptimes: Y'en avait sorti six!
Ch'tait d'jèex minutes pour chaque témoin
L's'affaithes dévaient s'faithe ov un soin!
J'en avions là d'dans pour not jour
D'vant qu'les derniers eussent yeu lus tours!
Comprenous you qué j'veur en v'in
En compathant l'cas d'Toast-au-Vin?
J'nose pas êcrithe comment qu'nou fit
Quand j'eumes 'té là, deux heuthes et d'mie,
N'y avait pon "d'patent flushing" là
Ni d'ventilators, rein d'chonna!
Y'avait simpliément une armoèthe
Nou z'ouvre la porte - et, là drièthe,
Ya... un boutchet! O! Cour Royale!
Salle à témoins, qui s'êpelle sale!
Un Jèrriais en viage
Neufchatel, 20/1/1907
| 