Car jé savons qué si not' démeuthe dé sus chutte tèrre est detruite, lé Bouon Dgieu a eune maison pour nous au Ciel, eune maison êtèrnelle tchi n'a pon 'té faite par les mains d' l'homme.
 

Ch'est en tchi j'sommes asseûthés qué si chutte tente dé not' chai est patchie, j'avons un bâtisse du Bouôn Dgieu, eune maîson pon faite par des mains, êtèrnelle au ciel.
 

Dans l'entrétant j'gronnons, en d'sithant êt' habilyis au run dans not' démeuthe au ciel, par cause qué quand j'sommes habilyis, nou n'nos trouv'tha pon nus. Car quandi qué j'sommes dans chutte tente, j'gronnons et j'sommes bâtés, par cause qué jé n'voulons pon êt' d'sabilyis mais êt' habilyis au run dans not' démeuthe au ciel, à seule fîn qu'chein tch'est morté piêsse êt' engaûmé par la vie. Achteu l'chein tchi nos a grée pouor chenna, ch'est l'Bouôn Dgieu tchi nos a bailli l'Esprit coumme eune caution pouor garanti chein tch'est pouor êt'.

Dé même j'avons tréjous d'la confianche et j'savons qu'pouor aussi longtemps qué j'sommes siez nous dans l'corps j'sommes liain du Seigneu. Ch'est en tchi j'vivons par aver la fouai, pon par vaie. J'avons, véthe jé vos l'dis, la confianche et aim'thêmes mus êt' liain du corps et siez l'Seigneu. J'avons don l'întention d'lî pliaithe, si j'sommes siez nous dans l'corps ou liain d'li. Ch'est en tchi j'avons touos nous à compathaît' l'avant au siège dé la jug'gie d'l'Onguenné, à seule fîn qu'châtchun d'nou r'chève chein tchi nos est deu pouor les choses faites en étant dans l'corps, les bouonnes ou les mauvaises.

Viyant don qué j'savons chein tch'est d'craindre lé Seigneu, j'êprouvons d'pèrsuader l's aut'. Chein qué j'sommes est êvident au Bouôn Dgieu et j'espéthe qué ch'est étout êvident à vot' conscienche. Jé n'sommes pon à êprouver d'nos r'quémander à vous acouo eune fais, mais j'vos donnons eune opporteunité d'êt' fièrs en nous, pouor qu'ous piêssêtes rêpondre ès chein tchi sont fièrs dé chein tch'est veu au run d'chein tch'est dans l'tchoeu. Si j'sommes hors dé nous, ch'est pouor l'Bouôn Dgieu, si j'sommes siez nous dans l'bouon esprit, ch'est pouor vous. Ch'est en tchi l'mour dé l'Onguenné nos oblyige, par cause qué j'sommes pèrsuadés qu'iun mouothit pouor tous, et don touos mouothîdrent. Et i' mouothit pouor tous, qu'les cheins tchi vivent né vivent d'aut' pouor ieux-mêmes mais pouor li tchi mouothit pouor ieux et fut souôl'vé acouo eune fais.

Entré-chîn don jé n'considéthons fis d'âme s'lon la chai. Ouaithe qué j'considéthîssions aut'fais l'Onguenné d'chutte manniéthe, jé n'lé faîthons d'aut'. Si autchun est dans l'Onguenné don, il est nouvellement grée: lé vyi est hors, lé nouvé est v'nu! Tout chennechîn veint du Bouôn Dgieu tchi nos r'concilyit auve li par l'Onguenné et nos baillit l'minnistéthe dé l'èrconciliâtion: qué l'Bouôn Dgieu 'tait pouor èrconcilier l'monde à li-même, sans compter les péchés du monde contre ieux. Et i' nos a présenté lé m'sage d'l'èrconciliâtion. J'sommes don l's ambassadeurs dé l'Onguenné. Coumme si l'Bouôn Dgieu 'tait à faithe sén appel atout nous. J'vos supplions au nom d'l'Onguenné: séyiz r'conciliés au Bouôn Dgieu. L'Bouôn Dgieu fit l'chein tchi n'avait pon d'péché pouor dév'nîn l'péché pouor nous, à seule fîn qué j'piêssons en li dév'nîn la justice du Bouôn Dgieu.
 

Jé sommes des embassadeurs dé Christ
 

Car i' dit, "J't'ai êcouté à la bouanne heuthe, et j't'ai aîdgi au jour du salut. Né v'chîn achteu la bouanne heuthe, né v'chîn achteu lé jour du salut.

Ch'est en tchi, viyant qu'j'avons ches promêsses, mes chièrs anmîns, puthifions-nous d'tout chein tch'enteuthe lé corps et l'esprit, en ag'vant not' saint'té par la révéthence du Bouôn Dgieu.

Faites pouor nous du run dans vos tchoeurs. J'n'avons pon fait d'ma à autcheune pèrsonne, ni corrompu autcheune pèrsonne, ni nos avantagi en d'pit d'autcheune pèrsonne. Jé n'di pon chennechîn pouor vos condâmner; j'ai dit d'vant qu'ous êtes dans nos tchoeurs assez pouor qué j'vivthêmes ou mouôrrêmes acanté vous. J'vos ai pâlé bein franchement; j'sis bein fyi d'vous. J'sis hardi encouothagi; dans toutes nos peines, ma jouaie en dêgôle.

Ch'est en tchi quand j'vînmes en Macédouaine, jé n'avêmes pon d'èrpos, mais j'têmes talbâtés à touos les bords - des conflyits en d'houors et des craintes en d'dans. mais l'Bouôn Dgieu tchi souôlage les êtchoeuthés, nos souôlagit atout l'arrivée d'Tite, et pon raîque atout s'n arrivée mais étout atout l'souôlagement qu'ou li'avêtes bailli. I' nos racontit lé d'si qu'ous avez, vot' grande tristesse, vot' gêne pouor mé, et v'là tchi fit ma jouaie pus grande qué janmais.

Même si j'vos avais attristé par ma lettre, j'n'en ai pon d'èrgret. J'avais r'gret, véthe - j'comprends qu'ma lettre vos avait attristé, mais raîque pouor un p'tit brîn - tout coumme j'sis heutheux achteu, pon par cause qu'ou fûdres attristés, mais par cause qué vot' tristesse vos a m'né à la r'pentance. Ch'est en tchi ou vos fûdres attristés coumme lé Bouôn Dgieu en avait l'întention, et don ché n'tait pon nous tchi vos avons fait ma. La tristesse divinne amène la r'pentance tchi mène au salut et n'laîsse pon d'èrgret mais la tristesse du monde amène la mort. Êv'chîn chein qu'la tristesse divinne vos a fait: tchi franchise, tchi vèrtu d'vos justifier, tchil' îndîngnâtion, tchil êffrai, tchi d'si, tchi souain, tchil affit pouor la justice! Sus châque pouaint ou vos êtes atchittés dans ch't' affaithe-chîn. Don même si j'vos êcrivis, ché n'tait ni sus l'accompte du chein tch'avait fait l'ma ni sus l'accompte du chein tch'eut l'ma, mais pus à co pouor qué l'avant au Bouôn Dgieu ou pûssyiz pouor vos-mêmes combein qu'ou nos êtes dêvoués. Par tout chennechîn j'sommes encouothagis. En ajouôtage dé not' propre encouothagement, j'têmes partitchuliéthement heutheurs d'vaie combein qu'Tite 'tait heutheux, par cause qué s'n esprit a 'té rafraîchi par touos vous. J'avais cratchi entouor vous à li, et ou n'm'avez pon laîssi ès êcouettes. Mais justément coumme tout chein qué j'vos dînmes 'tait vrai, not' cra entouor vous à Tite s'est adonné vrai étout. Et s'n affection pouor vous est d'autant mus quand i' s'rappelle qu'ou 'têtes touos obéïssants, et l'èrchûtes auve d'la crainte et d'la trembliéthie. J'sis heutheux d'pouver m'confier compliètement en vous.
 

Lé chein tchi sème tenvrement étha tenvre récolte, mais lé chein tchi sème librement étha bouonne récolte. Ch'est lé chein tchi donne dé bouon tchoeu qué l'Bouon Dgieu aime.
 

Assa l'chein tchi bâle la graine au s'meux et du pain pouor mangi bâdra et haûchitha vot' stôrre dé graine et agranditha l'avoût d'vot' justice.

 

Ch'est pour chutte raîson qué j'mé pliaîs dans la fouaiblièche, dans l's însultes, dans la minsèthe et dans la pérsétchûsion. Ch'est quand j'sis faibl'ye qué j'd'vins fort.

Qu'la grâce du Seigneu Jésû Chri et l'amour du Bouôn Dgieu et la parchonn'nie du Saint Esprit saient acanté touos vous.