J'sommes-t-i' à c'menchi à nos r'quémender acouo? Ou j'avons-t-i' à aver, comme tchiques gens, des letters d'èrquémendâtion à vous ou d'vous? Ous êtes vos-mêmes not' lettre, êcrite sus nos tchoeurs, connue et liue par tout l'monde. Ou mouontrez qu'ous êtes eune lettre dé l'Onguenné, l'rêsultat d'not' minnistéthe, êcrite pon atout d'l'encre mais atout l'esprit du Dgieu vivant, pon sus des tabliettes dé pièrre mais sus des tabliettes du tchoeu humain.
J'avons d'même chutte confianche par l'Onguenné l'avant au Bouôn Dgieu. Ch'n'est pon qué j'sommes compétents en nos-mêmes pouor èrcliâmer autcheune chose pouor nos-mêmes, mais not' compétenche veint du Bouôn Dgieu. I' nos a fait compétent comme les minnistres d'eune nouvelle allianche - pon d'la lettre mais d'l'esprit; ch'est en tchi la lettre tue, mais l'esprit donne la vie.
Achteu si l'minnistéthe tch'apportait la mort, tchi fut gravé en lettres sus d'la pièrre, vînt auve d'la glouaithe, pouor qu'les Israëliens n'pûssent pon fixer la fache dé Moïse par cause dé sa glouaithe, ouaithe qu'ou fûsse pâssante, ch'n'est-i' pon qu'lé minnistéthe dé l'Esprit s'sa même pus glorieux? Si l'minnistéthe tch'apportit la condamnâtion 'tait glorieux, combein pus glorieux qu'est l'minnistéthe tch'apporte la justice! Car chein tchi 'tait glorieux n'a d'aut' dé glouaithe achteu par compathaîson d'auve la glouaithe tchi dêpâsse. Et si chein tchi 'tait pâssant vînt auve d'la glouaithe, combein pus grand qu'est la glouaithe dé chein tchi duthe!
Dé même, viyant qu'j'avons un espé d'ité, j'sommes bein hardis. Jé n'sommes pon coumme Moïse, tchi m'ttait un vouaile sus sa fache à seule fîn d'empêchi l's Israëliens d'vaie la fîn d'chein tchi pâssait. Mais lus esprits 'taient mîns bas, car jusqu'au jour d'aniet chu même vouaile reste quand la vielle allianche est liue. I' n'a pon 'té halé, par cause qu'il est halé raîque dans l'Onguenné. Même jusqu'au jour d'aniet quand Moïse est liu, un vouaile lus couvre lé tchoeu. Mais quand autchun s'touônne envèrs lé Seigneu, l'vouaile est halé. Achteu l'Seigneu est l'Esprit, et où'est qu'est l'Esprit du Seigneu, y'a la libèrté. Et touos nous ès faches dêvouailées, tchi contemplions la glouaithe du Seigneu, j'sommes pouor êt' changis en s'n înmage auve d'la glouaithe tréjous craîssante, tchi veint du Seigneu, tch'est l'Esprit.
Lé Seigneu est sans doute l'Esprit, et où'est qu'est l'Esprit du Seigneu, v'là tch'est la libèrté. Mais touos nous, auve les faches dêcouvèrtes, j'sommes des mitheurs pouor y vaie la glouaithe du Seigneu, et aînchîn j'dév'nons dé glouaithe en glouaithe lé même înmage, et chenna atout l'Esprit du Seigneu.
Viyiz étout: