1976
NOTE DÉ RÉDACTION
Chu deuxième livre par George L'Feuvre êcrit en Langue Jèrriaise peut êt' considéthé comme étant un aut' voleunme dé Jèrri Jadis tchi fut publié en 1973. Nou s'apèrchait, dgia, qué l' cont'nu autobiographique et l'goût sentimental dêhalent pus, et étout qu' la natuthe pus pèrsonnelle dé la matchiéthe donne à l'auteur du louga pouor èrfliéchi entouor la vie Jèrriaise à la fîn du drein siècl'ye et au c'menchement dé ch'tî-chîn quand l'Île marchait acouo gentiment souos l'influence du campangnard, et 'tait annînmée par l'êmigrâtion et l'commèrce à La Côte, dé Gaspé, et l'grand nombre d'fèrmièrs-naviguants tch'en faîthaient partie.
D'autres auteurs, ofûche pus savants, ont êcrit entouor chein tchi s'est pâssé au sujet politique, constitutionnel ou bein d'la louai. Nus n'ont exprînmé - ni même chèrchi à exprînmer - comme l'auteur lé fait dans ses deux livres, la vraie vie du vièr peupl'ye Jèrriais tchi n'peut dgéthe êt' dêcrite comme i' faut, en êffet, sénon dans la langue du pays. Les sentiments, les pensées et les ditons des gens d'la tèrre et des gens d'mé lus trouvent enraichinnés dans chutte langue tch'i' faîthaient sèrvi, véthe, dans ses ditons et ses expressions formés par châque expéthience et chein tchi sortait d'lus traditions. Ouaithe qué v'là tch'applyique pouor tout Jèrri, chu livre a eune valeu à part viyant tch'i' comprend les souv'nîns d'eune pèrsonne tch' est hardi capabl'ye à êcrithe et tch' est en même temps înspithé par un amour et un respé profonds d'la langue Jèrriaise auve tchi i' fut êlevé et tchi continnue jusqu'au jour d'aniet à dominner lé cours dé ses pensées, même qu'eune grand' partie d'sa vie ait 'té pâssée dans l' Améthique du Nord.
I' y'a tant d'tchi dans chu livre tch'est si întînme. La preunmié partie est un chouaix d'articl'yes tch'ont quâthi toutes pathu avaû l's années dans la gâthette Jersey Evening Post souos l'nom d'plieunme dé "George d'La Forge". I' y'a du réel et des r'cits d'crianches d'aut'fais. Ches histouaithes donnent chein tch'était d'conséquenche ichîn, ou d'ailleurs, pouor les gens d'un vaîthinné ou autre. Lé Sieur Lé Feuvre s'èrconnaît trop bein entouor la vie dans les campangnes en Jèrri y'a eune septantaine d'années pouor n'en faithe qué d's extases. I' s'contente d'èrcorder les qualités tchi donnaient, atout la r'ligion, d'la stabilité à la vie, dé faithe ramémouaither ses vèrtus, et d'nouos mouontrer l'attrait sentimental qué chutte vie d'aut'fais èrtcheint pouor li.
Dépis tch' i' faut qu' nou piêsse dévîther d'vant saver êcrithe, la deuxième partie du livre comprend bein à propos eune dgiêthaine dé p'tites pièches dé thiâtre par Lé Feuvre tch'avaient 'té êcrites pouor compétition annuelle à La Séthée Jèrriaise dé l' "Eisteddfod". Châtcheune a gângni un prix, ayant 'té présentée dans un temps ou l'autre. Tout l'travèrs, lé d'vis est chein qué j'connaîssons tous bein-la vèrve, lé va-et-veint du catchet, la rêponse secque ou rîsibl'ye et l'esprit fîn et pointu tchi s'y prête au bésoin, tout ch'la comme i' n' y'a qu' la langue Jèrriaise tchi peut exprînmer.
D'un but à l'autre, chein tch'est êcrit s'accorde auve l'êpelage êtablyi selon lé Dictionnaire Jersiais-Français du Dr. F. Le Maistre.
En présentant chutte publyicâtion - sa quatrième - Le Don Balleine espéthe qué v'là tchi s'en va fourni eune jouissance littéthaithe ès cheins tchi chiéthissent lus vièr dévis d'anchêtres, encouothagi l'întéthêt dans I'Jèrriais pouor les uns et l's aut's tchi n'lé connaîssent pon 'couo, et pis qué v'là tchi s'en va aîdgi à garder et même avanchi l'caractéthe et les distînctions îndividuelles dé l'Île dans un Monde tchi d'veint dé pus en pus prêt à s'conformer à la même chose.
Buy Don Balleine publications on-line from the Société Jersiaise shop.
Achetez les éditions du Don Balleine en ligne à la Société Jersiaise.
Viyiz étout: