Lé deux d'Août 2000 fut l'jour d'la Vîsite Rouoyale à St. Hélyi. Ch'est eune vielle couôteunme tch'a 'té gardé jusqu'ichîn. La Vîsite Rouoyale veint à châque Pâraîsse eune fais touos les siêx ans. Ch'est eune séance d'la Cour Rouoyale tchi siège dans la Pâraîsse pouor înspecter les comptes et touos les livres. Pis la Cour s'met en c'mîn pouor aller vaie les rues d'la Pâraîsse.
Ch't' année, les tabl'yes 'taient mînses en pliaiche dans la Salle d'Assembliée dans la Salle Pârouaîssiale dé St. Hélyi pouor lé Bailli, les Juges et l's officièrs d'la Cour. Y'avaient des tchaîses pouor les membres d'la meunicipalité.
Les membres d'la Cour entrîtent dans la Salle d'Assembliée en procêssion, touos habilyis dans lus robes et lus toques (lus p'tits ronds chapieaux). Auprès les priéthes, l's officièrs d'la Pâraîsse présentîtent les comptes d'la Pâraîsse. Les Juges èrgardîtent les chiffres et d'mandîtent deux-trais tchestchions.
Lé Bailli èrmèrcyit l'Connêtabl'ye pouor lé bouan ordre des comptes et d'mandit au rapporteux d's Înspecteurs des C'mîns combein d'fais par an qu'les înspecteurs înspectent les rues d'la Pâraîsse.
Pis, douze Voyeurs prêtîtent serment et la Cour s'èrtithit pouor ôter lus robes tandis qu'les Voyeurs dêcidîtent par où aller. Mais en fait, l'itinéraithe avait 'té dêcidé en avanche.
Ch'est un problième dé dêcider où'est qu'i' faut aller auve la Cour sus eune Vîsite Rouoyale pa'ce qu'i' y'a des traditions tch'i' faut obsèrver. I' n'est pon pèrmîns d'aller hors d'la Pâraîsse et nou n'dait pon pâsser par lé même c'mîn deux fais. Don, nou n'peut pon èrtouônner sus ses pas. Né v'là tch'est eune diffitchulté!
Chutte fais, j'avons dêcidé tch'i' faut aller r'garder quat' bouais tchi encombrent les rues ou tchi m'nichent dé bliotchi les rues.
Lé Bailli et les Juges lus en allîtent dans lus limousinnes et les membres d'la meunicipalité dans des minibeusses. La preunmié pliaiche à vîsiter 'tait à St. Mark's Road où'est qu'un bouais craîssait par d'ssus la trottouaithe.
Ch'tait eune veue mangnifique dé vaie toute la Cour dans la rue (tchi 'tait compliétement bliotchie par les vaituthes officielles)!
La rue fut m'suthé et l'bouais étout auve les m'suthes officielles. Lé rapporteux des Voyeurs - Mess Gray - explyitchit l'problième à la Cour. Lé Bailli d'mandit l'avis du Protchuleux Général et pis ch'fut l'tou du pus janne Avocat d'la Cour. Ch'est eune vielle tradition qué, si un bouais est m'nichi d'êt' condamné, ch'est l'Avocat tch'a 'té qualifé l'pus récémment tch'a l'travas dé d'fendre lé bouais. À ch't' occâsion ch'fut eune janne femme tch'eut l'honneu dé d'fendre chu pouôrre bouais.
S'n ardgument 'tait qu'lé bouais n'encombrait dgéthe la rue. Au contraithe, ch'tait la rue tch'encombrait l'bouais. Viyant qu'la rue 'tait en Ville, i' s'sait un pitchi d'coper bas chu bouais et ou racontit tchiquechose qu'un Améthitchain avait êcrit: les "banlieues" sont des pliaiches où'est qu'nou-s'abat les bouais et pis nou donne les noms des bouais ès rues. Ch't' èrmèrque avait bein amûthé la Cour.
L'Bailli et les Juges lus en allîtent un mio pus liain par la rue pouor considéther lus vèrdict sus l'bouais. Quand il' èrvîntent lé Bailli annoncit qu'lé bouais a 'te saûvé, mais qu'i' faut trînmer les branques un mio.
Pis nou r'montit dans les vaituthes et les minibeusses et s'en allit à la campangne. Nou montit l'Mont d'la Trinneté et pis s'touônnit au Mont Néron. Dans chutte ruette, i' tait tchestchion d'înspecter trais bouais tchi sembliaient encombrer lé c'mîn.
La ruette fut m'suthée et châque bouais 'tait considéthé s'pathément. Lé preunmié bouais 'tait à maintchi mort et tout couvèrt dé dgèrrue. La Cour jugit qu'i' 'tait nécessaithe dé l'coper bas. Ch'est la couôteunme qué l'bouais condamné est mèrtchi auve eune hache. Un Vîngt'nyi copit lé bouais d'manniéthe formelle à seule fîn dé l'mèrtchi.
Lé Bailli dit, en prononçant l'jugement d'la Cour, qu'il espéthait qu'la Pâraîsse pliant'tait un nouvieau bouais pouor remplaichi l'pouôrre vièr bouais.
Les deux aut's bouais fûtent saûvés viyant qu'i' n'y'avait pon trop d'problième auve l'encombrement du c'mîn. Mais i' 'tait c'mandé qu'i' faut trînmer l'dgèrrue.
Ch'fut là la fîn d'la Vîsite Rouoyale. Lé Connêtabl'ye èrmèrcyit la Cour, et l's officièrs et empliyés d'la Pâraîsse pouor aver travailli si dû pouor faithe un grand succès d'la Vîsite et i' dit qu' la Pâraîsse pliant'tait eune rangie d'bouais au Mont Néron pouor ramémouaither chutte preunmié Vîsite Rouoyale du Millénaithe.
Geraint Jennings
Août 2000
Viyiz étout: