Les Pages Jèrriaises

Nou niolinne dans la tchuîsinne

Dans la tchuîsinne les saûciches chantent
eune arînmée paîvrée;
la moûtarde et la sauce d'la menthe
sont dêsatchies dé vrai.

Lé sé sé sil'ye à san tout seu;
eune tchulyi fait des teurs;
eune câssetrole s'traule avaû l'compteux
pouor chôlier les chou-flieurs.

Les tonmates lus mâtent d'un embron
dé honte à en rouogi;
un couté m'niche un pouôrre ouognon:
coper ou êcopi?

Eune boêtée d'alleunmettes lus saquent
pouor roûssi l'lard feuntchi;
né v'là eune douzaine d'oeux tch'en craquent
dé vaie ch't' êtiboqu'sie.

Des gliaichons g'loque, eune ticlyie bouort,
les êssuie-tâsses niolinnent;
lé fou est fo et s'flianque ho'-l'bord...
Tchi fanne dans la tchuîsinne!

Geraint Jennings

 

Viyiz étout:

 

Les Pages Jèrriaises