J'fus êlevé sus eune fèrme et quand jé m'rappelle dé mes jannes jours j'pense tréjous ès tchians tchi 'taient siez nous. I' pâssaient la journée dans l'bel et i' 'taient touos ieux bouôns d'garde. Mais dans la séthée et la niet i' restaient dans la maîson et 'taient traités comme membres d'la fanmil'ye. Tchi jouaie tch'i' nos donnîtent avaû l's années.
La présence d'un tchian est dév'nu partie d'ma vie et j'avons tréjous ieu iun d'nos anmîns à quat' pattes dans man siez mé. Nos êfants et, à ch't heu not' p'tit-fis, adouothent l's annimaux et pouor ieux la maîson n'est pas compliète sans tchian.
Malheutheusement j'perdînmes not' tchianne dans l'temps d'Noué et j'attendons un rempliaichant. J'mantchons tant la fête d'un tchian quand j'ouvrons la porte en èrvénant siez nous. Qué s'sait tchian d'race ou tchian mêlé, i' sont touos si fidèles.
Ches jours j'avons l'opporteunité dé suivre à la télévision la mouontréthie d'tchians dé Crufts - touos des tchians d'race bein seux! Il' ont 'té bein dréchis en exprès pouor lé moment tch'i' s'trouvent d'vant l'juge. Pouor tchitch'uns i' y'étha succès, pouor d'autres grand d'sappointement. Maîtres et maitrêsses des gângnants s'en rithont siez ieux glorieux; les autres f'thont triste minne sans doute. N'împorte, tch'i' s'rappellent tous qué lé tchian est lé miyeu anmîn de l'homme.
Brian Vibert
Viyiz étout: