Lé mais d'Septembre soulait êt' lé septchième mais dé l'almonnas Romain d'vant qu'les mais d'Juilet et Août y paûtchîssent en honneu d's empéreurs Jules et Aûdguste César. Quand nou-s'y pense, lé neunmétho sept a 'té magique pouor bein des tchultuthes du monde. Not' sémaine a sept jours siêthant la tradition Judéo-Chrêtchienne d'la Bibl'ye tchi dêcrit la criâtion du monde en sept jours, mais d'aut's vielles civilîsâtions ont siévi eune sémaine dé sept jours étout. En Mésopotanmie, nou criyait qu'lé neunmétho sept 'tait malchanceux, et don i' n'fallait pon travailli les septchième, quatorzième, vîngt-tch'ieunième et vîngt-huitchième jours d'la leune. En êffet not' mot "sémaine" veint du Latîn "septimana" - eune septaine.
La ville dé Rome fut fondée sus sept monts (les cheins d'Moscou et d'Sheffield dithent dé même, mais i' faut dithe qu'ch'est au mains sept fais mains împressionnant dans l'cas d'la ville Angliaîche tchi n'est dgéthe ieune des Sept Mèrvelles du Monde).
En pédalant par la Brétangne duthant l'Êté, j'vîsitis la tombe dé Saint Méen, à Saint-Méen-le-Grand. Chu saint-là 'tait iun des cheins tchi vîsitîtent Jèrri pouor nos apporter la pathole dé Dgieu - i' 'tait lé n'veu à Saint Samson et viageait acanté li d'vant fonder un monastéthe en Brétangne. Ch'est en tchi, Samson est iun des Sept Saints Fondateurs dé Brétangne - l's aut's sont les saints Mâlo, Brieuc, Patèrne, Tugdual, Pol, et Corentîn. Historiquement, y'avait sept êvêtchés en Brétangne, mais avaû les siècl'yes nou-s'ajouôtit les cheins d'Rennes et d'Nantes pouor en faithe neuf. Né v'là pouortchi qu'i' y'a neu rîl'yes sus la couleu Brétonne.
Un aut' saint lié auve Jèrri, Saint Marcou, est rapp'lé dans la crianche qu'un septchième mousse d'un septchième mousse a du scîn et l'pouvé dé d'senchorchéler - ch'est un marcou.
Les sept grands péchés sont à êviter, et les sept vents et les sept goûts étout. Chein tchi n'sent pon bouôn est assez pouor înfecter les sept corps d'garde (ou les sept b'lettes). Et mêfi'-ous dé d'pichi un mitheux, v'là tchi veurt dithe la mauvaise chance pouor sept ans.
En Jèrri les cats ont sept vies, au run d'neuf en Angliétèrre. Si ch'est d'la mauvaise chance pouor ieux, ch'est probabl'ye qu'lé lait d'Jèrri est trop riche pouor ieux - mais pas sept fais pus riche!
Viyiz étout: