Et y'eut eune dgèrre au ciel

Et y'eut eune dgèrre au ciel. Miché,
chu grand m'sagi tch'y gardait quart,
griyit ses plians d'ji et d'ajet,
épis gaffit san sâbre d'êpart.

Et l'grand dragon fut pitchi bas
ès houles d'enfé; ses rudes êcrèdes,
êbrétchies, bogsées, fîtent frédas;
tchiyant du copé, gav'lé raide.

Chu vièr sèrpent tch'a nom l'Malîn
fut pilvâtchi par l'ange Miché;
la sainte valeu cârrit san v'lîn,
la putheté clièrgit san mêché.

Ses anges fûdrent pitchis bas auve li;
lus ailes êraînchies, brûlées hors;
et y'eut eune dgèrre; Miché gaffit
san sâbre d'êpart, mînt ses armes d'or.

Geraint Jennings
La Saint Miché 2015