Lé dgiêx-neuf dé Janvyi est la Saint Brélade, et chu jour-là j'pouvons souhaiter eune bouonne fête à toutes les Carpéleuses. Pouortchi qu'les Saint Bréladais sont mênommés des carpéleuses, v'là tch'est un mystéthe. Lé Dictionnaithe suggéthe qué ch'est l'paîsson d'l'êtchusson d'la Pâraisse tch'est s'posé d'èrsemblier à eune carpéleuse, mais pouor dé mé j'ai des doutanches pouor ch't' explyicâtion-là. Ch'est en tchi l's êtchussons des Pâraisses fûdrent înventés pouor la vîsite du Rouai George V, not' Duc, en 1921 - et l'usage des êtchussons n'tait pon hardi d'couôteunme d'vant l's années auprès la Libéthâtion. Ch'est-i' probabl'ye qu'un êtchusson înventé en 1921 éthait înspithé un mênom en Jèrriais? J'crai qu'nânnîn.
Mais pouortchi un paîsson? Assa, la Pâraisse dé Saint Brélade a la pus longue des côtes, auve ses baies, ses hâvres, ses portélets, et nou pouôrrait înmaginner l'împortance d'la pêque et d'la vie des pêtcheurs. Saint Aubîn 'tait la caûchie d'dêpart à la Côte et la pêque dé la mouothue avait fondé des forteunes. Mais nou-fait, ch'n'est pon l'histouaithe d'la Pâraisse tch'avait pêtchi l'sŷmbole si fanmilyi. La pouque sent à paîsson. Ch'est en tchi nou-s'avait, à chein qu'nou dit, adgûss'lé deux saints - Branwalader et Brandan. Saint Brandan l'Navidgant est mus connu qu'not' modeste Branwalader, v'là tch'est l'nom originna d'Brélade, et nou-s'avait prîns l'paîsson à Brandan pouor èrprésenter Branwalader.
Même s'nou-s'est êdgéthé dans ch't' histouaithe d'êtchussons et paîssons, nou trouve des mèrs l'tou d'la côte dé Saint Brélade. La Corbiéthe et l'Île au Dgèrdain ont 'té peintes et photographiés des milles ou des millions d'fais, et Nièrmont présente un contraste, sauvage et bé, endrait la Ville d'l'aut' but d'la Baie d'Saint Aubîn. Y'en a tchi dithent qué la Baie dé Saint Brélade et la pus belle grève dé l'Île. Et mé, j'n'm'en vais pon ardgui aut' chose à la Saint Brélade!
Geraint Jennings
Viyiz étout: