Lé preunmié jour dé Mar, la Fête dé St. Dâvi, i' y'a bein des Gallouais tchi portent un pouothé ou un pipot, et hardi d'bâtisses tchi mouontrent la couleu du Rouoge Dragon; mais tch'est qu'est lé vrai emblième des Gallouais?
Lé pouothé arrivit au Pays d'Galles quand les Romains l'apportîtent ès Îles Britanniques, et il a 'té tchultivé là d'pis deux mille ans. I' fut fait sèrvi dans la tchuîsinne bein seux, mais étout comme méd'cinne pouor dgéthi les maladies et les bliesseûthes, par les d'vîns, et pouor empêchi les vioges.
Les r'cords nos disent qué l'pouothé 'tait fait sèrvi pouor identifier les soudards d' St. Dâvi contre les Saxons, à Crécy par lé Nièr Prînce et pus tard, par les Rouais Tudors d'l'Angliétèrre auvec ses couleurs dé blianc et vèrt.
Pouortant, l'ûsage du pipot sembl'ye être pus modèrne ayant 'té présenté à l'întroduction des Eisteddfodau dé nos jours par les gens tchi voudraient tchiquechose auve mains d'èrtûnfîn et mains vuldgaithe! Mais lé pipot sauvage a existé au Pays d'Galles pouor pus longtemps qué l'pouothé, et lé même mot gallouais (cenhinen) sîngnifie l'pouothé et l'pipot, et la rachinne (en) est l'mot pouor l'originne dé la vie, un être, eune âme ou un prîncipe. Don, i'faut qu'ou décidiez!
Quant au dragon, p't-être un emblième Chinnouais, ch'tait les Romains acouo, i' l'întroduîsîtent comme un êtendard militaithe duthant lus învâsions du pays. Étout, ch'tait l'péthe d'Èrthu, Uthèr Pendragon, lé Chef Dragon, tch'eut la vision d'un rouoge dragon brûlant sé battant contre lé blianc dragon d'l'Angliétèrre. Enfîn, ch'tait Henri VII qui l'încorpouothit dans les Armueûthies Rouoyales (jusqu'à temps qué James I voulit un j'va à seule corne!), mais ch'tait not' Duc (la Reine) tchi lé restaurit comme la couleu nâtionale du pays d'Galles en 1959.
Ralph Nichols. Raffinné par Laurie Huëlin.
Viyiz étout: