Les Pages Jèrriaises

I ritha bain
Tchi ritha drain!

Percy H. tait un malin oèsé
Qu'espéthait réussi à s'estchiver
Dé san service,
Dans la Milice.

George S-n-t, le Vingtn'yi militaithe
Avait biau l'avèrti d'aller l'faithe;
Percy riait blianc
Et fichait l'camp.

I s'nallait, tout d'suite, hors Jerry;
Et pis oprès, Ah bain! cherchiz pour li...
Ou n'lé t'nez pon
Oquo pour bon.

Mais un biau jour, le Protchuleux,
Trouvant chonna pûtôt honteux,
Fit Percy v'nin
D'vant l'Juge Vaudin.

Percy fut qu'si Moussieu Piné
- I savait bein qui lé d'fendrait -
De bain bouan gré,
Par bé, par laid.

Un coup qu'chatchun eut dêcliathé
Chein qui savait sus chu sujet,
L'Juge entendit
P.... lplièdgi.

I présentit une prétention
Disant qu'y'avait dans la tchestchon
De gros point d'droèt
Qui d'vait souol'ver.

Le Juge l'env'yi d'vant la Grand'Cour,
Pour mettre ches points là pus au' jour.
Et v'là Percy
Dévant l'Bailli!

Mais la Grand'Cour, dans sa sagesse,
Vit au travers des p'tites finesses,
Et vos renv'yi
Bein vite Percy.

Et d'même i s'trouvi présentè
Une traisième fais Lundi passè,
Tchi-l-embarras
Pour un' té cas!

Malgré l'talent d'Moussieu Piné
- Tout l'monde sait bein qu'i peut d'viser! -
L'Juge condamni
Moussieu Percy!

"Un louis d'amende, - et enrôlè..."
Malgré tout chein qu'il avait fait
Pour s'estchivé
De faithe san d'vé.

......

Achteu tout l'bain qu'il en étha
Ch'est d'payi l'louis - et s'n Avocat!
Et l'sien qui rit
Ch'n'est pon Percy!

Elie

 

Viyiz étout:

 

Les Pages Jèrriaises