Les Pages Jèrriaises

Bein ritha l'chein tchi ritha l'drein

Tch'est qu'est la rue la pus rîsibl'ye à St. Hélyi? Sans doute, ch'est la Ruette d'la Conmédie, mais pouor tchique raîson nou n'ouait pon hardi d'rithie des gens d'chutte carre d'la Ville. Et v'là tch'est ravissant car i' d'meuthent dans l'vaîthinné du Bâtisse d's Êtats et nou dit tréjous qu'nos Membres d's Êtats sont les pus grandes rîthelées d'l'Île.

À rithe et à badinner nou n'sé câsse pon les dents, s'lon l'vièr diton, et ch'est seux qu'nou n'vait pon bein d'dents câssées dans la Ruette d'la Conmédie. À la télévision, et tchiquefais sus la strade en Jèrri, y'a des conmédgiens à s'mâter d'but tchi f'thont rithe les cats. Assa, ch'est bein comprîns qu'nos p'tits anmîns f'lîns sont des connaîsseurs d'conmédie. Les tchians, ieux, rithent à lus en trilyi la gorge à tout moment - nou lus raconte des bliuettes et i' rouôlent dans l'aithe à tchêne froutchi et à rithe à hahas et à ouah-ouahs.

Mais les cats... les cats êcoutent souongneusement des luthes. S'i' n'y trouvent pon d'amûthement, i' présentent eune fache dé cat-rôti, mais si y'a d'tchi rithe i' c'menchent à ricangni, un ri dans les joues, les lèrmes ès ièrs, jusqu'à ch'qu'i' rithent blianc. Av'-ous veu la rithie d'cats? Nânnîn? Assa, v'là tchi veurt dithe qu'les p'tits bougârrons sont à rithe dé vous en cache-muchon. Les ris, qu'nou dit, mèn'nont à r'tchîngn-cat.

Et les farceurs n'daivent pon oublier: èrgardez d'près l'chein tchi n'rit janmais, épis mêfi'-ous du chein tchi rit tréjous - sustout s'i' y'a eune dgaîngue dé cats dans l'audienche.

Geraint Jennings

 

Viyiz étout:

 

Les Pages Jèrriaises