Seigneu Jésû-Christ, ai pitchi d'mé, un pécheux.

O Seigneur, êcoutes nouos priéthes et prête l'ouïe à nouos cris!

Jésû-Christ est èrsuscité anièt;
Véthe, il est vraiment èrsuscité.

Man Jésû, aîgue-mé à laîssi tchaie mes d'sirs.

Man Maît' et man Dgieu.

Prans-mé dans Tes bras et donne-mé chutte paix qu'chu monde né peut pon donner.

Oh Rédempteux mînséthicordieux, Anmîn et Fréthe,
Qué j'piêssêmes Té connaître pus cliaithement,
T'aimer pus chiéthement,
T'siéthe pus sîncéthement,
À tout janmais. Âmen.

Té, Oh Seigneu, Tu'es auve mé, et j'n'éthai pon d'peux.

Oh Dgieu, arrouôse-mé dé Ta Grâce.

Oh Seigneu, n'mé laîsse pon.

Glouaithe à Té, Oh Seigneu, glouaithe à Té.

Christ est êl'vé des morts,
Pilvâchant la mort par la mort,
Et donnant la vie ès cheins ès tombes.

Saint Dgieu,
Saint Piêssant,
Saint Înmortel,
Ai pitchi d'nous.

Oh Seigneu, j'prions pouor not' pétit pays et pouor toutes ses gens, pouor les cheins tchi sont siez nous et pouor les cheins tchi achteu sont hors.

Ramémouaithant not' toute sainte, toute puthe, toute bénie et glorieuse Danme, Mathie, Méthe dé Dgieu et tréjous Vièrge, auve touos les saints, dêdions-nous nos-mêmes, les iuns et l's aut's, et toute not' vie à Christ not' Dgieu.

Qu'la grâce dé not' Seigneu Jésû-Chri, et l'amour dé Dgieu, et la c'meunion du Saint Esprit saient acanté touos nous à tout janmais
 

Qu'la paix du Bouôn Dgieu tchi dêpâsse tout avis garde vos tchoeurs et vos esprits dans la connaîssance et dans l'amour du Bouôn Dgieu et d'san Fis Jésû-Chri, not' Seigneu; et la bénédiction du Dgieu Tout-Piêssant, l'Péthe, lé Fis, et l'Saint Esprit, sait parmi vous et reste tréjous acanté vous.

 

J'sommes v'nus ensembl'ye comme la fanmil'ye dé Dgieu dans la présence dé not' Péthe pouor li'offri nos louanges et nos r'mèrcîments, pouor êcouter et r'chéver sa Pathole, pouor lî donner les bésouains du monde, pouor lî d'mander pardon pouor nos péchés, pouor chèrchi sa grâce et par san Fis Jésû-Chri d'nos offri à san sèrvice.

 

Notre Péthe Tout-Piêssant, j'Té d'mandons d'aver pitchi sus nous pa'ce qué j'avons transgressé tes saints c'mandements et j'n'avons pon fait les choses qué j'dévthions aver fait; et j'avons fait les siennes qué jé n'dévthions pon aver fait. Bouân Dgieu, pardonne ches'-là tchi confêssent lus fautes et fai grâce à ches'-là tchi sé r'pentissent suivant tes promêsses faites au genre humain, en Jésû-Chri, nouotre Seigneur. Et accorde-nous, Péthe très mînséthicordieux, pouor sén amour, qu'à l'av'nîn, j'pouôrrons vivre sobrément, bouonnement et r'ligieusement, à la glouaithe dé Tan Nom Saint. Âmen.

 

Dgieu Tout-Piêssant, accorde à tan peupl'ye, tan pardon et ta paix, à seule fîn qué j'séyons purifiés dé touos nos péchés et qué j'piêssons T'sèrvi aniet en trantchilité d'esprit, et j'Té d'mandons au Nom d'nouotre Sauveur, Jésû-Chri. Âmen.

 

Prions Dgieu.
J'T'èrmèrcions pouor tout qu'Tu nos donne châque jour... la paix et la bieauté d'nos alentours... not' libèrté... nos fanmil'yes, nos anmîns... not' mangi et not' siez-nous... oh! Qué Tu nos es bouôn! Accepte nos louanges et not' adouothâtion. Achteu j'prions pouor tous tchi sont en troubl'ye aniet. J'té d'mandons pouor ta grâce sus les cheins qué j'connaîssons tchi sont malades siez ieux ou à l'hôpita - sus les cheins tchi sont en dgèrre et souos la crainte du terrorisme - sus les milles et milles èrfugiés tchi sont sans mangi, sans habits, sans d'meuthe et dans bein des cas tch'ont pèrdu des membres dé lus fanmil'ye. donne à châtchun lé confort et l'couothage et qu'les cheins tchi sont là pouor lus aîdgi aient la compâssion dé Jésû-Chri. Seigneur, Prînce dé la Paix, amène Ta paix et où'est qu'i' y'a haine Tén amour et où'est qu'i' y'a m'sespé Tén espé. J'prions en Tan nom béni. Âmen.