Moussieu l'Editeu
Ch'est avec grand pliaisi que j'vos souhaitons une bouonne année, la Merrienne et mé. J'eûmes un raide bouon Nouë, et si la bouonnefemme eut à m'aidgi à ramonté les d'grès quand je r'vinmes pâssé miniet, comme y'en a tch'y voudraient dithe, chenna n'les concerne pas. Après tout, je n's'y pas tout jeune, et si mes vieilles gambes qu'menchent à donné par bordée.
Ach'teu, Moussieu, il est tchéstchon de pensé à chein tchi pouôrrait s'arrivé dans l'année tchi qu'menche dans un jour ou deux. La Merrienne et mé j'en avons dêjà pâslé, et j'avons décidé de faithe tchiques predictions, sans voulé dithe que n'y'étha pas tchiques mêprinses, mais éspéthant quand même, que n'y'en étha pas trop.
A qu'menchi, j'avons prédit une raide bouonne saison d'patates, car y'a yeu tout-plien d'mouoillêtuthe d'vant Nouë, et la terre est en parfait condition. Il est vrai qu'ma s'menche est prèsque trop gérmée, mais en pliantant d'bouonne heuthe, nou pouôrra s'graie. J'ai même idée de plianté la bordeuse dans l'gardin dans deux ou trais s'maines, si l'temps reste doux comme il a tait chais drain.
La Merrienne a p't'être raison quand ou dit que si les férmiers font des sous sûs lûs patates, fiche du restant. J'ai biau l'y dithe que les tourists dêpensent hardi d'monnaie dans l'île, mais ou maintchein que dans l'temps d'san gran'pèthe, n'y'avait qu'les patates tch'empêchaient Jêrri d'faithe banq'route, ch'est vrai asséz.
J'éthais voulu prédithe étout une bouonne année pour les tchultivateurs de tomates, mais la Merrienne n'voulit pas en ouï pâslé. "Les tomates," ou dit, "ch'n'est pas du férmage, mais un spétchulâtion, et quand nou spétchule nous est présque seux de brûlé ses daigts tchique jour. Sinon pour les fichues tomates, la têrre ne s'sait pas au prix qu'oulle est."
J'avons prédit une année quand les bêtes pâss'sont mûs, car dans l'êtablye j'ai trais g'niches tch'ont assez belles mine, et tchi pouôrraient faithe pour le show des Trais Pâraisses. Si par chance j'pouvais en vendre yunne ou deux, j'pouôrrais donné tchiquechose à man marchand et allé en ville sans avé peux d'rencontré l'gérant d'la banque.
J'avons prédit qu'y'étha hardi d'brit dans l's'Etats, et que d'vant long notre Député s'sa sûs trais ou quatre comites, autrement n'y'étha pas d'paix. J'avons prédit que l'Comité des Finances pouôrrait s'trouvé en embarrass quand y s'sa tchéstchon de faithe fache ès frais du Comité d'la Santé Publyique, et que l'Comité d'la D'fense de l'Ile éthont bétôt à supplyié la Providence de lûs suggéthé tchique manièthe de lûs dêfaithe du Sénateur John Le Mérquand.
La Merrienne a prédit qu'à Saint-Ou tchiques vieilles fillyes, tch'avaient prèsque abandonné éspéthance trouv'thont d's'hommes dans l'couothant d'l'année. Oulle a voulu dithe étout, que dans la pâraisse, par chein qu'oulle a veu dans ses prom'nades, y'étha des naissances en mâsse, et que l'Recteur étha des bâptemes sans nombre. Quant à chonna, Moussieu, je n'm'en mêle pas, mais la bouonnefemme y vait cliait, et ch'est p't'être vrai.
Oulle éthait voulut prédithe étout que y'éthait trais vacances pour Sénateur d'vant Nouë tchi veint, mais je m'y'oppôsit, car je n'voudrais pas faithe peux à autchun d'chais mêssieux. Avec chonna, ch'est p't'être vrai.
J'sommes d'accord que ch't'êté y'étha pûs d'hardélles prèsque nues du bord du Piémont, et qu'nos jeunes garçons s'trouv'thont là par affaithe avec lûs moteur-bikes touos les Sam'dis au sé. Et j'avons dans l'idée touos les deux que pûs d'un homme mathié n'ditha pas tréjous la véthité à sa femme quand ou voudra savé ouèsqu y s'en va tout changi, après l'tais. Criyous qu'ch'est vrai, Moussieu?
Ach'teu, Moussieu, chein tchi nos reste ch'est d'souhaité à vous et ès vôtres bouonne santé et toute prospéthité dans la Nouvelle Année.
Ph'lip.
1955
Viyiz étout: