Les Pages Jèrriaises

Des lédgeunmes organniques

 

 

Né v'chîn eune boêtée d'lédgeunmes organniques.
Ch'est tout ch'qu'i'y'a d'bouôn pouor l'envithonnement.
Jé n'les acate ni dans tchique p'tite boutique
Ni dans l'supèrmarchi, mais nou les vend

Drait dé d'dans l'clios. N'y'a rein d'miyeur, jé crais,
Qu'un bieau présent tchi veint drait d'la natuthe.
Les lédgeunmes sont tchultivées sans engrais
Artificiel, et nou dit tch'i' sont puthes.

Ch'est qu'nou-s'êprouve dé netti toutes les tèrres,
D'saûver not' ieau, dé protégi not' pays.
Les lédgeunmes veues dans les supèrmarchièrs
N'valent vraînment pon la maintchi d'chutte boêtée.

Ch'est bein aîsi d'èrchéver châque sémaine
Eune telle boêtée plieinne dé lédgeunmes d'nos clios,
Et s'i' n'sont pon trop belles - véthe, i' sont plieinnes
D'bouônté et d'goût. Est-che vraînment d'mander trop?

Mais tch'est qu'i'y'a dans chutte boête organnique?
Y'a des patates, d'la bette et même des tchoeurs,
Des courgettes et des piments exotiques,
Tchiques ouongnons et cârottes. Ch'est tout ch'qu'nou veurt!

 

Geraint Jennings
Juîn 2000

 

Viyiz étout:

 

Les Pages Jèrriaises