Not discours a cés sé se concerne envers les travaux d'l'Association Jerriaise des Gens d'lés Bouais'sies tchi sonts engagis a plianté alentou de 5,000-7,000 bouais et arbustes autou d'l'île chaque année, auve responsibilité pour maint'nin et d'meuni un rote d'écolage envers lus travaux.
Deux d'les projets entreprins ch't'année sonts une entendue d'natûthe pour le centre d'education a l'Asile d'Animaux, et la pliant'tie d'bouais et arbustes pour l'avantage de la population d'êtchutheus au Boul'lay. L'Association prend grand soin dans lus chouaix d'bouais et comme de raison, preference est donner es bouais tchi sonts connus d'lus etablyi auve aiseté dans l'ile. Quouaiqu' ch'la a appathence de restricté le chouaix, l'a un pièssant lot de bouais connus en Jèrri, et ne v'chin une selection.
Le Tchêne est originnithe a Jèrri. Les r'cords d'Eglyise inditche qu'et tchêne 'tait present dans les temps Normands et un examplye tchi s'trouve a l'Eglyise de St Brelade tch'est probabliement le pus ancien est penser d'avait exister pour 250 ans.
Le Tchêne connu comme iun des pus commun des bouais'sies, offre le drouait d'panage, ch'est a dithe, le drouait d'mettre les couochons a pâtuthe des nouvelles tchênelles, etait une ancienne couoteunme bein connue dans l'ile.
Auve ses niers bourgeons, le Frene est iun des pus aisi a r'connaitre dans les mais d'hiver, et dans l'temps passé ses fielles servais comme er. miede pour rhonmatisses. Les rachinnes fibreuses ayant une reputation d'gourmandise afferme le diton suivant: 'I vaut mus pour un homme d'aver un piercheux dans son ménage, qu'un Frène sus s'n'héthitage'.
Ch'nest pas connu pour seux si l'Fau a exister en solitude en Jèrri, mais certainement la majorité onts 'tait pliantées, les uns individuellement, d'autres en groupes comme existe dans les Bouais'sies de St Cath'rinne, et etout en bantchies.
La belle av'nue d'Faux vis-a-vis d'l'école de St Sauveu a souffert a long d's'années, les uns onts disparu a cause de s'ecrèche, tandis q'd'autres futes abbatues duthant l'otchupation pour fourni des s'melles de chabots.
Le Chât'nyi 'tait un bouais bein connu dûthant l'dernier sie'cl'y mais malheutheusement hardi futes abattues duthant l'otchupation pour fourni cauffage, quouaiqu'le bouais brule malement. Les nouaix d'châtaines sonts grosses assez pour rôti, et sonts aguenées auve ardeur par les gens et êtchutheus.
Le Vert Tchêne se trou. ve souvent en craituthe auprés des maisons, actuellement 'les Chenes' comme nom d'maison signifie souvent que ch'éspèce de bouais, est dans l'enrond.
Des brousses chetive craissont sus les falaises et ilets ont probabliement 'tait parsemées par les ouaiseaux.
Quand l'ile fut incliue dûthant les seize et dgiex-septieme siècles, et les gardins d'pommes c'mmenchites a lus etablyi, des greffes d'Orme arrivites d'la France auve la marchandise pour la fais'sie d'cidre. Un coup pliantées ches bouais 'taits ébrantchis tuous les deux ou trais ans en orde de reduithe l'ombre.
D'pis 1970, et l's'années suivantes, Jèrri a perdu par-dessus 300,000 bouais a la maladie 'Dutch Elm', et un programme de pliantage a 'tait entreprins pour rempliaichi les Ormes auve d'autes varietées. Parfenée l'tout d'l'ile, la Blianche Epingne pliantée en bantchie a servi comme cope vent pour plusieurs sièclyes. Dans l'temps passé l'Epingne servai pour cauffer les fous a pain, parce-qui donner un amidget delicieux.
Des bantchis d'Nèthe Epingne offre un portrait superbe auve lus blianches meurs au r'nouvé, meme devant l' appathence d'lus fieilles, et au S'tembre i sonts couvertes de bliues preunelles tchi fonts un bouon beverage, 'le dginne de preunelles' comme j'l'app'lons.
L'Epingne est l'anchetre du preunyi.
Des nouaix a l'abondance de Cordriyi lus sonts decouvertes dans l'tchèrbon d'terre dans la Baie d'St Ouën, et au d'ssus des travaux d'Gaz dans Tunnell Street a St Hélie prouvant tchi sonts natifs de l'ile.
Le Seu est divèrsement bein connu l'travers de l'ile, et dans l'temps passe les meurs du Seu servais comme ermiede pour l'enfliammation des paûpièthes. Duthant l'otchupation les cérises du Seu lus vendaits au marchi pour un chelin la livre.
Qououaqu' le Meilyi n'est pas considether originnithen a Jèrri, i peut etre trouver dans certaines contrées, sustout dans la Bouais'sie d'St Cath'rinne, et a La Saie, les fruits sonts mangeabl'ye seulement quand bein meuses.
Dans les viers temps, du Geon 'tait hardi important pour l'economie d'l'ile, et servaicomme cauffage pour le Fou a Pain et nouorrituthe pour chevaux. Des réglyes sévèthe existées pour la craituthe sus les c'meunes.
Julia Meldrum
Viyiz étout: