Bouônjour
Bouônjour Robin
Tch'est qu'est vot' nom?
Man nom est Enid de Gruchy
Où'est qu'ou d'meuthêtes 1939-1945?
Jé d'meuthais dans la pâraisse dé Saint Louothains mais j'fus née duthant la dgèrre dans 1941 et j'd'meuthis là jusqu'en 1945
Coumme tchi qu'i' 'tait, l'vaîthinné à chu temps-là?
Ch'tait tout des campangnards dans l'vaîsinné et i' 'taient presqué tous des fèrmièrs.
Tch'est qu'i' 'tait l'mêtchi à vot' fanmil'ye à chu temps-là?
Man péthe 'tait un fèrmyi.
Quand tchi qu'ou 'têtes la pus êffritée?
J'tais êffritée quand j'viyais l's Allemands... quand j'ouïyais l's avions qui volaient par-d'ssus et j'tais êffritée quand j'viyais l's Allemands sus lus motorbikes.
Quand tchi qu'ou 'têtes la pus heutheuse?
Quand j'tais auvec ma fanmil'ye.
Quand tchi qu'ou 'têtes la pus excitée?
Eune aut' fais quand j'tais auvec ma fanmil'ye
Quand tchi qu'ou 'têtes la pus triste?
J'tais triste quand man péthe fut prîns prisonnyi auvec l's Allemands... et i' fut prîns prisonnyi car il avait aîdgi à un janne prisonnyi... un janne Russe, et i' vînt à la maîson eune séthée quand i' faîsait niet, pâssé curfew, pouor d'mander s'i' pouvait mangi des suidiches tchi 'taient dans l'bel pouor les vaques. Il avait à bein près quatorze ans et i' 'tait divèrsément p'tit pouor s'n âge. I' n'avait pon ieu d'la bouonne nouortuthe et man péthe lî dit d'aller dans l'êtabl'ye et qu'i' s'n'allait li'apporter tchiquechose pouor li à mangi. Et i' dit à ma méthe dé lî faithe eune beurrée et i' lî portit sa beurrée dans l'êtabl'ye. I' 'tait si content qué quand la dgèrre finnit, qu'il' étaient à marchi jusqu'au... à West Park, qué i' sortit hors d'la lîngne auvec ses canmarades et i' vînt dithe mèrcie à ma fanmil'ye pouor lî'aver saûvé la vie.
Quand tchi qu'ou 'têtes la pus pauvre?
Coumme un êfant ché n'tait pon êvident qué j'têmes pauvres - bein seux j'n'avêmes pon d'soulièrs et j'm'rappelle bein qué man péthe soulait collecter des vièrs tchuyaux pouor èrgraie nos soulièrs mais nou n'pouvait pon acater d's habits ni des soulièrs.
Quand tchi qu'ou 'têtes la pus riche?
Quand j'tais auvec ma fanmil'ye et qué j'têmes à la tabl'ye et qu'j'avêmes tchiquechose à mangi
Tch'est qu'i' 'tait l'temps l'pus êtrange?
Dé vaie l's Allemands partout et bein seux les sou... tous les soudards Allemands mais jé n'savais pas autcheune chose difféthente car j'avais 'té née duthant la dgèrre.
Mèrcie et à bétôt.
Mèrcie et à bétôt étout.
Viyiz étout: