Touos les jours ou pouvez m'vaie, mais deux fais par jour ou pouvez examinner ma tchuîsinne, man parleux et m'n aître à couochi. Et s'ous êtes lâssés ou pouvez vos r'poser sus man liet, des milles pèrsonnes l'ont fait.
J'ai un bieau gardîn; i'y'a du rotchi sus tchi qu'ou pouvez vos assiéthe. Ch'est l'pus au-fait ouvriyi qui l'a arrangi. Y'a des flieurs d'êté et d'hivé, touos les jours j'ai l'soin dé l's arroûser, mais j'fais tout l'monde scoder quand j'sis à arroûser.
S'ou voulez étout au pouvez vos couochi sus l'gravi - deux fais par jour il est râtelé, ch'est mangnifique au solé. Si tchiquefais il en restait un p'tit betchet au but du gardîn oui n'est pas râtelé, dans eune dgiêxaine dé jours, èrpâssez. Ou vèrrez coumme tout r'étha changi. S'ou n'voulez pas vos couochi sus l'gravi, ni même sus l'hèrbi, viyons: y'a occouo l'sablion qué l's êfants aiment tant, avec lus pelles et boutchets, il' ont lus tchoeu pliein d'jouaie.
J'ai eune licence et à l'heuthe dite, j'clios - j'ai d's extensions dé temps en temps. Mais quand veint l'heuthe il faut qu'tout cliérgisse.
Si même lé Connêtabl'ye v'nait m'supplier d'arrêter, j'l 'enviêthais à s'promener; j'lî dirais « ni pour vous ni pour lé Rouai, jé n'lé f'rai." Et j'lî dirais étout: "Vos pliaît-i' filer ou bein j'm'en vais vos entraîner".
La sèrcl'ye d'dans man gardîn, et l'râtelage du gravi, j'envyie tout au pliein, janmais pèrsonne n'ont êprouvé à m'n empêchi, il' ont tous peux d'mé, janmais jé n'laîsse un homme mé c'mander. Et tandi qué j'vivrai j'garderai man siez-mé.
Quand j'sis calme et d'bouanne heunmeur, tout l'monde disent: "est-alle belle!" Mais quand j'sis aigrie il n'fait nu alentou d'mé; j'tap'sais n'y'a pas d'soin contre tchi, quand ch's'sait contre un rotchi.Les gens ont peux d'mé, j'les fais lus cârrer. N'y'a pas un chent'nyi en Jèrri qu'os'sait m'empouongni, quand même qu'il érait eune frouque auve li. J'ai touânné les sangs à des chents.
Et quand même qué j'veinge tellement aigrie n'y'en a pas ieun tchi dit: "j'pouvons nos graie sans lyi." J'maintcheins la vie à des millions d'êtres. J'vos garantis qu'à bein des pièches j'lus ai sauvé la vie; sans mé i' s'raient morts de faim, et occouo i' m'critiqu'raient bein, malgré qué j'fournisse des chents tonnieaux d'paîsson touos l's ans pour vos marchièrs - gratis. Et j'transporte des millions d'pèrsonnes touos l's ans d'pays en pays sans janmais lus chèrgi seulement un dényi. À des milles pèrsonnes j'ai donné des bains, mais janmais jé n'lus ai chèrgi rein. Ou dévraîtes don, m'admirer et dithe; "Tch'est qu'jé f'raîmes sans té?"
Viyiz étout: