Chés Clifford Laisney tch'a l'pliaisi acquo une fais d'vos addrèchi aniet Samedi l'13 d'avri 2002. Deja quat'mais sonts passées d'pris ma dernier présentation d'la lettre jerriaise tchi 'tait l'23 d'Decembre. Comme tchi qu'el l'temps s'passe.
J'avons rejui d'un hiver hardi calme, pas d'tempete, ni glée, ni aûtchun signe de né, et toutes herbages et recoltes sonts par d'ichin bein avanchies pour la saison. Le vier diton, 'Mars entronts comme un agneau sortitha comme un lion', na pas ieu la cont'nanche du vier proverbe si bein connu.
Malré q'lés trais premier mais d'2002 onts passé asez trant'chille dans not contrée du monde, la même chose peut pas s'dithe des evenements dans les pays Asiatique ou'est dgerre continue sans abatement. Dgieu sait tchi setha l'resûltat du conflit dans les pays d'Afghanistan ou'eth la dgerre continue sans aûtchun signe de cessement. Les pays d'Israël et Palestine continusent aggressivement en conflit en orde de determiner les frontieres d'lus pays. Ch'est si tragique quand nou realise que deux pays auve une telle historique de Christianité peuve pas accorder. La pliaiche de naissance de Jesus, les miracles tch'il accomplyi en Jerusalem. Pas satisfé d'la bieauté d'ches pays l'homme persiste d'explioter d'une Manniethe égoiste en orde d'accomplyi son d'si d'gourdmandise.
Pus prés d'siez nous, en Anglieterre et même dans not ile de Jerri, j'n'éccapons pas d'la mauvais'tchi tch'existe envers les malfaiteurs. J'liaisons sus les gazettes comme tchi qu'chés dev'nu common d'voler vetûthes, maisons etc, a coup d'fusi, sans autchunne consideration pour vie. Même ichin en Jerri ch'n'est pas en suth'té que nou peut marchi les rues d'la ville au sé. A tchi point qu'j'allons arrivé d'vant qu'lés autorités realise tchi'n seule punition pour chés vauriens tchi cherche a faithe rein q'ue du d'gas parmi la civilisation. J'crai qu' l'temps est pus qu'échu d'ram'ner l'usage de la fouette.
La fanmillye Royale continue a faithe les lignes en tête sus les gazettes, radio et television. Comme la majorité d'fanmillyes, ils onts lus problemes. Personne, ni riche ni pauvre sonts exémples des tribulations d'mènage tchi lus presentes entre fanmillyes. Ch't'année la Reine Elizabé s'en va celebrer cinquante années sus la trône. Ch'tait a l'age de vingt siez ans tch'ou prints sèrment d'ascension suivant la mort de son pêthe George siezieme. Oulle a regni d'un air exemplaithe souos circomstances souvent tensif. Ch'est malheutheux qu'au debut de ch't'année, son Jubilé Doré, oulle a ieu la malforteune de perde sa soeur, la Princesse Marguerite, et sa méthe, la Reine Mêthe. Ayant atteint l'age de chent iun a sa mort, lá Reine_Mêthe a vétchu dans un temps de grands changements. Ch'tait sus l'jour de son quatorzieme jour de naissance que la premié dgerre fût décliathée. Si l'Rouai Edouard huitiême n'avait pas abdiquer d'la trône en 1936, ou n'aithait janmais ieu l'opportunité de dev'nin reine épouse. Auve le Rouai George VI, et les deux princesses i fûtes en residence au Palais d'Buckingham tout l'travers d'la dgerre, même quand une bombe s'abaissi sus pignon du palais.
La Reine_Mêthe devint veuve en 1952, suivant quatorze années comme reine épouse. Ch'est une danme tch'a condit une vie auve hardi d'respé d'son peuplye. I'un d'ses grands intethête 'tait d'fréquenter les courses d'ch'vaux, et même jusqu'a la fin ou r'rrentait grand intêthet dans l'sport. Auve le rouai, ou payi une visite en Jerri toute suite suivant la cessation d'lá dgerre, et dans l's'années suivantes oulle a visiter l's'iles plusieurs fais.
Dûthant les dreins tchinze jours le peuplye a demonstré s'n'amètchi a une danme par excellence. Je rejouaissons en nos pensées et memouaithes de sa longue vie.
J'voudrais vos faithe rammemououther du Service Annuel tch'autha lieu Dinmanche le 28 a'avri a l'Eglyse d'la Trin'nté, c'mmenchant a trais heuthes. J'espethons d'vos y vaie.
Veronica m'joins en r'mercions tuous l's'am'nins tchi nos ont supporter par lus priethes et renseignments dûthant son temps d'maladie. Je sommes erconnaissons a Dgieu tchi nos a souôtchein sus la route a tuous temps.
Mercie pour vôt attention et intêthet d'ecouter la lettre jerriaise. J'vos souhaite a tous l'bonjour espethants qu'ou rejouiss'saits d'une pouonne semaine.
A LA PRECHAINE..
Clifford Laisney
Viyiz étout: