Dinmanche le 6 d'Aout l'année 2000, et ch'est auve pliaisi que Clifford Laisney vos presente la Lettre Jerriaise.
Nos v'la arrivée a la saison d'vacances, les enfants onts tchitter lus etudes pour au mains siex s'm'naines, en bein des cas causant aggravation parmi lus pathents au sujet d'utiliser lus temps d'une manniethe acceptablye. Pas d'embarras dans l'temps d'écolage d'la majorité d'mes ecouteurs a matin. Y'avait trejous des tâches a faithe, sustout les mousses de fermiers. Vos en r'app'lous au c'mmenchement des vacances quand nou 'tait enviées au clios, frouque a la main et fallait aloppiner les rangies d'vignes secques et auprés les cherghi sus l'hernais en orde d'augmenter la mais d'fumi, et pus tard quand v'nait l'mais d'Octobre tout 'tait r'transporter sus l'clios en orde de fourni graissage pour la prechaine recolte de patates. Et toup fait a la main!
Suivant l'cliergissement d'vignes, pepée v'nait auve le ch'va et l's'herches, et ch'tait les mousses tchi passaits lus temps acquo une fais a glianer les patates tch'avaits resté suivant la frouque. Dans chés temps la, si j'me rappelle, les étés etaits caud, la terre comme d'la poussiethe, et nou s'en v'nait pus qu' angniées d'glianer chés minserablye patates. Tch'il excitement d'etre en vacances de l'ecole. Enfin y'avait trejous une evenement de tchi qu'nou's attendait fête. Ch'tait l'thée d'l'Ecole du Dinmanche.
Tch'il excitement quand nou s'rencontrer a la chapelle de vaie une douzaine de vainnes, l'att'lage des ch'vaux brilliants suivant d's'heuthes de polissage par le cocheur si ordgilleux d'son etchippage. Ayant monter dans une vanne, tch'il excitation d'vaie les banderoles fiottant dans la brise, et temps en temps les vaie perdues dans les bouaisie. Une fais arrivées au chouaix d'destination, normalement la grêve, ch'tait temps d'prendre part dans les gammes organisées par les maitres de l'école. Le pus actif portrait chance d'aguener tchique penîns, quouaiqu'a touos gagnons ou pas, 'taits récompensées pour lus efforts. Auprés aver bruler gentiment d'ènérgie, i 'tait temps de s'attrouper ensemblye dans la salle en orde de participer dans toutes sortes de d'licatesses tch'avaits 'tait prepathées par les maitresses. Y'avait d'la gelée, crème, sannouiches de jambon, fromage, et toutes sortes de gachin'nie. TCHI FRICOT!
Ayant passer une bouonne arlevée, les adultes aussi bein qu'lés mousses dev'naits excitées sus la route d'ertou. Y'avait d'la chant'tie et toute sorte d'révillion. Ch'tait une compagnie bein lassée tchi ertourner au point d'depart. OH. Comme tchi que j'voudrais r'touonner l'holouoge une soixantaine d'années pour ervivre chés bouons temps! Si nou s'etait comporter dûthant les vacances, mêthe arrangé trejous un picnique au bord la mé acquo une fait ch'tait excitant d'pouver barbotter ses pids dans la mé si fraiche. Quand j'taits mousse, l'argent d'pouchette 'tait une chose presque inconnue. Si pepée avait fait une bouonne saison, y'avait trejous la chance d'erchevait que-se fusse une montre ou p'tetre une bike, une chose que nou soigner auve ordgi.
Tout a changi aujourd'aniet, les enfants appathe d'avait autchune-chose tchi lus pliaits, en hardi d'cas i sont gatées. En sont ti d'mus?
J'avons touts souffert d'la deminse d'la s'm'naine passée quand iun des avions considether le pus sauf, le Concorde, a ecliater en l'air auve la perte de 115 vies. Ch'est impossiblye de s'imaginé les pensées et souffrances des passagiers quand i réalisites la sévérité du dangi l'tou d'ieux. Nos pensées reste auve les membres d'fanmillyes de chés gens aspirant d'joui d'une vacance excitante et pienne d'aventûthe. Ch'est érmerquablye comme tchi la vie peut s'abrupté sans autchunne dgernissement.
J'liet dans les gazettes que malgré l's'accidents en l'air resultant en grands perte d'vie, pus d'vie sont perdues sus ieau et terre. Auve la forme d'viagement moderne, le monde est dev'nu accessibl'ye sans autchun grand effort. A compathaitre es jours quand la traversée a l'Australie prennait siex s'm'naines par baté, aniet la meme distance est couverte dans 24 heuthes par avion.
L'invention, le progrés, est une chose que j'avons touts experiencé duthant not vivage, et j'pense bein que la prechaine genethâtion se d'manda comme tchi que j'pouvions aver exister souos chés conditions considethées d'antitchilté.
Chu mot d'antitchilté me fait penser a la grande occasion que le peuplye d'Anglieterre veint d'celebrer envers le chentieme annivsaire de la naissance de la Reine-Mêthe Elizabeth. Une dame si elegante et couothageuse, un bouton examplye pour touos les membres de la famillye Royale et l'peuplye a poursuivre. Quouaiq'ua ou n'écoute p'tete pas Radio Jerri si bouon heuthe du matin, quand même j'envions a s'n'Excellence aussi bein qu'és malades de not connaisance nos meilleurs souhaits et toutes bénedictions dans l'temps a l'av'nin.
A LA PRECHAINE
Clifford Laisney
Viyiz étout: