A tuous les gens tch'écoute la lette Jerriaise sus Radio Jerri aniet Dinmanche le 30 de Janvi l'année 2000, j'vos souhaite le bouonjour. Chés Clifford Laisney tch'a l'pliaisi d'la presenter.
L'année 2000 j'vos entends dithe, est'che possiblye que dèja un mais s'est passé dépit toutes les celebrations de l'Eve de chutte nouvelle année?
L'année 2000 announce la celebration d'la naissance de nôt Sauveur Jesu Christ, et dans m'n'opinion l'entrée du vingtiunième sieclye devtha etre celebré a la fin de ch't'année, une bouonne raison pour une deuxieme célebration.
En Jerri comme en d'autres parties du monde, i'a plusieurs gens vivants tch'ont vêtchu l'travers de trais sieclyes, une chose de rareté. Sans doubte lus memouaithes du dgiex-neuvieme sieclye n'est pas trop cliai, mais tch'il experience et grands changements tch'il ont veu duthant lus vie.
Ils ont connu les temps quand la grand part de machinn'nie etaits gouvernées par l'usage de vapeur, pour examplye les batieaux d'vapeur auve tchi q'les gens faisaits la longue traversée d'Jerri a la Terre-Neuve en cherche d'une nouvelle vie. Ils ont connu l'introduction du roûleux d'routes a vapeur. Tchi spectaclye quand j't'aimes mousse de vaie chutte grande machinne a compacter la matchiethe devant tather la route.
L'introduction d'la veue électrique. Nou s'r'appelle si bein quand la seule manniethe d'écliaithage etait la chandelle et pus tard le lampion a parafinne. J'crait que l'invention du pousse-bouton est iune des utilités tch'a ieu l'pus d'impact dans couôthant d'not vie. Pour examplye, le cauffage, la refrigeration, et d'autes c'mmoditées d'tchuisinne, les machinnes d'usines et d'caltchules.
Nou s'rapelle quand ch'tait seulement les gens d'bein tch'avaits l'telephone installés dans lus siez ieux. Une grand machinne installés a la muthaille tchi fallait tourné et ratourné a seul fin d'app'lé la personne au bureau d'échange.
La Television, tch'il invention incriyable de pouver vaie et entendre d's'evenements tchi s'passe de l'aute but du monde. Au'jourd'aniet j'acceptons ch'la comme not drouait. Tch'ést que j'f'thaimes sans la boête?
Les dernier chent ans ont veu etout grand progrés dans la scienche de medicinne. L'invention du penicille, le traitement d'cancer, le rempliaichement d'organes. Le dentiste étout auves touous ses instruments modernes, ch'est presque un pliaisi d'visiter l'dentiste achteu apart de payi l'compte pour ses travaux. Tchi changements étout quand l's'avions atterais sus la grêve a West Park. Ch'tait néccessaithe de cliairgi un passage sus la grêve en orde que l'avion atterisse. J'avons avanchi d'pis les jours quand une douzaine de passagiers etait l'complièment d'l'avion. J'avons veu la cessation du train tchi couôthait d'la Corbière a Gououray. Acquo une autre examplye d'une belle machinne de vapeur. Je s'sait p'tetre une idée de r'introduithe la ligne en orde de soulagi l'traffique de route.
Les premier motos de nenante ans passé ne portaits pas grand r'sembliance es vetûthes d'aniets. Pas ;l'comfort de cauffage, radio et toutes autes c'mmoditées. Tchi transformation dépis les jours du j'va et l'quêrre. Malgré l'progrés, le portrait du môto n'est rein a compathaitre au ch'va bein att'lé trottons ordgilleusement, respectueux des c'mandes de son maitre.
J'pense bein que l'avanchement d'la fèrmiéthie est ch'la tch'a fait l'pus d'progrés duthant dernier sieclye. I'n i'a pas autchune comparaisson d'la machinn'nie d'aniet auve les implements utilisées par nos pathents et d'nou-même. Siez ch'vaux l'temps passé a tour'né une raie a compathaitre au tracteu d'achteu tchi prends quatre raies en aiseté. La plian'tie et l'défouissage des patates tout a la main. Ch'Tait la l'temps quand les nouvelles patates avaits vraiment l'gout d'nouvelle patates Deux panniers, une frouque et une barrique de cidre etait sufficant pour la saison. Ach'teu faut ergrandi les brecques du clios en orde d'acc'moder la defouisseuse. Tchi changements.
Bein seux qu'la vie d'aniet est pus aisie, j'avons pus d'temps d'r'pos, pus d'louaisi, pus d'sou pour vacances et d'choses luxe. Mais malgré tout, j'me d'mande tchiquefais si les gens sonts pus heutheux qu'lus anchêtres.
Quand a mé, j'sis content d'aver vêtchu dans un temps d'grand progrés, et d'changements.
J'me d'mande tchi qu'nos p'tits éfants vêthons duthant les prechaines chent ans si l's'affaithes progresse de la mannièthe que j'avons veu et experiencé dûthant nôt vie.
A LA PRECHAINE
Clifford Laisney
Viyiz étout: