Bouônjour bouonnes gens. Ch'est Geraint Jennings tchi vos présente la Lettre Jèrriaise chutte sémaine.
J'avons ieu des changements à ches drein: chutte Lettre Jèrriaise a r'mué et j'espéthe qu'la nouvelle heuthe est pus conv'nabl'ye et qu'ou s'en va attriotchi pus d'monde. Lé clyînmat sembl'ye à la renvèrque - j'avons sué à la fîn du mais d'Septembre quand l'mais d'Août à chein tchi pathaîssait arrivit en temps pouor l'mais d'Octobre. Mais i' sembl'ye qu'lé S'tembre arrive - y'a des coffîns d'châtaines êtrueûlés par les trottouaithes et des fielles sont à tchaie. Y'a des mouochieaux d'fielles sècques par les c'mîns et des mouochieaux d'fiellets des candidats ès êlections à toutes les portes.
L's affiches des candidats n'ont pon tchée tout coumme - i' sont acouo là. Mais chutte fais ma fache n'est pon affichie acanté l's aut's. Ch'est en tchi j'avais plianné dé m'mett' sus les rangs, mais au mais d'Août y'eût un changement d'avis quand j'fus pèrsuadé dé happer eune opporteunité tchi m'avait tchée sus l'co. Coumme nou dit, y'a souvent du disteurbé entre l'bé et l'morcé.
L's êlections sont des changements politiques. Y'étha un changement d'Chef Minnistre, et d'aut's changements parmi les minnistres, et j'savons chenna sans aver à prédithe les rêsultats d'la vot'tie. Y'a des Membres d's Êtats tchi lus en vont à la r'traite, et j'lus dîthons à bétôt (ou bouonne dêbâte, s'lon s'n avis). Y'étha des nouvieaux membres d'êlus, et j'lus dîthons séyiz les beinv'nus (ou bein tchi pitchi s'lon s'n avis). Et auve lé changement constitutionnel, j'éthons mains d'Sénateurs. Un aut' changement dans la politique est l'arrivée et l'assèrmentâtion du nouvieau Gouvèrneux.
Lé mot "changi" est iun des dgiêx mots chouaîsis pouor la calenge du préchain neunmétho des Nouvelles Chroniques du Don Balleine. La date lînmite pouor des pièches ch'est la fîn d'chu mais - lé trente-tch'iun d'Octobre. Lé neunmétho du magâsîn d'achteu a coumme thème "Les Êlections" et auve les vielles pièches nou peut liéthe coumme tchi qu'les êlections ont changi. Ch'fut l'Connêtabl'ye dé Saint Hélyi, Ph'lippe Baudains, tchi fit pâsser la louai sus l'ballot - d'vant chenna nou votait ouvèrtement en dêcliathant sa vouaix pouor châque candidat. Et né v'là ieune des raîsons pouortchi qu'ses admithateurs fîtent êrigi eune stchulptuthe du Connêtabl'ye Baudains dans les gardîns d'la Pathade.
La Pathade, tchi 'tait un tèrrain militaithe sus les mielles d'la Ville, fut transformée en par et pronm'nade par l'action des Connêtabl'yes et Pâraîssiens d'Saint Hélyi au temps pâssé. Robert Pipon Mathet 'tait iun des responsabl'yes coumme Connêtabl'ye dé Saint Hélyi, et l'Connêtabl'ye Baudains pus tard avait embelli les gardîns. Et achteu, tchi qu'éthait voulu vaie acouo des maîsons et offices où'est qu'j'avons chu par? Ch'est un pliaîsi dé crouaîsi les gardîns pouor v'nîn ichîn à Radio Jèrri à seule fîn d'èrcorder chutte Lettre-chîn. Ch'tait un changement en Ville tch'est bein apprécié au jour d'aniet.
Et y'a acouo un changement historique en allant en Ville, ch'est l'travas pouor ag'ver l'par du Millénaithe. Y'a ieu du hèrtchîn entouor lé grannit, et les trottouaithes, et les sièges, et tout. Et n'y'a pèrsonne tch'est chent pouor chent satisfait en tout, car les gens ont des difféthentes priorités. I' faut tchiquechose pouor les jannes, tchiquechose pouor les vielles gens. Lé par dait offri tchiquechose toute l'année, dans toutes les saîsons - au R'nouvé, en Êté, au S'tembre et en Hivé. Ch'est en tchi un par dait rêpondre ès d'mandes des résidents et vîsiteurs, et les d'mandes changent s'lon l'temps et s'lon les saîsons. I' faut d'la bliête et d'l'abri, des flieurs et des stchulptuthes, et l'par s'en va changi l'quartchi du Nord-Êt d'la Ville, en attriotchant des conmèrces et amendant la vie des fanmil'yes tchi'y d'meuthent et d'meuth'thont.
Et pouor finni, né v'chîn un but d'eune poésie par Ph'lippe d'la Golarde (PW Luce), "Au temps passé":
Ch'est seux qu' y'a ieu bein des changements
Ichîn en Jèrri dans chent ans :
Maîs pour ma part j'sis satisfait
De vivre pûtôt au jour d'aniet.
Mèrcie bein des fais pouor m'aver êcouté, et à la préchaine.
Geraint Jennings
Viyiz étout: