Les Pages Jèrriaises

Dialogue entre Doeux Trintez

MÊTE FLIP.

Howdi veizin; Maqui quesq'tuans dits enniet;
As tu ben dormi; as tu yieu une bouane niet?

MÊTE MAQUI.

Mais oui guia, couoszin Flip; j'ai était estravlet,
Toute la bénite niet ahonnait dans men liet,
Comme un Pourpez qui dort à l'ardeu du solet.
J'avais gran hâte d'te vais, pour que tu m'racontisse
Quesq'chez Messieux veulle faire (im parois des sotisse
Que de voulé bâsti des paraits dans la mé)
Illo dans la Grande Rade ou au hâvre d'Bouôllé;
Quesq'tout chonna nos sert? êsche qui crês empêchi
En tems d'guerre, les Normands de vnin nos sacagi?
N'avonge pas notre Milice, et des braves soudarts
Qui vaindront nos aïgui à ligni nos remparts:
Chène sont pas des slopins comme les chêns que Rulcour
Fit vnin ove des cannons qui chergirent à l'arbour,
Et créyant avé prins possession de Jerri,
Sanne 'test vnus, pacque à cous, jusq dans l'vier marchi
Mais là, le brave PIERSON tout d'un co lus maoutri
Qui s'étais ben trompaits en v'nans nos attaqui;
Que nos brave garçons n'avois pas fret ês yiers.
Car dans mains de doeux heures il'tois touos prisoniers.

MÊTE FLIP

Mon chierr veizin, Maqui, chen'tait pas pour ditait
Qu'les Ingénieurs Anglais sus nos côste on sondait;
Chetait pour faire un pont d'ichin en Anglieterre,
Par yiou les régiments pouôrais vnin en temps de guerre
Au moyen d'un ch'min d'fé, qui rouôlle comme sonnette
Dans la faichon d'un tou la besouogne serait faitte.
Et pis qui pus ocquo dans un cas de besoin
J'érions peu est Angliais bailli un fier co d'main,
Mais chonna n'peu pas faire, il ont voeu par lus sonde,
Que autouo de nos costes la me est trop profonde -
Forchis d'abandonné lus projet, à la fin
Y trouve, qu'à la vieille mode, y faout ocquo sen t'nin,
Et qu'atout des Transports et nos Frégades Anglaise,
Je pouôrons comme d'amor dormi touos à notre aisse.

 

Viyiz étout:

 

Les Pages Jèrriaises