Les Pages Jèrriaises

Eune lettre dé 1896

A M. l'Editeu d'la "Nouvelle Chronique."

La Hêche ô Viau, St.-Mareté.
Jerri, shu 29 Jeanvi 1896.


Man chier Mess Bisson, - J'ai eunne chestion qué j'voudrais bin vos d'mandé et p'têtre qué vous pouorraites m'esquiéthi sus l'sujet.

Y a tchique tans j'fus averti d'mé trouver en cour a djiex heuthes du matén pour être tèmoin dans la cauze dé Mess Blampi contre Mess Chanbacki. Mé v'la don athivé à l'heuthe et bravement j'massievi sus un banc, jén'vyais persoune et j'pensis ouès tch sont touos hors, mais bétôt n'en v'la deustrès tchi athivent et cha continué d'mène, y'en entré iun ou deux par bordées; a djiex heuthes un car né v'la l'Chantnyi "Krismus" tch'entre et tout d'shuite j'vas l'y d'mandé si chès tchi savait ouès tchétait lé Juge Vauxdén, qué j'avais té averti pour djiex heuthes et y tai un car passé et l'Juge té pon encouo athivé. Oh man garçon tchi'm dit y n'vin pon d'abitude fort dévant djiex heuthes et d'mie; et bin Mess Bisson y té vint-très minutes passé djix quan chès tch'il entri, y cré-t'y chu moussieu qu'jai l'tans dé m'assièthe dans la cour à l'attandre.

A t'y l'droit dé faithe chounna Mess Bisson?

Au tans du Juge Gibbow cheun té pon d'méne djiex heuthes ch'té "djiex heuthes" et pon djiex heuthes et d'mie.

Més consplimans a Missis Bisson et à la p'tite famile.

Jean Léhuché.


Nouvelle Chronique de Jersey 1/2/1896

 

Viyiz étout:

 

Les Pages Jèrriaises