.
Comme mousses, j'soulêmes faithe des feux d'jouaie auve nos anmîns dans l'clios auprès d'not' maîson. J'faîthêmes sèrvi des branques, choutchets et morcieaux d'cartons et j'faîthêmes un Bouonhomme auve dé vièrs habits, mais j'n'allêmes pas alentou des maîsons ou des boutiques pouor tcheûter.
Nos pathents soulaient acater des Reues d'Cath'rinne, des Chandelles Romaines, des Coups d'Foudre et des Ripraps et cèrtainement des fîsés qui 'taient tithés d'boutelles dé limonnade vièdes. J'mettêmes des cauds habits et des hautes bottes et nos pathents alleunmaient lé bliu papi, tréjous en nos dgèrnant d'èrtchuler hardi liain.
Les pus vièrs garçons pitchaient les Coups d'Foudre alentou et tchiquefais amathaient les Ripraps ès tape-porte, les alleunmaient et fichaient l'camp dêliêment!
Tout l'monde appliaudaient quand lé Bouonhomme happait feu et tchiyait dans les fliambes mais la miyeu partie 'tait d'mangi des patates, tchuites au bord du feu parmi les rouoges tîthons d'bouais. À la fîn, auve eune vèrte branque, j'soulêmes les traîner hors, falcies d'chandril'ye et êprouver à les p'ler tandi qu'i' 'taient acouo caudes et souvent nos brûler les dés.
Et pis, auve les rouoges èrfliets du feu sus nos faches, j'soulêmes nos assiéthe alentou du feu, en bagoulant entouor les feux du temps pâssé, et jouithant du goût des patates fraîchement tchuites.
Ralph Nichols
2003
Viyiz étout: