Nou ouait qu'lé sèrvice des beusses s'en va êt' amendé. Assa, à forche dé crier Noué, i' veint. Nou-s'a tchiquefais l'idée qué j'n'avons pon des beusses en Jèrri mais des boêtées d'sardinnes à reues. Ch'est en tchi les pâssagièrs sont patchis coumme des sardinnes, sans vouler suggéther qu'nou viag'geait pus aîsiement sus des sardinnes à reues. Des paîssons boulants, v'là tchi n'sont pon bein c'modes pouor les cheins tchi vont en travas, mais chenna pouôrrait ofûche attriotchi des touristes.
Mais sans niolinner d'aut', i' faut dithe qu'i' n'y'a pon hardi d'louga sus les beusses. Eune pouque ou un pagas, et vos v'là tout embrontchi. Et pouor les cheins tchi vont ou veinnent dé l'aéroport, la situâtion a 'té duthe d'pis bein longtemps. Véthe, lé sèrvice dé l'Aéroport a 'té chèrgi coumme eune rueûtchie d'moûques à myi.
Mais coumme tchi amender les beusses? Jé n'pouvons pon êlaîsi les beusses car nos ruettes sont êtraites. J'pouôrrêmes ofûche èrtréchi les pâssagièrs: si touos les pâssagièrs pèrdaient du paids, nou pouôrrait sans doute squouîzi acouo deux-trais corps à bord. Et s'nou pouôrrait pèrsuader les gens d'porter du lycra au run d'corsets d'oeuvre et câsaques, v'là tch'aîgu'thait acouo pus à heuner les beusses.
Mais sans êlaîsi ni rallouongni les beusses, tchi faithe? Ch'est l'èrtou au temps pâssé, bouonnes gens, quand les beusses à deux êtages soulaient cirtchuler en Jèrri. Les cheins tchi n'ont pus d'êtage coumme aut'fais pouôrront rester à bas, tandi qu'les pus jannes aim'thont grîmper coumme des cats à haut pouor lus rêjoui d'la belle veue au nivé des muthâles et fôssés sus les clios et les gardîns. Et tch'est qu'i' y'a d'miyeu qué d's'assiéthe en d'vant d'l'êtage d'à haut d'eune beusse à r'garder lé c'mîn à l'avant d'sé? Coumme chenna, nou-s'a l'nivé dans l'yi. Et auve du louga, nou pouôrra niv'loter étout.
Coumme du solyi, des gâches à couoches sont tréjous întérêssantes: couoche dé pâté, couoche dé g'lée ou d'frit ou d'crème, couoche dé pâté, et ainchîn d'siette. Et sus les beusses à deux êtages, la crème fliotte à haut!
Geraint Jennings
Viyiz étout: