San Antonio, Texas.
U.S.A.
Lé 17 janvyi, 1970.
Moussieu l'Rédacteu,
Dans des temps, j'mé d'mande comment qu'des vièrs comme mé peuvent lus accouôteunmer au brit tch'i' y'a par les c'mîns, et souvent dans les maîsons. Lé ronnement d'motos dans les rues et l'brit d's avions en l'air sont continnuels et nou s'y accouôteunme à la longue, mais pour les jannes ch'n'est pon assez. I' n'pathaîssent pon capabl'yes d'faithe autcheune chose sans l'souôtchien d'tchique sorte d'brit. Au sé, l's êcolièrs font lus léçons au son d'un radio tchi braille comme un raffolé, tchi chantonne un tas d'niolîn au son d'tambour et d'trompette, ou tchi joue d'la musique - ou chein tch'est supposé êt' d'la musique - mais tchi n'est pon si pliaîsant à ouï comme la musique dé Guy Fawkes du Sieur George Stuber ès Landes à St. Ouën quand j'tais mousse. Né v'la d'la musique tchi valait la peine dé ouï!
Ch'n'est pon seulement l's êcolièrs tch'aiment lé brit. J'viyais un janne homme l'aut' jour tch'était à laver san moto. Il 'tait dans sa cache, à côté d'un bouais, et il avait pendu iun d'ches fichus radios-là dans l'bouais et nou l'ouiyait brailli dé d'dans la route. I' n'y a qu'à passer l'long du bel d'eune êcole quand les mousses sont à jouer. Ch'est un brit încriyabl'ye! À la pliaiche d'êt' à jouer ès barres ou ès marbres comme quand j'tais à l'Êcole Wesleyenne à St. Ouën, i' sont à couorre l's uns souotre l's autres comme des fos et à criaille à tue-tête!
Lé brit est dév'nu si împortant en Améthique qué mème dans nouos grands Supermarkets des hauts-parleurs chantonnent continnuellement chein tch'est appelé d'la musique dé nouos jours. Et j'mé d'mande tréjous pourtchi tch'i' faut d'la musique pour souot'nîn les programmes - farces, conmédies ou drâmes - sus la télévision. Nou-s-a souvent d'la peine à discèrner les patholes des acteurs viyant qu'la musique fait tant d'brit!
J'pense bein qu'les jannes tchi s'en vont liéthe chennechîn en Jèrri - s'i' y'en a tchi peuvent acouo liéthe lé Jèrriais - s'en vont dithe : I' r'dote ou il est dév'nu roupilleux dans ses vièrs jours, lé bouanhomme George! Ch'est p't êt' vrai! J'aime lé silence et la trantchilité. Y'a, sans doute, du brit qu'nou peut appeler trantchil - comme lé murmuthe du lappais d'la mé - et j'aime bein chu brit-là! J'm'èrsouveins qué quand j'm'en fus d'meuther à La Mouaie à St. Brélade siez ma marraine à l'âge dé douze ans quand Papa mouothit, Mait' John Francis Frederick d'Aubert, lé fréthe à m'n oncl'ye Frainque d'Aubert, 'tait chef-gardgien du phare dé La Corbièthe, et j'allais tchiquesfais passer la niet auve li dans l'phare quand ch'tait san quart, et j'aimais à m'endormi au son du lappais d'la mé.
Jèrri 'tait bein pus trantchil dans chu temps-là tch'i' n'l'est à ch't heu, et i' m'sembl'ye qué l'clyînmat 'tait pus caud, et j'pense souvent, quand j'sis ichîn à man tout-seu, ès arlévées d'êté ès Landes quand tout ch'qué nou ouiyait 'tait l'chant des ouaîsieaux, lé bourdonnement des bourdons et des moûques à myi, et - dans la distance - lé ronnement d'la mé à L'Êta. Lé Dînmanche l'arlévée, quand j'allais m'assièthe auve Papa sus L'Mont d'L'Êta, nou ouiyait un p'tit pus d'brit - lé cliapotais des chabots des j'vaux dans la route quand les cârrosses à quat' chévaux et les ouagonnettes appréchaient d'l'Hôtel dé L'Êta d'chu temps-là 'taient féthées atout du caoutchouc à la pliaiche dé fé.
Au sé, auve Papa à feunmer sa pipe trantchilement au pid du feu et Manman à hoûter d'l'aut' côté d'l'àtre, lé ronronnement d'Minnette, nouot' vielle catte avait un son pliaîsant et trantchilisant.
Eune fais, j'tais tout seu dans l'clioche tout au haut du Campanile sus La Place de St. Marc à Vénise, en Italie. Ch'tait entre dgix et onze heuthes au sé et j'fus împressionné par la trantchilité des sons qu'nou ouiyait dans la distance. Des sons pliaîsants : Lé oua d'un tchian, un mio d'musique (l's Italiens sont forts là-d'ssus et chette-là 'tait d'la bouanne musique) : tchiques pétites vouaix comme un murmuthe d'un côté ou d'l'autre, et l'mannyîment d's avithons des gondoles dans l'canal à côté. Mais la chose pliaîsante 'tait qué dé chutte hauteu-là touos les sons avaient l'air d'êt' assoupis, et un mangnifique cliai d'leune, r'lîsant sus les coupoles de la belle grand' cathédrale dé St. Mar, donnait un air dé mystéthe à tout ch'qué nou viyait et ouiyait!
Enfin, i' faut êt' èrconnaîssants pour les bouannes choses dans la vie, et comme èrmiède contre lé brit ichîn, y'a eune chose qué nou peut faithe. Ch'est d'aller s'assiéthe et s'èrpôser dans ieune dé plusieurs églyises ès alentours. L's églyises Anglicannes et Romaines sont tréjous ouvèrtes, et d'dans y'a eune trantchilité profonde, sustout en présence du Saint Sacrément, tchi vouos calme l'esprit et vouos fait oublier l'brit et l'tîntamarre dé la vie quôtidienne!
George d'La Forge
Viyiz étout: