Tch'est qu'i' sont les brits tchi vos font frémi, tchi vos dêcouothagent, tchi vos mènent au nièr m'sespé? L'ôrage? La grînch'chie d'craie sus eune néthe plianche? La martel'lie d'un marté-pitcheux?
À ches drein nou-s'a liu la nouvelle entouor eune machinne qu'nou-s'appelle la Moustique. À chein tchi pathaît, nou fait sèrvi chutte machinne à seule fîn d'gêner les jannes gens atout eune bourdonn'nie qu'les pus vièrs n'ouaient pon. Ch'est en tchi l'ouïe ès cheins en d'ssous d'eune vîngtaine d'ans est pus finne et les sons d'eune frétchenche êl'vée peuvent lus faithe jadgîn sans qu'les pus âgis lus en appèrchèvent. Chutte bourdonn'nie est s'posée d'cârrer les dgaîngues dé jannes gens d'l'avant d'boutiques où'est qu'il ont couôteunme dé lus rassemblier.
Jé n'ouïthai janmais chu fichu brit, mé, mais y'a d'aut' sons tchi m'font êtriver. Y'a des gens tch'aiment lé son dé l'ieau russelante. Pouor ieux, un p'tit jet dg'ieau dans l'gardîn fait d'la musique douoche assez pouor bèrchi et donner eune niétchie d'rêves pliaîthants. Tout coumme, mé j'ai ieu à dormi dans des chambres êtchipées des conforts d'achteu, ch'est à dithe l'ieau couothante - couothante lé travèrs du pliafond et ava les muthâles. Jé n'peux pon don sténer l'son dg'ieau tchi couort en dormant. Dé l'ieau tchi d'puthe ou d'la d'goutt'tie d'un coq mé rêvil'ye d'un ambron. Et en génétha jé n'trouve pon l'russellement d'cannieaux hardi apaîsant, même au tchoeu du solé.
Les cheins tchi sont accouôteunmés à la vie d'campangne ont souvent du train à lus endormi en ville où'est qu'i' y'a un brit sans cêsse dé trafi. D'l'aut' bord des villais n'trouvent pon parfais aîsi d'dormi la niet quand i' n'y'a d'aut' la douoche ronn'nie d'boulants tchi pâssent à les bèrchi. Assa les pigeons et les corbîns né juquent pon ensembl'ye.
Nou-s'a ouï étout à ches drein entouor l'hèrtchîn à Oxford où'est qu'des Musulmans ont d'mandé pèrmission d'êtrueûler l'appel Islamique à la priéthe. D's opposants dithent qué la sonn'nie des cliochièrs d'églyise tch'est traditionnelle est acceptabl'ye, mais ch't appel amplyifié tch'est proposé dévthait êt' hors d'la tchestchion. Ch'est vrai qu'les cheins tchi viagent dans des pays Islamiques n'ont dgéthe bésouain d'cârillon, car nou-s'est rêvilyi à sinne dé jeu par l'appel des mostchies.
Tout coumme, ch'est mus sans doute qu'l'ieau russelante pouor l's iuns ou la fichue Moustique pouor les jannes gens.
Geraint Jennings
Viyiz étout: