Fallbrook,
California, USA.
Lé 18 dé mar, 1978.
Moussieu l'Rédacteu,
J'ai ieu la chance chutte sémaine. Eune anmie tchi d'meuthe à Los Angeles èrchait la gâzette dé Jèrri par avion et ou m'a env'yé les cheinnes des 9 et 16 dé févri. Ouaithe qué les nouvelles dédans sont dêjà un mais en arrièthe, i' sont d'à ches drein à compather ès cheinnes dans les gâzettes dé dézembre, la dreine èrchue étant du 30.
J'vai qu' ou-s-avez ieu mauvais temps en Jèrri comme par ailleurs. Ichîn en Califournie la plyie a 'té rempliaichie, à fîn d'compte, par lé bieau solé et la chaleu, mais i' faudra des mais pour èrgraie les pâssages et les c'mîns entre les montangnes, dêgradés par les ruissieaux et p'tites riviéthes enfliés par lé d'luge. Ch'est acouo difficile dé viagi l'travèrs des vallées pour arriver en ville. Même les rues pavées sont en mauvais êtat, lé couothant dg'ieau ayant dêgradé tèrre, gravi et pièrre en d'ssous du pavé des deux côtés dans bein des cas, et l'pavé craque et s'enforce en mios.
Eune chose tchi n'pathaît pon amender en Jèrri est la mauvaîtchi. J'viyais qué l'Juge dé la P'tite Cour est d'avis tch'i' faut un traisième Juge pour lî'aidgi, et qué la Cour siége tchiquefais jusqu'à 6 ou 7 heuthes au sé. Moussieu Meridian nouos dit dans la gâzette du 9 dé févri qué la France s'en d'mente étout, d'la violence par les c'mîns, et qu' un tas d'gens sont d'avis qué l's autoritès sont trop tendres quand veint tchestchion d'peuni les malfaiteurs.
L'affaithe est grave quand les gens n'peuvent pon marchi trantchilement sus la cauchie et dans les rues d'la ville sans êt' assaûtés par tchique sacrée tchèrnache tchi dév'thait êt' renv'yée dans l'pays dé où'est tch'il est v'nu. J'ai r'mèrtchi tch'i' n'y'a pon fort dé vrais noms Jèrriais parmi les malfaiteurs présentés d'vant Justice. Et né v'la chein qué l'tourisme a apporté dans l'Île. Où'est tch'est l'vièr temps quand rein qué quat' ou chîn causes par sémaine (et i' n'taient pon graves a compathaître à la mauvaîtchi d'à ch't heu) v'naient d'vant l'Juge Vaudin?
En Améthique ch'est la même boutique dans cèrtaines grandes villes. Et l's autorités sont tellement êbliouis par lus idées dé “human rights” qué l'malfaiteur en prend advantage. Lé pouôrre officyi d'police est oblyigi d'avèrti un malfaiteur dévant l'arrêter tch'il a “tels et tels drouaits” et si l'malfaiteur peut persuader l'Juge tch'i' n'a pon 'té tellement avèrti, les chances sont tch'i' s'sa mîns en libèrté et l'officyi d'police èrprimandé! Né v'la chein qué l'socialisme et la souôdistante “libèrté” nouos engendre.
Dans ma lettre du 18 dé févri j'vouos disais qué j'aimethais vaie Moussieu George Simon êt' êlu Juge. Eh bein, j'veins d'vaie dans l'drein Bulletîn d'Quart d'An dé L'Assembliée d'Jèrriais tch'il est, en êffet, sus l'Banc d'Justice, et v'la tchi m'donne grand pliaîsi dé l'féliciter. Et i' faut féliciter lé Collège Electoral d'aver ieu l'avis d'l'êlithe, sustout quand i' y'a un tas d'souôdisant progressif et réformateurs par les c'mîns tchi veulent mett' des femmes Juges sus l'Siège.
Comme jé l'ai souvent mentionné, j'aime et j'admithe hardi les femmes, mais il' ont l'tchoeu trop tendre pour êt' Juges, sustout ches jours qué j'avons bésoin d'êt' sévéthes à cause des mêchants parmi nous. J'en avons un tas, d'femmes Juges, dans L's Etats-Unis, et la mâjorité craient qué la mauvaîtchi est eune maladie tch'a bésoin d'êt' èrdgéthie à la pliaiche d'êt' peunnie! I' faut admettre qué ch'est eune idée bein admithabl'ye, mais ou n'est pon praticabl'ye.
Et i' faut féliciter l'publyi pour aver des Juges du calibre des mêssieux êlus à mett' la rouoge robe. Lé Collège Electoral pathaît s'atchitter bein. Mais j'ai tréjous r'gretté qué touos l's êlecteurs dé l'Île ont pèrdu l'privilège d'êlithe les Jurés d'la Reine ieux-mêmes.
Et comme les félicitâtions sont en ordre, i' faut féliciter lé Cap'taine Tessier-Yandell, OBE, pour sa mangnifique articl'ye au sujet d'la couleu d'Jèrri. I' dait aver travailli bein dû pour atchumuler touos les faits historiques au sujet d'l'adoption d'la crouaix d'St. Patrice comme couleu, et s'n articl'ye est un vrai chef-d'oeuvre.
Je'n'sis pon dé s'n avis qué nou dév'thait la garder, mais v'la tchi n'empêche pon d'admither san mangnifique travas. J'sis, comme j'l'ai tréjous 'té, d'avis qué les trais léopards dé Nouormandie dév'thaient êt sus la couleu d'Jèrri. Comme Anglo-Nouormand d'race, i' m'sembl'ye qué v'la tch' aîguethait à prêsèrver la r'nommée d'la race Jèrriaise, prîncipalement comme ou s'en va dispathaître dans l'couothant d'tchiques généthâtions en Jèrri anglyicîsé, et j'voudrais vaie tchique membre d's Etats tch'a du paids dans ses manches lé proposer.
George d'La Forge
Viyiz étout: