Ottawa, Ontario,
Cannada.
Lé 15 novembre, 1969.
Moussieu l'Rédacteu,
S'i' y'a eune ville qué j'aime mus qu'eune autre, ch'est la capitale du Cannada. J'vous en ai pâlé d'vant. Tant pus qu'j'y veins, tant pus j'm'y pliais, et j'mé dis tchiquefais qué si ché n'tait pon qu'Jèrri m'passe lé pus près du tchoeu j'aimethais bein y d'meuther. Mais i' n'faut pon qué j'm'êcoute! J'sis vraînment l' Pigeon Voyageur qué nou m'a tchiquesfais appelé, et ch'est p't êt' la jouaie d'vivre tchi m'fait m'trouver à m'n aîse dans bein des pays. Et l'Cannada est comme eune deuxième patrie pour mé. Ch'est vrai qué l'pays 'tait appelé La Côte par Papa et les fèrmièrs tchi v'naient lî garder campangnie dans la forge au sé quand i' faîthait les fièrs dé tchéthues dans l'hiver, mais quand j'allis à L'Êcole Wesleyenne j'apprîns qu' La Côte 'tait partie du Cannada. Cèrtains des grands tch'étaient dans la septième clâsse y'allaient quand i' tchittaient l'êcole, et j'm'èrsouveins d'la dreine arlévée à l'êcole dé trais d'ches'là, Fraînque Hâcou, fréthe dé Reg, iun des Malzards du Moulin, et Bert Amy d'L'Êta. Lé pouorre Fraînque Hâcou fut nyé en arrivant à Paspédgia. Il 'tait acouo à bord du navithe en rade et i' pèrdit sa balance en env'yant un boutchet hors bord pour puchi d'l'ieau d'mé.
Ch'tait à Paspédgia qu'man p'pèe s'en fut en 1901 quand i' s'engagit pour les Robins, mais i' s'en allit à Percé pus tard et ch'tait là qu'man fréthe Percy fut né. La Côte es'sa tréjous un lieu d'pélérinnage pour mé, un mio à cause dé ch'là, un mio à cause dé mes heutheuses visites chez l'bouanhomme John Le Cocq et sa bouanefemme à Malbaie dans lus vivant, et hardi viyant qu'ses chînm'tchièthes sont plieins d'tombieaux couvèrts des noms des Jèrriais tch'ont vêtchu et passé l'pas là-bas.
Mes deux soeurs et l'pus janne dé mes fréthes fûdrent nés a Ottawa, et man p'pèe et ma m'mèe sont au r'pos êtèrnel dans iun d'ses chînm'tchièthes. Et ma couôsine Hilda L'Gros, née Le Feuvre, y'est étout. Oulle 'tait fille dé m'n oncl'ye Ph'lippe, contrémaître dans les grands navithes à vailes dans san vivant. Il 'tait l'fréthe à Manman L'Feuvre et i' fûdrent nés à La Ville La Bas, pas bein liain du Ménage ès Feuvres.
Quand j'y arrivis, à Ottawa, y'a chînquante ans chu mais, i' m'sembliait qué ch'tait l'hant des fées! Y'avait des veues couleuthées partout et tout 'tait couvèrt dé né. Les veues m'faîthaient penser au temps du carnaval en Jèrri quand j'tais tout mousse, et qué quand nou viyait eune veue couleuthée nou ouiyait tchitchun dithe Gâs les 'Blue Light'! Des palais bâtits atout des grosses briques dé glace 'taient dans les pars, et les veues couleuthées d'dans r'lîsaient l'travèrs des muthâles dé glace et donnaient eune lueu êtrange et mystérieuse dans la niet. L'temps 'tait si fraid qué v'la tchi duthait tout l'hiver sans fondre. Garçons et filles 'taient à patinner ès alentours et sus la glace dans l'canal et la rivièthe. J'apprîns à patinner étout, et j'm'êcouochis un mio partout - mais sustout ioù qu'nou s'assied, car n'ayant pon c'menchi à patinner comme mousse i' m'prîns pus longtemps à apprendre à m'balanchi sus mes patîns, et au c'menchement j'passais pus d'temps sus man driéthe sus la glace qué d'but sus mes patîns!
I' n'y avait presque pon d'motos par les c'mîns dans chu temps-là, et des bieaux grands traînieaux dé toutes les couleurs 'taient partout dans les rues, halés par des bieaux nièrs chévaux. Les gens dans l'traîné 'taient en grand' câsaques et chapieaux d'pieaux d'ourses, et il' avaient les g'nouors couvèrts auve des couvèrtuthes dé chutte pé-là étout. L's att'lages des j'vaux 'taient couvèrts dé p'tites clioches qué nou ouiyait sonner tout l'temps.
Dans les campangnes ès alentours dé la ville, couvèrtes d'né, les jannes 'taient à d'valer les monts et les montangnes sus des skis et toboggans. Ch'est vrai tch'i' faîsait eune fraid d'tchian, mais nou n'y prannait pon d'avis. J'eus l's ouothelles g'lées eune matinnée en marchant à l'office. La tempéthatuthe 'tait quarante dégrés en d'ssous d'zéro Fahrenheit. En arrivant dans l'pays en novembre, 1919, lé Fraînque et mé, j'avions dans l'idée qu'j'allions aver du fanne à nouos entr' pell'ter atout des balles dé né. À nouot' grand' surprînse i' n'y avait pon mouoyen d'en faithe. La né 'tait g'lée et vouos passait entre les dés comme si ch'tait d'la poudre! Ou pouvait fondre quand mème. Fraînque dêcouvrit ch'là un jour dans l'office (j'tions dans l's offices du gouvèrnément). I' l'vit la f'nêtre et en ramâssit eune pouangnie et la mînt dans l'fond d'la tchaîse au Sieur Valpy, un Jèrriais tchi travaillait là étout, quand i' s'était êcarté dé s'n êcritouaithe pour tchiques munnutes. I' n's'en appèrchut pon en s'assiévant, mais quand la chaleu d'san corps la fondit j'vouos asseûthe tch'i' n'tait pon content!
J'pensais à ches bouans vièrs temps-là en mé l'vant à matîn et qué j'viyais qu'tout est couvèrt dé né quand j'ai r'gardé par la f'nêtre. Ch'est si bé!
George d'La Forge.
Viyiz étout: