Les Pages Jèrriaises

D'la marmott'tie et du mic-mac

Y'a des noms d'pliaiche l'tou du monde tch'ont d's originnes bein tchuthieuses. Pouor dé mé, j'criyais qu'la ville dé Whistler, en Colombie Britannique au Cannada, tch'avait atchilyi tchiques compétitions duthant les Gammes Olŷmpiques d'Hivé 2010, avait prîns san nom d'un Sieur Whistler, ofûche lé fondateu d'la ville ou un politicien ou tchique aut' célébrité. Mais nou-fait. Ch'est en tchi la ville fut nommée pouor la sûffl'yêthie des p'tites bêtes tch'ont nom sûfflieurs tchi d'meuthent là-bas.

Un sûfflieux est un grand grugeux tch'est un couôsîn à la mode dé Brétangne dé l'êtchutheu. I' né d'meuthe pon dans les bouais mais dans un tèrryi, coumme un lapîn. Quand eune dgaîngue dé sûfflieurs est horte lus tèrryi, nou peut ofûche vaie un îndividu, mâté sus ses pids d'driéthe, au dget - coumme i' font les mèrcats qu'nou peut vaie à la Mênag'gie. Si chutte sentinnelle vait du dangi, ou sûffl'ye à seule fîn d'dgèrni l's aut's. Né v'là pouortchi qu'nou les nomme des sûfflieurs, et les cheins tchi d'meuthaient l'tou d'Whistler avaient donné lus nom à chutte ville-là.

Ches bêtes ont un aut' nom au Cannada étout. En Français Acadgien, l'sûfflieux a nom "bonhomme couèche" - v'là tchi pouôrrait quâsiment êt' un nom Jèrriais. Mais l'originne dé chu nom-chîn est du mic-mac. Nou-fait, ch'est en bouon ordre! Ch'est en tchi les Micmacs, iun des peupl'yes d'l'Améthique du Nord, appellent ch't annima dans lus langue, lé Micmac, "moonumkweck". En marmottant, nou pouôrrait bein changi chu mot Micmac en "bonhomme couèche", car l's înmigrés, même les Jèrriais, n'comprannaient pon l'Micmac. Et viyant qu'nou n'comprannait pon l'Micmac, né v'chîn pouortchi qu'nou dit qu'ch'est du mic-mac.

Y'a eune crianche entouor lé sûfflieux. Ch'est en tchi l'sûfflieux hivèrne, et nou dit qu's'i' s'dêtâne dé san tèrryi à la Cand'leu et vait s'n ombre, i' rentre et y'étha acouo siêx s'maines d'Hivé. Mais si l'sûfflieux n'vait pon s'n ombre, ché s'sa bétôt la fîn d'l'Hivé. Au jour d'aniet, y'a des villes en Améthique du Nord tchi font d'la publyicité auve des festivals d'la Journée du Sûfflieux, mais pouor dé nous j'n'avons pon d'ches bêtes siez nous. Au c'menchement du mais d'Févri, mus vaut s'fier au vièr diton: "Quand la Cand'leu est cliaithe, l'aube gelée est en driéthe".

Geraint Jennings

 

Viyiz étout:

 

Les Pages Jèrriaises