Eune souoxantaine dé membres lus rêunîtent vendrédi, lé 25 dé févri, dans la Salle Pârouaîssiale dé St. Jean pour eune séthée d'portraits.
Moussieu et Mde. F. Guénier s'n allaient montrer lus portraits sus l'Cannada.
À c'menchi, les membres vîtent lé d'dans dé la vouaituthe qué Moussieu et Mde. Guénier fîtent lus viage auvec. I' fûtent trais s'maines et d'mie et viagîtent deux mille milles.
Moussieu Guénier explyitchit les portraits à m'suthe et ch'tait dé tchi supèrbe - les couleurs, et tout 'tait si propre et si trantchille, les riviéthes et lacs, auvec les montangnes qu'avaient la né dé l'année dé d'vant acouo sus l'haut.
À des pliaiches y'a des tabl'yes déhors pour lé monde à aver un pique-nique. Nou viyait les couleurs changi, qu'am'nait lé r'tchiyant d'la saison. Y'avait des bouais qui pathaissaient à d'l'or. Lé long des "Rockies" y'avait l'irrigâtion et la difféthence dé couleurs dé vert qué v'là tchi fait. Y'a deux riviéthes, lé Thompson et lé Frazer, qui joingnent et vont ensembl'ye à Vancouver. À la frontchiéthe dé l'Améthique et l'Cannada y'avait hardi d'motos, étant que l'monde font des acats en Améthique.
En r'vénant à Calgary, nou viyait les cascades et montagnes et en la Colombie Britannique lus fameux sapîns, et acouo eune fais les couleurs des bouais 'taient supèrbes. Y'avait des portraits d'eune fèrme dé seize mille carrées, fermée par lé péthe et ses fis, qu'ont quatre mille carrées chaque, auvec mille bêtes et des "silos" tchi tcheinnent 600 tonnieaux. À Toronto y'a des liefs en cappeur et un bâtisse dé 74 êtages, lé bâtisse Dominion. La veue dé la ville dé Toronto est supèrbe du haut d'chu bâtisse. Les membres vîtent les cascades dé Niagara des deux bords, l'Améthique et l'Cannada, et l'arc-en-ciel en d'ssus d'l'ieau. Y'a étout les cascades qui sont en forme d'un fé dé j'va et iou qu'l'ieau qui tombe est profond d'seize pids.
JEP 4/4/1977
(auve un mio d'rédaction)
Viyiz étout: