Les Pages Jèrriaises

Obsèrvâtions

Trenton, Michigan, USA.
L'preunmyi d'mai, 1982.

Moussieu l'Rédacteu,

L's écrituthes dé "Souos l'Hôlouoge" dé "Meridian" valent tréjous la peine dé liéthe et j'tais content d'vaie, dans la gâzette du tchinze d'avri, sén articl'ye au sujet des jaunes lîngnes dans les rues d'St. Hélyi. Bein des fais quand j'tais en Jèrri j'ai 'té ètonné d'vaie des grand's nombres d'motos stâtionnés sus ches jaunes lîngnes, et j'mé d'mandais pourtchi qué la police pèrmettait d'ité. Jé n'voudrais cèrtainement pon aver la tâche dé cachi les pompes dé la Brigade ("Fire Service") lé travèrs des êtraites rues d'la ville auve des motos stâtionnés des deux côtés d'ches rues en contravention d'la louai. Ch'est bein èvident qu'un tas d'monde sont trop pièrcheurs pour marchi deux pas quand i' sont à faithe lus boutiqu'sie et tch'i' risquent eune contravention à la pliaiche d'aller stâtionner dans iun des grand's bâtisses à stâtionner tchi sont dèjà à maintchi "gratte-ciels".

Comme nouos l'dit l'fanmeux "Meridian", ch'est incomprannabl'ye dé pâsser des louais et n'pon les faithe obéyi. Et les rues sont dêjà trop êtraites pour les gros camions tchi vouos défoncent l's ouothelles en pâssant, et vouos donnent eune bouffée d'air empouoaisonné à heunmer dans les poumons en même temps.

Eune chose tchi m'a tréjous êtonné étout est tch'il est pèrmîns dé n'arrèter pon à eune jaune lîngne ès carrefours et buts d'route dans les campangnes quand i' n'y a pon d'aut' vouaituthes en veue. Ch'n'est pon eune mauvaise idée si l'motoriste prend bouan soin d's'asseûther qu'la route est cliaithe. Mais pour iun tch'est accouôteunmé à cachi un moto en Améthique, v'là tchi pathait drôle, car la louai est si stricte au sujet ichîn et au Cannada qu'un motoriste arrète machinnalement au "stop sign" quand mème tch'i' n'y ait pon d'aut' motos en veue.

Eune aut' drôle dé chose, tchi montre l'influence des Quebécouais au Cannada - tch' ont mènagi à imposer l'ûsage dé la langue Française sus l' govèrnément fédéral du Cannada à côté d'la langue Angliaiche - est qué ouaithe qué en France lé mot Angliais "stop" ait 'té adopté pour arrêter les motos, au Cannada, où'est qu' la langue Française est veue auve la langue Angliaiche dans les lieux publyics, lé mot "arrèt" a rempliaichi l'mot "stop."

Dans la mème gâzette, j'ai grand r'gret d'vaie l'annonce du décès du Sieur "Jimmy" Job. J'lé connaissais dépis mil neu chent quarante-six, année d'ma r'traite et arrivée en Jèrri. Un homme tch'était tréjous bein av'nant et d'bouanne heunmeu. J'sommes tous à dgetter l's èvènements l'tou des Iles Falkland et ordgilleurs dé la manniéthe qué l' Angliétèrre a env'yé les frégates dé la Marinne Rouoyale dêlièment à r'prendre les iles otchupées par l' Argentinne. J'vai, dans la gâzette, les portraits des jannes frégatîns Jèrriais tchi sont dans les frégates, et ch'est mangnifique dé vaie qu' Jèrri est tréjous r'présenté dans les forches armées d' Angliétèrre. Et comme ou l'savez sans doute, L's États Unis sont du bouan côté.

J'tais intérèssi d'vaie qu'eune délegâtion dé "NATO" (ou "OTAN" en Français) a visité l'Île et tch'il a 'té r'chue dans la Chambre d's Êtats. Mais j'ai r'gret d'vaie qu' eune bande d'hommes et femmes 'taient à faithe eune démonstrâtion contre ieux. Ches gens-là éthaient deu èt' en travas à la pliaiche d'embèter l'monde. Jé n'criyais pon qué pathelle chose 'tait pèrminse en Jèrri. Et la r'mèrque dé iun des "délégués" qué si tout l'monde votait pour lé parti travailliste i' n'y' éthait pon bésoin dé démonstrâtions antinucléaires est intéréssante. Il a raison, sans doute, car les nâtions du mode libre, n'ayant pon dé d'fense, es'saient bein vite engaûmées par lé communisme!

Dans la colonne "Èrgardant à r'tchulons" dans la gâzette, j'ai r'mèrtchi tch'i' y'a dèjà chînquante ans dépis qué l'Révérend William George Tabb fut appointé Tchuthé à l'Églyise dé St Louothains.

J'rencontris l'Révérend Tabb à Ottawa tôt auprès m'n arrivée au Cannada en novembre, 1919. Il 'tait Recteu dé Bear Brook dans l'diocèse d'Ontario. Ma m'mée et mes fréthes lé viyaient d'temps en temps quand i' v'nait en ville et avait eune tâssée d'thée siez nous en pâssant. Il avait 'té ordonné Diacre dans l'églyise d' Almonte, Ontario, où'est qué m'n anmîn Edouard Joshua L'Maistre, dé mémouaithe respectée, né ès Carriéthes à St Ouën démeuthait. Et i' fut ordonné Prêtre dans la Cathédrale d'Ottawa. J'tais en Jèrri quand i' mouothit lé 16 d'août, 1971, et j'allis à s'n entèrrement. Il 'tait bein populaithe comme Recteu d'Saint Brélade. Un charmant corps et "Hail-fellow-well-met". comme nou dit en Angliais. Honneu à sa mémouaithe!

George d'La Forge

 

Viyiz étout:

 

Les Pages Jèrriaises