Lé 14 d'avri, 1984
Moussieu L'Rédacteu,
"Y'a-t-i' rein d'nouvé par siez vous?", nouos dit la bouannefemme Betté L'Cras quand j'la rencontrînmes dans L'Carrefour des Pèrrons en r'vénant d'la boutique à La Fontaine, Millais, St Ouën, Manman et mé, quand j'avais acouo les talons jaunes. "J'en r'veins, dé par siez vous, quand j'y pense. J'tais à baithe du thée siez Jean L'Cornu à North West. Mais i' n'faut pon qué j'reste trop longtemps à bavarder car i' m'attendent dé bouanne heuthe à La Tann'nie à L'Êta. Man bouannehomme s'en va jouer ès tchilles à l'hôtel à ces sé".
"Nouot grand, lé George, y va d'temps en temps, jouer ès tchilles à l'hôtel. J'n'en sommes pon trop d'avis, san p'pèe et mé, I' nouos sembl'ye qué v'là tch'encouothage les jannes à baithe. Ch'tait l'janne Ph'lippe Pa'ouel tchi l'em'nit là la preunmié fais. I' sont însépathabl'ye dépis tch'il allîdrent ensembl'ye à l'arsénal faithe lus sèrvice dans la Milice."
"Fûdrent-t-i' parmi les cheins tchi r'fûsîdrent dé marchi à la Grand' R'veue?" Missis Le Cras d'mandit à Manman.
"Oui dgia!", Manman lî dit, "et il' allîdrent en prison. Il' en sont ordgilleux. I' disent tch'il' ont aîdgi à êtablyi, eune fais pour toutes, qué ch'est l'drouait et l'honneu du Bataillon du Ouest dé marchi à la tête dé toute la Milice à la Grand' R'veue".
"Vouot' garçon Ouinn'teur y'était-i' étout, chutte fais-la?" ou d'mandit à Manman.
"Oui," Manman lî dit, "mais il 'tait dans l'deuxième rang d'la compangnie et l's autorités arrêtîdrent rein qu' les cheins du preunmié rang. Mais ou d'vez aver veu l'rapport dans la gâzette?"
"Véthe" ou nouos dît, "mais y'a dêjà eune volée et j'avais oublié les dêtails".
"Tch'est tch'i' y'a d'nouvé par siez vous?", Manman lî dit. "Mén homme travâle dans la p'tite forge dé la carriéthe à tremper l's ôtis pour les cârrieux, mais i' n'sait pon tch'est tchi s'pâsse car i' n'vait qu' les cârrieux. Ch'est difféthent dans la forge, car les fermièrs veinnent atout lus j'vaux et les nouvelles du jour".
"Ma fîngre," s'fit Missis Le Cras, "i' n'y'a pon grand' chose que nou pouôrrait appeler du nouvé dépis qu' la maîson à Mess Méthérel fut brûlée".
"Nou viyait l'feu par les f'nêtres des chambres à La Forge," s'fit Manman, "Ch'tait un vrai spectacl'ye, Tch'est tch'i' s'en va faithe, chu pouôrre homme?"
"Jé n'sai pon," nouos dit Missis Le Cras," J'ai ouî tch'il a des couôthîns en Angliétèrre et tch'il est à penser d'aller y d'meuther. Mais jé n'sai pon. Nou-s-en ouait tréjous d'toutes les sortes. Nou ouait, étout, tch'il a r'chu pus qu' la valeu d'sa maîson brûlée d'l'asseûthance. Mais ch'est p't-êt' du bavîn qu' les cheins tchi sont en faveur des asseûthances ont mîns par les c'mîns".
"Eh bein," s'fit Manman, "jé n'crai pon qué l'asseûthance es'sait bête assez d' condithe san conmèrce à pèrte d'même. En tout cas, lé feu tch'a dêtruit la maîson à Mess Méthérel mé fait penser qué v'là tchi pouôrrait s'arriver siez autcheune pèrsonne et qu' nou dév'thait asseûther. J'm'en vais en pâler à Mess de la Haye, l'agent, quand i' veindra à la forge aver sa machinne à pédales èrgraie".
"Bon," s'fit Missis Le Cras, "vouot' bouanhomme peut-i' les r'graie?"
"I' peut r'graie autcheune chose parmi la machinn'nie," Manman lî dit, "mais ch'est l'George tch'est vraiement au-fait entouôrre les bicyclettes, comme il' appellent ches machinnes à pédales. Y'a eune boutique en Ville ioù qu' nou peut l's acater et les faithe èrgraie. Lé propriêtaithe dé la boutique lî'a ouffèrt la tâche dé seurvilyi la partie du conmèrce tchi r'graie les machinnes, mais i' n'veurt pon s'en aller d'meuther en Ville. J'en sommes bein contents, san p'pèe et mé, car il est un fanmeux fétheux dé j'vaux. Et quandi tch'il est dans la forge, san p'pèe peut aller tremper l's ôtis à la carriéthe à L'Êta".
"En pâlant d'carriéthes," sé fit Missis Le Cras, "la p'tite carriéthe à côté du Châté d'Gros Nez est-alle acouo en allant?"
"Nannîn," Manman lî dit. "Ch'est à dithe pour lé moment. I' n'y'a ieu rein d'fait d'dans dépis qué l'Charlot Vibert pèrdit ses deux mains en êprouvant à dêchèrgi eune minne, tch'avait mantchi feu, atout san dgamm'peur".
"Mais comme lé temps s'pâsse!", sé fit Missis Le Cras. "I' faut qué j'mé dêpêche. Jé r'séthons dé r'veue. À la préchaine!".
Viyiz étout: