Le Ménage ès Feuvres,
St. Ouën.
Lé 31 d'août, 1974.
Moussieu l'Rédacteu,
Comme j'l'ai souvent mentionné, et comme j'l'êcrivis dans l'întroduction d'man livre, “Jèrri Jadis”, lé chein tchi n'a janmais fait d'èrreurs n'a janmais êprouvé à faithe grand' chose. Eh bein, j'en fis ieune en racontant les noms des miliciens d'la Compangnie d'St. Ouën d'La Milice Rouoyale tchi fûdrent condamnés à peine dé prison par lé Juge dé La P'tite Cour lé 9 dé mai, 1891, pour aver r'fûsé d'marchi en driéthe dé la colonne dé marche à l'occâsion d'La Grand' R'veue dé ch't année-là, sus les sablions d'La Baie d'St. Aubin. Man p'pèe en 'tait iun. Jé n'm'en vais pon vouos raconter touos les dêtails. Lé r'cit est tout au long dans man livre, et ou pouvez l'liéthe à la page 107.
Les noms des treize soudards condamnés sont donnés dans “Jèrri Jadis” comme étant Adolphus Carcaud Le Boutillier, Sèrgent, Arthur Elie Le Blancq, Corpotha, Philippe J. Syvret, Adolphus C. Hacquoil, Alfred de Vicq, Charles W. Vallois, Philippe Vallois, Charles Surcouf, Frank Le Cornu, Alfred Philippe Le Cornu, George Francis Le Feuvre, Philippe de la Perrelle, et Philippe George Hacquoil. Eh bein, chu drein nom, Philippe George Hacquoil, est en èrreur. I' dév'thait être Philippe George Powell. Ch'est en tchi bouannes gens, s'ou-s-avez “Jèrri Jadis” dans vouot' biblyiothèque, vouos pliaitha-t'i' crouaîsi l'nom dé Philippe George Hacquoil, et lé rempliaichi par lé nom dé Philippe George Powell.
La raison qu' j'ai dêcouvèrt la mêprînse est deue à deux bouans St. Ouënnais, Mêssieux Gerald Le Mèrquand et Hedley John Le Boutilyi. I' sé d'mandaient pourtchi qu' j'avais oublié d'mentionner l'nom du Sieur Powell comme étant iun des soudards atchûsés. Eh bein, ma rêponse, quand l'Sieur Le Boutilyi m'en pâlit à l'occâsion d'l'excursion d'L'Assembliée d'Jèrriais, 'tait qué, à ma connaissance dans l'temps, i' n'tait pon iun des atchûsés. Mais en consultant la “Récapitulation des principaux êvénements” dé l'année 1891 dans l'Almonas d' “La Nouvelle Chronique” dé 1892, j'trouvis l'mention qué lé 29 mai 1891, “le soldat Powell, l'un des insubordonnés du Premier Régiment, condamné à onze jours de prison, fait sa sortie aujourd'hui et reçoit une ovation par un grand nombre de St. Ouenais à la porte de la prison.”
J'ai don pensé tch'il 'tait nécessaithe pour mé d'consulter les r'cords mème dé la Cour, viyant qu' l'înformation qu' j'avais quand j'êcrivis lé r'cit dans “Jèrri Jadis” 'tait appathement fautive, et auve l'autorisâtion grâcieusement accordée par Moussieu l'Avocat T. E. Dorey, Greffyi d'La Cour Rouoyale et auve l'aîgue dé Moussieu Peter Bisson j'ai ieu l'privilège d'examinner l'compte rendu des procés d'vant La Cour de Police Correctionnelle et j'ai tout d'suite veu qué l'nom qu' j'avais r'cordé comme Philippe George Hacquoil éthait deu être Philippe George Powell. Ch'est assez r'mèrquabl'ye qué ches deux noms là sont r'cordés iun directement en d'ssous d'l'autre dans l'accompte des procés du même jour dévant la Cour, entendu, sans doute, qué l'Sieur Philippe George Hacquoil 'tait d'vant l'Juge pour tchique contravention tchi n'avait rein à faithe auve la Milice, et qu'ch'est bein aîsi d'conter iun pour l'autre dépis qu' lus noms d'baptême sont touos les deux Philippe George, et ch'tait appathemment d'mème qué l'èrreur fut faite en preunmié lieu.
Enfîn j'sis bein content d'pouver corrigi l'affaithe. En mème temps, j'm'en vais vouos dithe combein d'prison tch'i' fut donné à châtchun d's atchûsés, un détail tchi n'est pon mentionné dans “Jèrri Jadis”. Lé Sèrgent Adolphus Carcaud Le Boutillier, huit jours dé prison; l'Corpotha Arthur Elie Le Blancq, siex jours; les soudards Philippe J. Syvret, trais jours, Alfred de Vicq, Charles W. Vallois, Philippe Vallois et Charles Surcouf, châtchun 24 heuthes, Frank Le Cornu, dgiex jours, Alfred Philippe Le Cornu et George Francis Le Feuvre, trais jours, et Philippe George Powell, onze jours.
Appathemment, lé Sieur Powell fut considéthé êt' lé chef des “insubordonnés” dépis tch'il eut pus d'prison qu' touos l's autres. J'ai 'té pûtôt êtonnée d'vaie qu' man p'pèe n'en eut qué quat' jours (j'avais tréjous ouï qué ch'tait dgiex jours), car li et l'Sieur Powell 'taient grands anmîns, et i' célébrit l'occâsion d'la sortie d'prison auve lé Sieur Powell à l'Hôtel dé La Grève dé Lé. Ma m'mèe m'a tréjous dit tch'il' en avaient tout pliein à bord quand la séthée fut finnie et tch'i' r'vîndrent siez ieux!
En considéthant l'affaithe au jour d'aniet, nou pouorrait penser qu' les miliciens dans la Compangnie d'St. Ouën 'taient dans l'tort en r'fûsant d'marchi viyant qu' la compangnie n'avait pon 'té mînse en tête dé la colonne dé marche comme ch'tait san drouait. Mais y'avait l'ordgi d'précédence, et ch'tait eune affaithe dé prîncipe. Il' 'taient aussi prêts à lus battre pour un prîncipe comme lus anchêtrès fûdrent prêts à lus battre contre les Français au Baron dé Rullecourt à la Batâle dé Jèrri lé six d'janvyi, 1781, justément chent dgiex ans d'vant!
George d'La Forge
Viyiz étout: