Le Ménage ès Feuvres.
Lé 23 d'septembre, 1965.
Moussieu l'Rédacteu,
À ch't heu tch'i' y'a si p'tit d'noms Jèrriais dans l's annonces des naîssances et d'mathiages qué nou vait dans la gâzette, ch'est merveilleux pour lé vraie Jèrriais d'vaie les bieaux vièrs noms des fonctionnaithes, des mêssieux et des gens à la tête d's affaithes en Jèrri lé temps passé!
Quand j'viyais les noms des Récteurs de nouos pâraisses dans un vièr almonnas dé dgiex-sept chent nénante-sept qué j'lièsais l'aut' sé en m'passant l'temps, v'la tch'i' m'fit penser ès changements dans nouot' p'tit pays dépis chu temps-là. À l'heuthe actuelle, j'n'avons qu'deux Récteurs - Moussieu L'Canon Norman d'St. Sauveux dé l'Épinne, et Moussieu Richardson d'St. Ouën - tch'ont des vrais noms Jèrriais. Ch'est vrai qu'Moussieu Tabb dé St. Brélade est Jèrriais, mais san nom, comme lé chein du Juge Hammond, mentionné pus tard, est un nom Angliais. Né v'chîn les noms des cheins d'mil sept chent nenante-sept : François Le Breton 'tait Douoyain et Récteur dé St. Sauveux dé l'Êpinne. Les Recteurs des aut' paraîsses 'taient : Jean La Cloche à La Trinneté, François Valpy à Ste. Mathie, Amice Bisson à St. Louothains, François Le Couteur à St. Martîn d'Grouville, George Bertram à St. Brélade, Philippe de La Garde à St. Martîn lé Vieux, Edouard du Pré à St. Hélyi, Clément Dumaresq à St. Cliément, Jean Mallet à St. Pierre, François Richard à St. Jean et George du Heaume à St. Ouën.
Un vièr almonnas dé mil huit chent quatre (y'a dêjà chent souoxante ans dépis ch't année-là!) donne lé nom du Très Honorable Henri Frederick, Lord Carteret, Baron dé Hawnes et Seigneur du Conseil, comme étant l'Bailli d'l'Île. Lé Douoyain 'tait Vénérabl'ye Homme Edouard du Pré, l'Protchuleux Général 'tait Thomas Le Breton, Josué Pipon 'tait Avocat Général, et l'Vicomte 'tait Matthieu Gosset.
Les Jurés Justiciers 'taient Edouard Le Maistre, Nicolas Messervy, Philippe Robîn, Jacques Hemery, Jacques Hammond, Charles de la Garde, François Janvrin, Pierre Mauger, Jean de Carteret, Philippe de Carteret, Thomas Pipon, fis Jean, et Jean Poingdestre.
Lé chef dé la Marine Rouoyale stâtionnée en Jèrri 'tait l'Amitha Philippe d'Auvergne, Duc dé Bouillon!
En liêsant, les vièrs almonnas nou trouve des noms d'fanmiles qué nou n'vait pon d'nouos jours. Y'avait des Bourdons en Jèrri au temps jadis. Maître Aaron Le Bourdon 'tait l'Prévôt d'St. Sauveux d'l'Êpinne. Parmi les fermiers y'avait des Villeneuve et des Ingouville et des Ricard. Dans la Milice Rouoyale y'avait d's officièrs nommés Pellier, Sorel, Peigué, de La Taste, du Jardin, et l'Coronel du bataillon d'St. Hélyi en 1804 'tait Guillaume Patriarche! Jean Millais 'tait Officyi d'Connêtabl'ye à St. Hélyi et les noms Salmon, Bélin, La Gerche, Lerrier, Béchervaise et bein d'aut' tch'ont quâsi dispathu 'taient communs dans chu temps-là.
Ch'est r'mèrquabl'ye qué j'avons acouo dgiex Connêtabl'yes sus douze tch'ont des vièrs noms Jèrriais. Les Connêtabl'yes d'pâraisses en dgiex-sept chent nénante-sept 'taient : Clément Bailhache à St. Ouën, Aaron de Veulle à St. Cliément, Josué Pipon à St. Brélade, Jean Dumaresq à St. Pierre, Jean Dumaresq, du Gros Puits, à St. Sauveux d'l'Êpinne, Nicolas Arthur à Ste. Mathie, Elias Bertram à St. Martîn d'Grouville, Philippe Pinel à La Trinneté, Jean Luce à St. Louothains, Philippe Nicolle à St. Martîn le Vieux, Clément Hemery à St. Hélyi, et un aut' Philippe Nicolle à St. Jean.
Ch'tait intérêssant d'lièthe la lettre du Sieur Harris du Sud d'L'Afrique dans la gâzette du 22 d'septembre, 1965, au sujet du portrait du Vièr Marchi par John Sullivan. J'en ai iun, d'ches portrait-là. La date en d'ssus d'la porte dé la Cohue Rouoyale dé chu temps-là est 1520, et la couleu du Lieut'nant Gouvèrneux montre l'année de 1738. Les noms sus lé d'vant des boutiques, Ct. Navet, H. Le Porc, M. Le Boeuf, G. Amy et R. Mouton, sont péthinmés en Jèrri à ch't heu, sénon l'chein du Sieur Amy, mais il est probabl'ye qué les noms d'Navet et d'Mouton n'taient pon Jèrriais. M'n anmîn Fraînque Le Maistre, tch'a eune connaissance èrmèrquabl'ye des originnes d'un tas des noms qu'nou vait ichîn et là, m'dîsait l'aut' jour qué John Sullivan, lé dessinateur du portrait, fut né en Jèrri et tch'il 'tait fis Jean et avait 'té auteur dé prose et poësie en langue Jèrriaise dans san temps.
Y'a ieu des Jèrriais ou lus d'scendants dans l'Nouvieau Monde tch'ont changi lus noms viyant qué les Canadgiens d'originne Angliaîche, et l's Améthitchains, avaient d'la peine à les prononcer comme i' faut! Un Le Maistre changit san nom à Masters (prononcé en Angliais), et en Améthique un Messervy s'appelle Méseûve. À La Côte, des Mauger sont dev'nus Major (prononcé en Angliais étout), et l'bieau vièr nom d'Béchèrvaise est prononcé Bé-tcheux-vi. Quand j'tais soudard à la dgèrre de 1914 j'rencontris un Le Rossignol dans un régiment Canadgien tch'avait tout sîmpl'yément traduit san nom à l'Angliais dé Nightingale.
Hélas! Où-est tch'i' s'en vont, les bieaux vièrs noms Jèrriais?
George d'La Forge
Viyiz étout: