Le Ménage ès Feuvres,
St. Ouën.
Lé 10 d'juin, 1972.
Moussieu l'Rédacteu,
Papa j'lî dis eune séthée quand j'tais mousse et qué j'tions assis au pid du feu auprès l'thée, quand Mess Hubert 'Dgainn'tîle' est v'nu à la forge aver sa jeunment féthée à matîn, i' t'a dit : Ch'est l'Dgiâbl'ye tchi bat sa femme et mathyie sa fil'ye!'. Tch'est qu' ch'la veurt dithe?
Eh bein, man garçon, i' m'dit, as-tu r'mèrtchi tch'i' tchiyait d'la plyie quand il est v'nu?
Oui, j'lî dis. Et tu'as tchitté à soûffler pour freunmer les grand' portes.
La drôle de chose, Papa continnuit, est qué l'solé r'lisait quand mème qué j'avions eune avèrse, et, ch'est quand i' tchait d'la plyie et qué l'solé r'lis en mème temps qué nou dit qué l'Satan est à battre sa femme et mathier sa fil'ye. Ch'est un vièr diton.
Mais l'Satan et l'Dgiâbl'ye sont-i' deux difféthentes pèrsonnes?, j'lî d'mandis.
Nannîn, i' m'rêponnit. J'appélons tchiquesfais chu mauvais sujet-là l'Dgiâbl'ye, lé Satan, lé Démon, l'Malîn Esprit, lé Forteune et l'Pid-froutchi.
Et l'balle-à-leunettes, j'lî dis. Tu sai bein, l'chein qu' Manman soulait m'dithe tch'i' veindrait mé qu'si si j'tais mêchant. Est-che lé Dgiâbl'ye étout?
Eh bein, Papa m'dit, nou pouôrrait quâsi dithe qué oui, ouaithe qué l'Balle-à-leunettes est pûtôt un p'tit dgiâbliotîn tchi n'aime pon vaie l's êfants d's'obéi ou êt' mêchants.
L'as-tu janmais veu, l'Satan?, jé d'mandis à Papa.
Nannîn, i' m'rêponnit, mais j'ai ouï tch'i' y'a des gens tchi l'ont veu. J'connaîssais un homme dans san vivant tchi m'dit qu' en passant entre les deux mangnièrs dé Vînchelez eune séthée dans san quèrre, un moussieu l'arrêtit et lî d'mandit où'est tchi'i' s'en allait. J'm'en vais jusqu'à la salle parouaîssiale dé St. Jean,' i' lî dit. 'Pouv'ous m'porter jusqu'au carrefour tchi mène au Creux du Vis?' 'Oui dgia!' i' lî dit. 'Jé s'sai bein content d'aver d'la compangnie en c'mîn'. L'moussieu avait un grand nièr chapé atout des larges bords, et nou n'pouvait pon lî vaie fort sa fache, et il avait eune néthe grand' câsaque tchi l'couvrait jusqu'ès pids. Lé v'la don assis à côté d'l'homme dans l'quère et il 'tait charmant en convèrsâtion - comme eune pèrsonne d'êducâtion et tch'a un tas dé p'tits boudîns dans la tête. I' pathaîssait saver tout entouor les gens d'St. Ouën, et i' nommait les cheins tch'allaient à l'églyise et les cheins tchi jouaient ès cartes pour des sou.
Lé temps s'passit vite en c'mîn, et arrivés au carrefour tchi mêne au Creux du Vis l'moussieu d'scendit du quTrre, et l'homme s'appèrchut - à la lueu d'la lantèrne - qué l'moussieu tch'i' v'nait d'transporter avait l'pid-froutchi! I' n'faîsait qu' d'en frémi quand il y pensait en s'en r'vènant d'St. Jean tout seu dans la niet, mais i' n'en r'vit janmais rein, du moussieu pid-froutchi!
Mais i' n'avait pon veu ses cornes?, j'dis à Papa.
Nan dgia!, i' m'dit. I' faut craithe qué ch'tait pour les muchi tch'il avait un grand nièr chapé.
Y'en a-t-i' d'aut' tchi l'ont veu, l'Satan?, j'lî d'mandis.
Ch'est probabliément seux qu' oui, i' m'dit. Mais à ch't heu qu' tu'as gangni La Litourgie à l'Êcole du Dînmanche à St. George tu n'as qu' à l'ouvri à la page 74 tchi donne la Collecte, l'Êpitre et l'Êvangile pour lé preunmié Dînmanche du Tchithème. Dans l'Êvangile sélon St. Matchi, chapitre 4, tu vèrras qué Notre Seigneu Li-mème vit l'Dgiâbl'ye fache à fache. Lé Seigneu avait jeûné dans lé d'sèrt pour quarante jours et nyits et avait faim, et l'Démon appathut et l'tentit d'touanner les pièrres en pains et d'mangi. Quand I' r'fûsait, l'Démon êprouvit à l'faithe sauter du haut du templ'ye en lî disant qu'San Péthe Céleste envièthait Sés Anges à l'empêchi dé s'faithe du ma en sautant. Et finnalement il enm'nit l'Seigneu au haut d'eune montangne et Lî montrit les rouoyaumes et richesses du monde et Lî dit tch'i' n'avait qu' à s'prostèrner pour les posséder. Mais Notre Seigneu lî dit : 'Va-t-en, Satan, car il est êcrit Tu adoreras le Seigneur ton Dieu et le serviras Lui-seul!'
J'éthais peux si j'lé viyais!, j'dis à Papa. Et mé étout!, i' m'dit. Mais i' n's'en va pon nouos embêter si j'sommes dêtèrminnés d'faithe la volonté du Bouan Dgieu, et quand tu fus bâptîsi à l'églyise par Moussieu PépIn, tes parrain et marraine promîndrent en tan nom dé r'nonchi au Dgiâbl'ye et à toutes ses oeuvres. I' l'sait bein, sans doute, lé Dgiâbl'ye, et ch'est seux tch'il êprouvetha à t'tenter comme il êprouve à tenter touos les Chrêtchiens, mais i' n'peut rein contre té quand tu t'comporte comme i' faut et qu' tu dis tes priéthes.
Tan Papa Giffard en a fait iun en bouais, un Satan, cornes, coue auve lé barbet au but, pid-froutchi et toute la pêque. Il est mâté dans l'tout bas du Creux du Vis et un tas d'monde vont l'vaie. Ch'est p't êt' pour ch'la qué l'creux c'menche à êt' appelé l'Creux au Dgiâbl'ye'. Si tu'es un bouan garçon, j'îthons l'vaie ensembl'ye tchique Dînmanche l'arlévée.
George d'La Forge
Viyiz étout: