Les Pages Jèrriaises

Jean Philippe "Turnkey" Giffard (1826-1892)

 

L'vièr dgiâbl'ye au Creux du Vis

Jean Giffard (ou John Giffard) 'tait iun des pus întéthessants stchulpteurs d'Jèrri. I' tait navidgant, gardgien d'prison, et dans sa jannèche i' sembl'ye qu'il a 'té un mio fraudeux étout (comme tout bouan Jèrriais!).

En mé duthant les longs viages il apprînt la stchulptuthe en bouais et i' sembl'ye qu'il a c'menchi à faithe des poupettes d'navithe. Autchun d'ches poupettes n'ont survêtchu jusqu'ès nos jours, mais nou peut vaie un mio l'êffet si nou r'garde les fidguthes sus la côtchiéthe d'l'aubèrge "La Grappe dé Vèrjus" (ach'teu The Lamplighter) en Saint Hélyi. I' fît des stchulptuthes en pièrre étout: il travaillit dans l'églyise Êcossaise d'Saint Colombe dans Midvale Road en Saint Hélyi et i' fît étout des tombieaux pouor les chînm'tchiéthes.

I' 'tait bein connu pouor aver stchulpté l'Dgiâbl'ye qu'nou viyait aut'fais au Creux du Vis.

S'ous allez au chînm'tchiéthe d'Almorah en Jèrri et , à l'entrée, ou touônnez à drouaite, ou trouv'thez lé tombé dg'ieune Mlle Combois, stchulpté par Jean Giffard. Ch'na vaut la peine d'vaie.
Lé tombé d'Mlle Combois
Lé tombé d'Mlle Combois dans l'chînm'tchiéthe d'Almorah
 

 

Lé tombé d'Mlle Combois
Lé tombé d'Mlle Combois dans l'chînm'tchiéthe d'Almorah

J'avons acouo eune raîson pouor célébrer Jean Giffard, car i' tait lé grand'péthe à George d'la Forge (George F. Le Feuvre) - lé pus grands d'nos auteurs Jèrriais du vîngtchième siècl'ye. Né v'chîn tchiques textes entouor Jean Giffard:

 

Lé tombé d'Mlle Combois
Lé tombé d'Mlle Combois dans l'chînm'tchiéthe d'Almorah

 

Ma connaissance dé Papa Giffard n'est qué chein qu' M'mée m'racontit, car j'n'avais qu' tchînze jours quand i' mouothit. Lé Cap'taine Giffard 'tait machon et stchulpteux. Il ouvrageait des poupettes en bouais pour les d'vants des batchieaux à vaile. I' fit étout des lions en pièrre, d'la grandeu d'l'annima même, tchi fûdrent pliaichis dans l'bel d'la Prison. Ma femme, la chiéthe May, et mé les vîtent quand j'visitînmes Jèrri duthant la preunmié dgèrre. Papa Giffard avait 'té chef gardgien là pour des années.

D'autres de ses stchulptuthes comprannaient un Venus dé Milo en pièrre, expédiée à Londres, eune statue du Dgiâbl'ye, en bouais, pliaichie à La Touothaille, en Jèrri, où'est qu'ou restit jusqu'à 1930 ou d'même, et des stchultuthes sus lé d'vant d'eune storre dans la Rue Mulcaster. Sa dreine oeuvre 'tait eune statue en pièrre, en grand, dé deux anges auves des ailes, jouant la trompette. Il avait idée d'aver chutte statue-chîn pliaichie sus sa sépultuthe dans l'chînm'tchiéthe dé l'Églyise dé St. Pièrre mais, duthant l'transport, la reue du tchéthiot rompit et la statue tchit et d'pichit. M'mée dit tch'il avait prîns longtemps à finni chutte tâche-là et 'tait si dêsolé entouor sa pèrte qu'i' tchittit d'stchulpter.

Un jour, justément d'vant tchitter St. Pièrre, deux méssieurs en câsaques à pannieaux vîndrent en cârrosse et pâlîdrent à M'mée pour eune volée. En sortant i' s'êssuyaient les lèrmes des ièrs, M'mée m'dit tch'i' 'taient les deux p'tits fréthes à Papa tchi v'naient justément d'arriver d'Londres et n'savaient pon qué Papa 'tait mort. Né v'là la dreine fais qué j'les visse ou qu' j'en ouisse pâler. S'lon M'mée, san grand-grand-péthe patèrnel 'tait architecte à Londres et avait mathié la Comtêsse dé la Motte (eune seule êfant) d'eune fanmil'ye d'aristocratie Nouormande. I' la dêconnûtent pour aver mathié parmi lé m'nu peupl'ye et la forteune dé la fanmil'ye êtchit au Gouvèrnément Français.

Papa Giffard avait 'té mathié auve Mary Susan Lé Boutilyi dans l'Êglyise dé St. Sauveux, en Jèrri, par lé Douoyen L'Bréton (lé péthe à la fanmeuse Lillie Langtry). Enfîn, M'mèe n'avait qu' deux ans quand sa m'mèe Susan mouothit, et la deuxième femme à Papa, née Lé Clièr, 'tait la manman qué j'connaissais et aimais comme mousse quand jé d'meuthions dans la belle blianche caûminne dans la Vallée d'St. Pièrre.

La vie et l's amours d'un Jèrriais transplianté Sidney George Le Feuvre Jersey Evening Post 5/12/1986

 

 

Acouo un p'tit pus liain dans la gâzette, je v'nons à chein tch'est, pour mé, "la pièce de résistance". Ch'est l'annonce dé la restaurâtion et les portraits d'l'aubèrge appelée "The Grapes" dans La Rue Mulcaster en Ville. Lé "Turnkey Giffard" tchi stchulptit les grappes 'tait man grand-péthe matèrnel John Philippe Giffard, tchi stchulptit un tas objets dans l'bel dé la Prison. L'almonas d'"La Chronique de Jersey" dé 1859 lé mentionne comme "Gardien" dé la Maîson dé Correction, et sa femme Mary Giffard comme Matrone. I' sont acouo là en 1865 et 1867, mais chutte fais Papa Giffard est mentionné comme "Guichetier" dé la Prison.

John Philippe Giffard mouothit en 1892 et fut entèrré dans l'chînm'tchiéthe dé l'églyise parouaîssiale dé St. Pièrre. Né en Jèrri, il 'tait provenu dé ieune des fanmil'yes Giffard d'Angliétèrre. Ma m'mée m'disait dans san vivant tch'il avait deux fréthes tch'étaient architectes à Londres. Il 'tait bein connu comme stchulpteux en Jèrri dans san temps et ch'tait li tch'avait stchulpté la grand' partie d's objets tch'ornaient les Caves dé Champion (mênommées "Troglodyte Caves") à La Crouaix d'Bouais.

George F. Le Feuvre 7/5/1983

 

La Grappe dé Vèrjus
La Grappe dé Vèrjus
 

 

Ma m'mée 'tait la fille à Cap'taine Jean Philippe Giffard (1826-1892). I' mouthit quand j'n'avais qu'un an, et j'ai tréjous r'gretté dé n'l'aver pon connu. Il 'tait stchulpteux. Ch'tait li tch'avait stchulpté l's armueûthies d'Angliétèrre tchi sont en d'ssus d'la côtchiéthe dé la prîncipale maîson dans l'bel dé la prison en Ville. Il avait stchulpté toutes sortes d'choses et d'înmages, mème eune statue du chef "Citiwayo" des Zoulous en Afrique, qué nou viyait ès Caves dé Champion à La Crouaix d'Bouais quand j'tais mousse. Et ch'tait li tch'avait fait l'preunmié dgiâbl'ye tchi faîsait la garde dans l'Creux du Vis (mênommé l'Creux au Dgiâbl'ye) à Ste. Mathie.

Jèrri Jadis George F. Le Feuvre

La Grappe dé Vèrjus
La Grappe dé Vèrjus - détail

 

Jé n'pouorrai janmais oublier Les Caves dé Champion car ch'tait man grand-péthe matèrnelle, lé Cap'taine Jean Philippe Giffard, tch'avait fait et stchulpté à bein près toutes les dêcorâtions, estatues, stchulptuthes et aut' objets tch'étaient là. I' dait y'aver acouo des Jèrriais tchi s'èrsouveinnent d'aver veu les souô-dîsantes Caves dé Champion, car i' n'taient pon des caves.

L'empliaîchement 'tait un pid ou deux en d'ssous du nivé des tèrres à s'n alentou, et y'avait un p'tit êtang emmuthailli au mitan d'l'empliaîchement auve eune manniéthe dé tour dans l'mitan d'l'êtang auve des grand' f'nêtres en vèrre dé toutes les couleurs - un vrai "empire des fées" pour les mousses dé chu temps-là tchi n'avaient pon la télévîsion à lus montrer les mèrveil'yes du monde comme à ch't heu.

Y'avait des p'tites salles bâties l'long des muthâles tch'entouothaient les souô-dîsantes caves, et toutes sortes d'objets d'dans, d's ornements, des "bustes" dé la Reine Victoria et du Prînce dé Galles et d'la Prîncêsse Alexandra, et d'aut' membres dé la fanmil'ye Rouoyale, et d's armeûethies sus les muthâles.

Ieune des grandes attractions 'tait eune estatue qué Papa Giffard avait stchulpté dé Cetywayo, chef des Zoulous. La chose èrmèrquabl'ye était qué l'estatue était d'un homme physiquement compliet; ch'est en tchi i' fallut lî mett' un p'tit cotillon pour muchi chein tchi n'sé montre pon. Mais lé mot tch'i' y'avait tchiquechose à vaie souos l'cotillon fut chuchoté par les uns et l's aut', et des femmes tch'allaient pâsser l'arlévée là, en r'gardant l'tou d'ieux sans faîsant la minne dé rein pour vaie tch'i' n'y'eûsse pèrsonne à les r'garder, souôl'vaient l'cotillon pour satisfaithe lus tchuthiôsité. Et i' n'taient pon d'sappointées!

V'la tch'était amûsant, et en même temps embarrassant pour les propriêtaithes des caves, et pour y porter r'miède i' lus dêcidîdrent dé bâti un p'tit carré appartènement auve eune ouvèrtuthe dé la grandeu d'eune fénêtre en d'vant pour louogi l'chef Cetywayo. Mais v'la tchi n'changit pon la tchuthôsité des femmes. Ch'tait même en lus faveur car, sans êt' appèrchues par tout l'monde comme quand l'estatue 'tait à l'ouvèrt, i' n'avaient qu'à freunmer lus parasol et l'pâsser par l'ouvèrtuthe tchi r'présentait la f'nêtre et souôl'ver lé d'vant du cotillon auve lé but!

George d'La Forge Jersey Evening Post 30/7/1977

 

Lé Creux du Vis
Lé Creux du Vis

 

Lé Creux du Vis, appelé Lé Creux d'La Touothaille dans les touos vièrs temps viyant tch'il est dans l'fond d'eune crévasse faite comme un vis ou eune touothaille, m'a tréjous întérêssi viyant qu'la preunmiéthe estatue du dgiâbl'ye, en bouais, avait 'té en partie faite par man grand-péthe matèrnel, lé Cap'taine Jean Philippe Giffard, tch'était stchulpteux, dans l'temps tch'i' d'meuthait au bas du Mont d'Ste. Mathie dans La Vallée d'St. Pièrre...

I' n'y'eut pon fort dé débris du naûfrage tchi vînt à tèrre, mais la poupette du navithe fut trouvée. Oulle 'tait v'nue à fliot l'travèrs du creux au bas du Vis, et i' pathaît qu'oulle avait eune èrsembliance au Satan, et tchitch'un eut l'idée d'aver man Papa Giffard à v'nîn la vaie. I' fallait tch'i' fûsse dé la mème idée au sujet d'la r'sembliance au dgiâbl'ye, car il emmenit la poupette siez li et lî mînt des bras et des gambes et un pid fourtchi, et des cornes et eune coue auve eune èrchelle au but, et né v'là un vrai dgiâbl'ye en bouais pret à faithe la garde dans L'Creux du Vis, et j'pense bein qué v'là tchi fit les gens l'appeler L'Creux au Dgiâbl'ye viyant tch'i' l'viyaient là!

Malheûtheusement, j'n'avais qu'à peine treize mais quand Papa Giffard mouothit lé 24 d'octobre 1892, et jé n'l'ai don pon connu, mais Papa et Manman L'Feuvre m'ont souvent dit quand j'tais mousse tch'il' avaient veu l'dgiâbl'ye dans s'n appentis dans La Vallée d'St. Pièrre dans l'temps tch'il 'tait à lî mettre les bras et aut's membres en pliaiche. Il 'tait un supèrbe stchulpteux.

Histouaithes et Gens d'Jèrri George F. Le Feuvre

 

 

Y'a un bieau portrait d'la côtchiéthe dé la vielle prison dans la gâzette du treize dé mar tchi montre l's armueûthies d'la Couronne en d'ssus d'la grand'porte du mitan. I' fûdrent faites par man Papa, l'Cap'taine (et stchulpteux) John Philippe Giffard. J'sis bein content d'vaie qué l's architectes sont d'avis qué l'bâtisse èrprésente la pus belle architectuthe dé Jèrri et qu'ou vaut la peine dé consèrver. S'il est possibl'ye dé dêtachi l's armueûthies d'la côtchiéthe sans l's endommagi quand l'bâtisse s'sa démonté ou abattu, j'ai d'mandé ès autorités dé m'les donner pour les garder au Ménage ès Feuvres en mémouaithe dé Papa Giffard.

George F. Le Feuvre Jersey Evening Post 15/5/1975

 

 

V'là tchi m'fait grand pliaîsi d'vaie qué, grâce au fanmeux discours qué l'Député P.M. de Veulle fit dans L's Êtats l'aut' jour, et la généthôsité et l'bouan sens d'La Chambre, l's autorités s'en vont présèrver la côtchiéthe dé la vielle prison. Dans un mangnifique articl'ye dans la gâzette du trais d'octobre, lé Sieur Robin S. Cox nouos dit "tch'il est dit" qué l's armeûthies Rouoyales en d'ssus d'la date 1812 sus lé d'vant d'la côtchiéthe avaient 'té faites par lé "Guichetier" Giffard. Eh bein, i' n'y' a pon d'doute au sujet. Y'a tchiques années, Moussieu Moon, lé Gouvèrneux d'la prison, m'dit qu'iun d'ses empliyés avait mînt eune êtchelle en pliaîche et tch'il avait examinné l's armeûthies d'près, et qu'la sîngnatuthe du Sieur Giffard 'tait d'ssus, et la date dé l'année étout.

John Philippe Giffard, pus tard "Cap'taine" Giffard, 'tait man grand-péthe matèrnel. Il 'tait un fanmeux stchulpteux, et ch'tait li tch'avait fait toutes les stchulptuthes dans les caves dé Champion, mênommées "The Troglodyte Caves" à La Crouaix d'Bouais, à St. Sauveux. Et ch'tait li tch'avait fait l'estatue dé "Citiwayo", Chef des Zoulous, tch'était là étout.

George d'La Forge JEP 17/10/1975

 

 

Lé nom d'man grand-péthe matèrnel, John Philippe Giffard (1826-1892), a 'té mentionné dreinement comme jé l'disais dans ma lettre du quatre dé chu mais, comme étant guichetier à la prison dans l'temps tch'i' stchulptit l's armeûthies rouoyales tchi sont sus lé d'vant d'la côtchiéthe du grand bâtisse tch'est si fanmeux comme architectuthe qué L's Êtats ont décidé d'la présèrver en la dêmontant, pièrre par pièrre, et d'les nunméthoter pour pouver les r'bâti d'tchiquebord dans tchique temps...

Papa Giffard mouothit siez li dans la Vallée d'St. Pièrre en 1892. Il est entèrré dans l'chînm'tchiéthe dé chutte pâraîsse là. Comme j'n'avais qu'un an dans chu temps-là, jé n'mé r'souveins pon d'li, mais j'm'èrsouveins d'aver veu s'n "atelier" tchiques années auprès san décès, tchitch'eunes dé ses stchulptuthes qué ma m'mée avait présèrvé, mais jé n'sai pon tch'est tch'en est dév'nu auve lé pâssage du temps.

J'sai bein qué ch'tait li tch'avait fait l'preunmié dgiabl'ye en bouai tchi soulait êt' dans l'font du Creux d'la Touothaille, appelé étout Lé Creux du Vis, et mênommé l'Creux du Dgiabl'ye, et tchi finnit par êt' volé et mâté sus l'haut d'Nièr Mont. Jé n'sai pon tch'est tch'en d'vînt auprès tch'i' fut dêcouvèrt là.

George d'La Forge 24/10/1975

 

 

"En pâlant d'faches dé bouais," j'dis à Papa. "Papa Giffard en faîsait, li, en bouais. J'avons la tête dé la Reine Alexandra, tch'i' stchulptit, dans l'gardîn et oulle est si bein faite qué nou dithait qu'oulle est en vie. Et quand j'allis à St Pièrre vaie l'dgiâbl'ye tch'il avait stchulpté pour mett' dans L'Creux du Vis, la fache pathaîssait quâsi en vie étout."

"Vaithe, man garçon", i' m'dît, "tan Papa Giffard 'tait un homme absolûment doué. Ch'est danmage qué tu n'l'as pon connu, car tu n'avais qu' un an quand i' mouothit en 1892. Quand j'éthons la chance, j't'emmèn'nait ès Caves dé Champion à La Crouaix d'Bouais. Là, tu vèrras un tas d'ses stchulptuthes. Et y'en a un tas dans l'bel dé la Prison en Ville. Tch'est tchi sait, j'pouôrrais p't-êt' aver pèrmission dé t'montrer ches'là étout. I' faudra qu' j'en pâle au Connêtabl'ye d'Auvergne."

George d'La Forge 9/7/1983

 

 

Ch'tait li étout, tch'avait stchulpté l's êmânues et décorâtions ès Caves dé Champion à La Crouaix d'Bouais aut'fais, et l's armueûthies d'Angliétèrre, acouo en plieine veue au haut d'la côtchiéthe dé la maîson prîncipale dans l'bel dé La Prison. J'mé d'mande s'i' s'en vont l'abattre quand la neuve prison s'sa ouvèrte à La Mouaie à St. Brélade. Si oui, j'ai envie dé d'mander à Moussieu l'Vicomte dé m'donner la pliaque pour la présèrver et la mett' dans l'bel du Mênage à sèrvi d'monûment à la mémouaithe dé Papa Giffard!

George d'la Forge Jersey Evening Post 24/8/1970

 

 

Dans chu temps-là (j'pâle dé y'a huiptante-chînq ans) nou criyait qué l'Satan hantait les c'mîns la niet, et nou n'éthait janmais pensé dé d's'obéi ès pathents dé peux tch'i' fûsse învité à v'nîn nouos qu'si. Man Papa, Cap'taine Jean Ph'lippe Giffard, en avait fait eune estatue, du Dgiâbl'ye, tch'était visibl'ye dans l'fond du Creux d'Vis (mênommé "Devil's Hole"), et v'là tchi donnait eune idée ès mousses dé s'n appathence. Il avait des pids en chabots fourtchis, eune longue coue atout un didget barbelé au but, et des cornes sus l'haut d'la tête comme un bichot.

George d'la Forge JEP 15/4/1981

 

 

l'Dgiâbl'ye du Creux du Vis

L'Dgiâbl'ye du Creux du Vis, photo d'1955

Il avait des cornes sus la tête, et un visage comme un bichot, et iun d'ses pids 'tait fourtchi comme les pids d'eune vaque, et il avait eune longue coue auve un barbet au but, et san corps 'tait couvèrt dé pé comme eune biche. Ch't' înmage-là d'li 'tait d'autant pus réel dans m'n idée viyant qué ch'tait man papa Giffard tch'avait sculpté l'Dgiâbl'ye en bouais tch'était dans l'Creux au Dgiâbl'ye, et papa L'Feuvre m'avait emmené l'vaie un Dînmanche viyant qu'j'avait 'té bouan garçon.

George d'la Forge JEP 22/10/1969

 

 

"Tan Papa Giffard en a fait iun en bouais, un Satan, cornes, coue auve lé barbet au but, pid-froutchi et toute la pêque. Il est mâté dans l'tout bas du Creux du Vis et un tas d'monde vont l'vaie. Ch'est p't êt' pour ch'la qué l'creux c'menche à êt' appelé l'Creux au Dgiâbl'ye. Si tu'es un bouan garçon, j'ithons l'vaie ensembl'ye tchique Dînmanche l'arlévée."

George d'la Forge
JEP 22/6/1972

 

 

"Lus m'mée, n'est-alle pon eune Giffard?" Jeanneton li dit.

"Oui," Manman li dit, "Florence Mary Giffard, la fille du Cap'taine Jean Giffard, lé sculpteur tch'a fait l's armeuêthies d'Angliétèrre en d'ssus d'la grand' porte dans l'bel dé la prison. Et ch'est li tch'a fait l'estatue du dgiâbl'ye tch'est dans l'fond du Creux du Vis qué l'monde ont c'menchi à appeler l'Creux du Dgiâbl'ye."

"Ch'est rein qu'dépis qu'chu dgiâbl'ye-là a 'té mîns en pliaiche qué l'monde l'appelle dé même," s'fit Jeanneton. "J'allis l'vaie y'a tchique temps, et il est si affreux atout ses cornes qué j'en avais quâsi peux."

George d'la Forge
JEP 14/6/1973

 

 

Viyiz:

 

Les Pages Jèrriaises