Trenton, Michigan,
U.S.A.
Lé 14 novembre, 1970.
Moussieu l'Rédacteu,
Quand j'tais à r'garder l'empiaichement et les fondâtions d'la neuve prison au Mont Fitchet à La Mouaie d'St. Brélade auve l'anmîn Fraînque Lé Maistre y'a deux-s'trais Dînmanches, j'pensais en mé-mème: Faut-i' tch'i' y'aie un tas d'troubl'ye en Jèrri pour pouver empl'yi eune grand' prison d'mème! Eh bein, y'a du troubl'ye dans L'Nouvieau Monde étout.
J'veins d'passer eune tchînzaine au Cannada. Comme ou l'savez sans doute par les gâzettes, Moussieu Laporte, iun des Minnistres du Gouvèrnément Provincial dé Tchubec, fut achitré et emm'né d'siez-li par quat' jannes hommes, membres du parti pour s'pather Tchubec des aut' provînces du Cannada, armés auve des pistolets. I' finîdrent par l'assâsinner et i' fut trouvé mort eune dgiexaine dé jours pus tard. Un janne homme, tch'a acouo les talons jaunes, à 'té arrêté, mais trais autres ont mênagi à lus muchi d'tchique bord. Un Moussieu Cross tchi r'présentait lé gouvèrnément Angliais pour le conmèrce dans la provînce dé Tchubec, enlevé d'siez-li par les malfaiteurs du mème parti, n'a pon 'couo 'té r'mîns en libèrté, et i' n'y a qu' les malfaiteurs ieux-mèmes tchi savent s'il est mort ou en vie.
Ieune des choses tchi m'fait reunminner entouor l'êtat des choses dans des pays supposêment libres et démocratiques comme Lé Cannada et L's Êtats-Unis est l'attitude et l'comport d'un tas d'politiciens. Lé Preunmyi Minnistre du Cannada, li-mème Cannadgien-Français a, à m'n idée, agi couothageusement et comme i' faut en m'ttant en forche eune louai adoptée pour controller l'pays en temps d'gèrre. V'la tch'a pèrmîns à la police dé faithe des arrêts d'gens soupçonnes, sus l'coup et sans l'ordre du Chentnyi. Tout l'monde tch'ont un mio d'avis dév'thaient l'admither, car ches révolutionnaithes et séparatistes-là ont cèrtainement idée d'enlever d'aut' fonctionnaithes pour êprouver à l's êchangi pour les leurs tchi sont actuellement en prison, et i' n'y a pon mème eune louai sévéthe assez pour aîdgi à l's attraper ches jours tch'i' peuvent êt' des mille milles houors d'la vaie par avion dans p'tit d'temps. Mais, en êcoutant les politiciens du parti politique oppôsé au chein du Preunmyi Minnistre Trudeau, il est aussi piéthe comme les malfaiteurs viyant tch'il est à supprînmer la libèrté du peupl'ye! Si nou-s-êprouvait à comprendre ches politiciens-là nou créthait tch'i' n'y a qu' les malfaiteurs tch'ont d'la libèrté - la libèrté d'faithe mêché! Ch'est seux qu'en pâlant d'mème i' font pliaîsi à un tas d'gens dé p'tit esprit et tchi n'pensent pon pus liain qué l'but d'lus nez. Né v'la des gardgiens d'la libèrté! i' s'disent en ieux-mèmes.
Ichîn, ès Êtats-Unis, l'intèrprétâtion du mot Libêrté est si large qué l's agents d'police sont v'nus au point tch'il' hésitent d'arrêter un malfaiteur dé peux qué l'Juge né l'laîsse couorre quand i' pathaîtra d'vant Justice. En l'arrêtant i' faut qué l' Policeman lî diche tch'i' n'est pon forchi d'rêpondre à des tchestchions à mains qué s'n homme d'affaithes s'sait présent, et tch'i' n'est mème pon forchi d'rêpondre homme d'affaithes là ou non, s'i' crait qué chein tch'i' s'en va dithe pouorrait aller contre li en cour. Si l'agent est en train d'arrêter un homme tch'est nièr, i' n'ôse mème pon lî mett' la main sus l'co dé peux d'êt' atchûsé dé Police brutality. Né v'la l'cri populaithe dé nouos jours - la brutalité d'la police! Lé malfaiteur peut tither d'ssus auve arme et pistolet, lus fliantchi des briques et des pièrres à la tête, des cocktails Molotov, etc., mais quand l's agents êprouvent à lus r'bînfrer ch'est d'la brutalité!
J'avons ieu eune êlection en Améthique dreinement. Lé Président et san Vice-Président ont êprouvé à pèrsuader l'peupl'ye dé voter pour lus parti (Consèrvateur) pour lus aîdgi à propôser au Congrès (lé Parlément Améthitchain) d'pâsser des louais pour ranm'ner d'l'ordre et d'la seûtheté dans l'pays, mais la mâjorité des gens aiment mus voter pour un Congrès tchi n's'en va pon trop complyitchi la vie! I' n'veulent pon êt' embêtés par autcheune chose tchi pouorrait lus donner un mio d'peine. Y'a tchique temps j'liêsais dans la gâzette entouor un cas à New York quand eune janne fille fut tuée dans la rue en pliein jour et qu' autcheune pèrsonne n'arrêtit mème pon en pâssant à côté quand ou criyait au s'cours. Pourtchi s'en mêler? Il éthait p't êt' fallu aller en cour comme teinmoins. Né v'la tch'est tch'en est d'nouos jours!
L's assâsîns du Révérend Martin Luther King et du Sénateu Robert Kennedy sont acouo en plieinne vie et à mangi du bel et du bouan ès frais du publyi. Et il' y s'sont p't êt' acouo pour tchiques années en attendant qu' toutes les Cours d'Appel du pays les confirment coupabl'yes ouaithe qué l'assâsîn d'Kennedy fit en plieinne veue dé trente ou' quarante pèrsonnes tch'étaient à l'entou d'li. Ch'est presqu'încriyabl'ye, mais ch'est pourtant d'mème!
George d'La Forge
Viyiz étout: