Fort Lauderdale, Florida,
U.S.A.
Lé 14 dé mar, 1970.
Moussieu l'Rédacteu,
J'veins d'èrchéver la gâzette dé Jèrri di 22 d'janvyi dé ch't année, et en la liêsant j'mé d'mande tch'est tchi s'en va dév'niîn d'Jèrri! La seule bouanne nouvelle qué j'vai est qu' l'épidémie d'peste (il' appellent ch'la l' influenza ichîn), est finnie. Par contre, la gâzette est plieine dé nouvelles dé vol'lie, d'accidents en moto, et mème dé m'niches dé grèves parmi l's ouvrièrs. Mais la piéthe nouvelle dé toutes est l'idée d'touanner Les Landes dé St. Ouën en clobe dé golfe! Sâbre dé bouais et pistolet d'pânnais! Quand tchi qué l'tourisme s'en va finni d'êprouver à înmaginner d's estchûses pour gâter, et mème aboli, lé p'tit mio d'campangne tchi nouos resté à l'ouvèrt? Ch'est souô-disant pour attriotchi pus d'touristes, mais jé n'crai pon qu'ch'est pour jouer au jeu d'golfe tch'i' veinnent en Jèrri!
L'Île est déjà si gâtée tch'i' n'y a presque pon d'campangne dé restant, et l'fèrmage, tch'est la vocation naturelle dé l'homme, dispathaît p'tit à p'tit. J'espéthe qué touos les St. Ouënnais s'en vont lis r'bînfrer et faithe à saver ès cheins tch'ont chu dêtestabl'ye projet-là dans l'idée qué la tèrre et la belle bruéthe des Landes lus appartcheint, et tch'i' n'ont pon l'întention d'la vaie violée par un tas d'îndividus à taper sus des p'tites blianches balles auve un bâton comme des mousses! Et pis v'la tchi veurt dithe des bâtisses, pus d'baithie, pus d'motos dans les p'tites routes tch'y mènent, pus d'tîntamârre et pus d'empouaisonnement d'l'air par l'odeu d'l'êcappe dé gaz dé pêtrole brulée. És Landes nou peut respither l'air puthe. À vous, St. Ouënnais, d'faithe en sorte qu'oulle y reste!
Mais la trantchilité et la jouaie d'vivre sont disteurbées un mio partout l'monde. L's anciens disaient qué quand Pâques marsinne ch'est sîngne dé dgèrre, peste ou fanminne. Eh bein, l's affaithes sont si boulevèrsées ichîn en Améthique qué nou pouorrait quâsi penser qué ch'est viyant qu' Pâques est dans l'mais d'mar ch't année! La dgèrre continnue au Vietnam, et à ch't heu ou s'êtend dans l'pays d'Laos. Les jannes garçons d'ichîn n'ont pon l'amour dé lus pays à tchoeu comme j'l'avions en Jèrri et un Angliétèrre en 1914, et un tas d'ieux lis r'bînfrent contre la conscription. L'Êtat-Mâjeur dé nouos armées d'l'air et d'tèrre voudrait en finni eune fais pour toutes en bombardant Hanoi, capitale du Vietcong, et Haiphong - lé port où'est qu' les Russes et aut' nâtions dêchèrgent l's armes et canons tchi sont faits sèrvi contre nous - mais l'autorité civile né l'pèrmet pon, probabliément d'peux qu'les Russes ou les Chinnouais lus en mêlent, chein tchi pouorrait dêclientchi eune traisiéme dgèrre mondiale.
Les sŷndicats travaillistes continnuent à faithe l's ouvièrs lus mett' en grève pour aver lus gages hauchis, et jé c'menchons à aver d'la peine à vendre à l'êtrangi viyant qu' nouos prix sont trop hauts. Jé v'nons d'mett' lé grand stînme United States en r'traite viyant qu'les gages dé s'n êtchipe sont si hauts tch'il en couôte trop pour continnuer à l'faithe sèrvi. Nouos boutiques sont plieines d'objets mèrtchis Fabritchi au Japon. Les gens ont peux d'env'yer pour un plionmyi quand y'en a bésoin dans la maîson. Eune pétite affaithe dé r'graie un coq dans la tchuisinne peut couôter vîngt fais la valeu du coq. Les plionmièrs gangnent huit dollars dé l'heuthe, et j'liêsais dans la gâzette avant hièr tch'i' s'en vont aller en grève pour aver lus gages haûchis à douze dollars par heuthe! Et ch'est la mème turlutte dans touos les mêtchièrs. Lé couôtage dé la vie augmente à grands pas, et l's ouvrièrs ieux-mèmes n'en sont pon pus d'l'avant.
Les nègres ont combattu - auve justice dé lus côté - pour èt' pèrmîns d'aller ès univérsités auve les bliancs, mais à ch't heu tch'il' y sont i' veulent êt' gardés à part et aver des maîtres et maitrêsses dé lus couleu, et quand i' n'peuvent pon passer l's examens i' heurlent qué ch'est viyant qu'les maîtres sont contre ieux!
Les Hippies, barbus comme des marmoûsets et habilyis comme des êpeûthas, font eune moqu'thie d'la vie respectabl'ye et vivent comme des cliapards. I' sont contre tout chein tch'est d'bouanne èrnommée, et i' n'veulent pon travailli pour gangni lus vie. La maîntchi d'ieux sont continnuellement êbédés par des drogues et d'veinnent voleurs pour aver des sou pour en acater.
Dans la mâjorité d'nouos grand' villes eune femme n'est pon en seûtheté d'sa vie dans les rues au sé toute seule, et nouos gâzettes sont plieines d'accomptes dé vol, dé viol et d'meurtres. I' pathaît qué l'sŷndicat Cosa Nostra (lé Mafia en Italie) est hardi la cause du crînme tchi d'sahonte lé pays, et qu' les Communistes sont responsabl'yes pour un tas d'la dêroute tch'est à vengi l's univèrsités, et l's êmeutes dans les rues.
À tchi qu'tout chu tripot-là s'en va nouos m'ner? V'la tchi m'fait penser qu' l'histouaithe nouos dit qué ch'tait trop d'aise et d'prospéthité tch'abattit l' empire dé Rome dans les vièrs temps. J'sommes-t'i' en c'mîn pour la mème catastrophe en Améthique? Bouân Dgi vielle qué nannîn!
George d'La Forge
Viyiz étout: