Fort Lauderdale, Florida,
U.S.A.
Lé 19 d'avri, 1969.
Moussieu l'Rédacteu,
Y'a eune telle appathence des bouannes choses dé la vie ichîn en Améthique que des vièrs comme mé sé d'mandent tchiquefais, où'est qu'l'affaithe s'en va finni, et tch'est qu'les gens f'thaient s'il' avaient à gabather auve lé p'tit d'choses qué nou-s-avait quand j'tais mousse!
Les jannes d'à ch't heu - principalement les filles - apprannent à cartchuler bein vite à l'êcole, et la somme la pus aîsie pour ieux est la multiplicâtion viyant tch'i' sont accouôteunmés à eune multiplicâtion des beins d'la vie! I' sont à peine èrvénus d'l'êcole siez ieux tch'i' faut tchi'i' c'menchent à téléphoner ès aut' mousses pour continnuer la convèrsâtion c'menchie en sortant d'la porte d'l'êcole, continnuée dans la beusse tchi les portent jusqu'au but d'la rue tout près d'siez ieux, et en marchant les deux-s'trais pas jusqu'à la maîson! Lé temps est v'nu qu'les pathents étout ont à apprandre la multiplicâtion, souvent oublyiyée d'pis lus p'tits jours à l'êcole, car i' faut faithe mett' un deuxième - tchiquesfais un traisième - téléphone dans la maison. Autrément, i' n'pouorraient pon faithe sèrvi l'leu pour lé reste d'la séthée! En faisant lus leçons du sé, les mousses lé font sèrvi pour compather lus efforts et s'entr'aîdgi, et la solution est la multiplicâtion d'téléphones!
Y'a-t'i' des Jèrriais tch'aimethaient joui d'deux vocâtions ou mêtchièrs duthant lus vie? Eh bein, auve les grosses têtes et clèrcs d'office et érgots d'Cour en ville tchi s'en vont êt' pinnetchinnés au but d'eune vingtaine d'années d'travas - s'nou peut appeler chein tchi font du travas - i' s'en vont pouver r'quémenchi eune deuxième vocâtion et r'chéver lus pinnetchinne en mème temps et r'joui d'eune deuxième vie à ch't heu qu'les gens vivent jusqu'à pus d'septante ans! V'a tchi s'fait en Améthique - et au Cannada étout - pas seulement parmi l's hommes d'office, mais parmi les travailleurs dépis qu'les sŷndicats travaillistes les forchent d'êt' pinnetchinnés d'bouanne heuthe dans la vie.
Lé temps c'menche à v'nîn qué les Améthitchains lus accouôteunment à aver deux ou pus d'toutes les c'mmodités. I' n'y a pon 'couo tant d'années qu'eune fanmile sé vantait d'aver r'mué dans eune maîson tch'avait eune salle dé bain. À ch't heu, les fanmiles sé craient inféthieurs - vis-à-vis l'vaîsîn - s'i' n'ont pon au mains deux salles dé bain, et les pus riches en veulent ieune tchi donne dans châque chambre à couochi, et eune douche dans la cave!
Ch'est la mème boutique pour la télévision et les motos. Quand la télévision fit s'n appathence, ch'tait un sîngne dé prospéthité d'en aver ieune. Dans chu temps-là, i' n'y avait qu'eune stâtion ou deux à vaie et êcouter, mais à m'suthe qué les stâtions multipliyaient, les mousses voulaient vaie les leu et les grands voulaient vaie aut' chose, ch'est en tchi il' en acataient eune deuxième pour mett' dans la chambre d'récréation pour les jannes. À ch't heu, l'idée est d'en aver eune traisième dans la chambre à haut pour vaie et ouï les nouvelles en sé l'vant au matin. Bein souvent la femme dé la maison en a eune petite jutchie sus l'ais dans la tchuisinne pour vaie, et ouï d'la mûsique en m'ttant ses vaissieaux dans la machinne tchi les lavent.
Ch'est êtonnant comme les gens - prîncipalement les jannes - aiment lé brit. Où'est tch'est l'bouan vièr temps quand la trantchillité 'tait l'ordre du jour?
Quant ès motos, iun par fanmile 'tait assez l'temps passé. À ch't heu il en faut iun châque pour homme et femme d'un mênage, et iun pour châtchun des pus grands d's êfants tchi vont à l'êcole s'gondaithe. Ch'est r'mèrquabl'ye dé vaie l'nombre d'motos stationnés dans les bels des êcoles, et quand il' en bâtissent des neuves i' faut eune êtendue à côté pour stationner les motos tch'est bein pus grande qué l'empliaichement des bâtisses!
L's officièrs, soudards, matelots, pilotes d'aviation, agents d'police, hommes dé brigades et en général l's emplyiyés des municipalités tchi sont pinnetchinnés au but d'vîngt ans d'sèrvice sont jannes assez pour èrfaithe eune vîngtaine d'années dans un aut' mêtchi et r'gangni eune deuxième pinnetchinne! Bien souvent, un homme tchi r'quémenche eune deuxième vocâtion est pus heutheux dans sa deuxième vie qu'dans sa preunmièthe. La jouissance dé sa pinnetchinne lî hale la gêne et la peux d'pèrdre san deuxième empliai et lî donne pus d'confianche!
Nou sé d'mande où'est qué ch't appétit-là pour deux sortes d'vie s'en va finni! Pour tch'est, par exempl'ye, qu'un homme es'sait satisfait d'eune seule femme si un moto, eune salle dé bain, eune télévision n'sont pon assez et tch'i' peut aîsiement r'doublier sus châque articl'ye? Est-che tch'i' n'voudra pon aver eune femme pour souangni d'ses mousses et d'san mênage, et ieune pour lî apporter ses chapîns, sa pipe et san chipaûdé et sa gâzette du moment tch'i' s'met dans sa grand' tchaise auprès l'thée? N'mé dites pon qué ch'n'est pon probabl'ye, mème en Améthique! J'sommes dans l'siècl'ye du changement - pour lé mus ou pour le piéthe!
George d'La Forge.
Viyiz étout: